Հայաստանում վերջապես որոշել են կարգավորել ռիելթորական ծառայությունների մատուցման ոլորտը։ Նախագիծը մշակվել է, սակայն դեռևս չի ներկայացվել կառավարության հաստատմանը: Այսօր ցանկացած ոք կարող է զբաղվել անշարժ գույքի առուվաճառքով ու չվճարել հարկեր, ինչի պատճառով առաջանում է անբարեխիղճ մրցակցություն։ Շրջանառության մեջ դրված օրինագծի նպատակն է միասնական կանոններ մշակել ռիելթորական գործունեության ոլորտում։
Օրինագիծը մասնավորապես սահմանում է, որ ՀՀ–ում ռիելթորական գործունեությամբ կարող են զբաղվել ռիելթորական կազմակերպությունները, անհատ ձեռնարկատեր հանդիսացող ռիելթորները, նաև անշարժ գույքի կառավարման կազմակերպությունները և անհատ ձեռնարկատեր հանդիսացող անշարժ գույքի կառավարիչները։
«Հայաստանի անշարժ գույքի գործակալությունների ասոցիացիայի» խորհրդի անդամ Անդրանիկ Հարությունովը կարծում է, որ ՀՀ կառավարության մշակած «Ռիելթորական գործունեության մասին» օրենքի նախագիծը բազմաթիվ զգայուն կետեր ունի։
«Օրենքը ստեղծվել է, որ բարեփոխումներ անի։ Բայց բոլորս էլ գիտենք` ցանկացած օրենքի նպատակն ի սկզբանե լավն է լինում, բայց ընթացքում որոշակի խնդիրներ է առաջացնում, եթե նախապես ոլորտի ներկայացուցիչների հետ մասնագիտական քննարկումներ չեն արվում։ Բառերը գրված են լինում թղթի վրա, բայց հողի վրա դա ուրիշ ձևով է աշխատում»,– Sputnik Արմենիայի հետ զրույցում ասաց Հարությունովը։
«Հայաստանի անշարժ գույքի գործակալությունների ասոցիացիան» մանրամասն ուսումնասիրել է նախագիծը և իր դիտարկումները ներկայացրել հեղինակներին։
«Օրինակ` օրենքում պարտադիր պահանջ է, որ գործակալը պետք է ունենա բարձրագույն կրթություն։ Այստեղ խնդիր կա, որ այն մասնագետները, որոնք տարիների փորձ ունեն այդ ոլորտում, բարեխիղճ աշխատում են, այդ պահանջի պատճառով չեն կարող լիցենզավորվել»,– նշեց ասոցիացիայի խորհրդի անդամը` հավելելով, որ կառավարությանը խնդրել են վերանայել նախագծի այդ դրույթը կամ զուգահեռ սահմանեն նաև որոշակի տարիների աշխատանքային փորձի առկայությունը։
Հարությունովի խոսքով` ոլորտի ներկայացուցիչների համար վիճահարույց է նաև, թե ովքեր են ներգրավվելու լիցենզավորման հանձնաժողովի կազմում, ովքեր ու ինչպես են կազմելու հարցաշարերը։
Մասնագետն ընդգծեց` այսօր ռիելթորի ծառայություններից օգտվող քաղաքացին չի կարողանում մասնագետին տարբերակել ոչ մասնագետից։ Արդյունքում` առաջնորդվելով ոչ մասնագետի տված խորհուրդներով` շատերը լուրջ խնդիրների առաջ են կանգնում։
«Այս օրենքի շահառուն և՛ մենք ենք` գրանցված ռիելթորներս, և՛ հանրությունը, և՛ պետությունը։ Մենք շահառու ենք, քանի որ որպես հարկատու ընկերություններ մշտապես անբարեխիղճ մրցակցության մեջ ենք այն ֆիզիկական անձանց հետ, որոնք հարկային վճարումներ չեն անում և կարողանում են ավելի մատչելի գներով ծառայություն մատուցել։ Հանրությունը շահառու է, քանի որ իրեն որոշ մարդկանց կողմից մատուցվող ծառայությունը վերահսկելի չէ։ Բազմաթիվ բողոքներ, դատական գործեր կան, որ գործարքը կազմակերպել է գործակալ ներկայացած անձը, բայց այդ գործարքը դարձել է դժբախտություն, դրա հետևանքով մարդը կորցրել է բնակարանը։ Պետությունն էլ շահառու է, քանի որ այսօր ոլորտում աշխատողների մեծ մասը հարկեր չի վճարում»,– ասաց Հարությունովը։
Հարությունովը հուսով է, որ օրենքի ընդունումը թույլ կտա ինչ-որ առումով կարգավորել ոլորտը և հավասար մրցակցային դաշտ ստեղծել։
0Comments