Աշխարհի 500 ամենահարուստ մարդկանց կարողությունը ընդամենը մեկ օրում կրճատվել է 208 մլրդ դոլարով։ Այս մասին, ինչպես գրում է ՌԻԱ Նովոստին, վկայում են Bloomberg Billionaires Index (BBI) վարկանիշի և Bloomberg գործակալության տվյալները։
Կտրուկ անկման պատճառը մի շարք երկրների նկատմամբ ներմուծման տուրքեր սահմանելու մասին ԱՄՆ նախագահ Դոնալդ Թրամփի հայտարարությունն է, ինչը համաշխարհային շուկաներում անկում առաջացրեց։
Ինչպես նշում է Bloomberg-ը, այս անկումը միլիարդատերերի ընդհանուր հարստության մեծությամբ չորրորդ խոշոր մեկօրյա անկումն էր վարկանիշի 13-ամյա պատմության մեջ և ամենանշանակալին՝ COVID-19–ի համաճարակից ի վեր։
Ամենաշատ տուժածների թվում է Meta-ի հիմնադիր (ճանաչվել է ծայրահեղական և արգելված է ՌԴ–ում) Մարկ Ցուկերբերգը, որը կորցրել է 17,9 մլրդ դոլար կամ իր կարողության շուրջ 9%–ը՝ ընկերության բաժնետոմսերի 8,96% անկումից հետո:
Amazon-ի հիմնադիր Ջեֆ Բեզոսի կարողությունը նվազել է 15,9 մլրդ դոլարով։ Amazon-ի բաժնետոմսերն ընկել են մոտ 9%-ով, ինչը ամենամեծ անկումն էր 2022 թվականի ապրիլից ի վեր։
Tesla-ի և SpaceX-ի սեփականատեր Իլոն Մասկը կորցրել է 11 մլրդ դոլար՝ Tesla-ի բաժնետոմսերի 5,47% անկման ֆոնին:
Նախօրեին նախագահ Թրամփը հրամանագիր է ստորագրել ներմուծման «փոխադարձ» մաքսատուրքեր սահմանելու մասին։
Բազային տոկոսադրույքը կկազմի 10%, սակայն երկրների մեծ մասի համար բարձրացված սակագներ կկիրառվեն։ Ինչպես պարզաբանել են ԱՄՆ առևտրային ներկայացուցչի վարչությունից, մաքսատուրքի չափը հաշվարկվել է կոնկրետ երկրի հետ ԱՄՆ-ի առևտրային դեֆիցիտից ելնելով՝ առևտրային հաշվեկշռի հասնելու նպատակով:
0Comments