Իրանի ատոմային էներգիայի կազմակերպության ղեկավար Մոհամմադ Էսլամին հայտարարել է, որ Թեհրանի և Վաշինգտոնի միջև շարունակվող անուղղակի բանակցություններում որոշակի առաջընթաց է գրանցվել։

Այս մասին հայտնում է Mehr-ը։

Նրա խոսքով՝ Իրանի դիրքորոշումը հստակ է, և ուրանի «զրոյական հարստացման» գաղափարը մերժվում է որպես հռետորաբանություն, որը հիմնականում ուղղված է սիոնիստական լսարանին։ 

Միջուկային հարցում Թեհրանի հստակ ուղերձը վերահաստատել է նաև Իրանի արտգործնախարար Աբբաս Արաղչին՝ ընդգծելով, որ Իրանը բանակցությունների ընթացքում չի հրաժարվելու իր օրինական իրավունքներից։ Նա նշել է, որ ուրանի հարստացումը համարվում է Իրանի կարևորագույն պահանջներից մեկը, իսկ միջուկային զենքի ստեղծումը բացառվում է երկրի ռազմավարությունից։

«Արևմուտքը իրավունք չունի զրկելու իրանցի ժողովրդին իր օրինական իրավունքներից՝ ելնելով իրենց մտահոգություններից»,– հայտարարել է Արաղչին։

Նրա խոսքով՝ Իրանը շարունակելու է գործել հաստատակամ և Իսլամական հեղափոխության առաջնորդ Այաթոլլա Սեյեդ Ալի Խամենեիի ուղեցույցերի համաձայն։

Իրանը և ԱՄՆ-ն մայիսի 30-ին Հռոմում անցկացրել են անուղղակի բանակցությունների հինգերորդ փուլը։ Ինչպես նախորդ փուլերում, պատվիրակությունները գլխավորել են Աբբաս Արաղչին և ԱՄՆ նախագահի՝ տարածաշրջանային հարցերով բանագնաց Սթիվ Ուիթքոֆը։

Թեհրանը բազմիցս հայտարարել է, որ ոչ մի դեպքում չի հրաժարվի ուրանի հարստացման իր իրավունքից՝ այն համարելով ազգային ինքնիշխանության բաղադրիչ։