Մադրիդի «Ռեալի» և Ֆրանսիայի ազգային հավաքականի հարձակվող Կիլիան Մբապեն հայտարարել է, որ ֆուտբոլի աշխարհը նրան զզվելի է թվում կուլիսային խաղերի պատճառով։ Այդուհանդերձ, նա ընդգծել է, որ շարունակում է խաղալ՝ շնորհիվ այս սպորտի հանդեպ ունեցած կրքի։ Այս մասին գրում է ArmSport.am-ը

«Ես ֆատալիստ եմ ֆուտբոլի աշխարհի նկատմամբ, բայց ոչ՝ կյանքի։ Կյանքը գեղեցիկ է, իսկ ֆուտբոլն այնպիսին է, ինչպիսին կա։ Սիրում եմ ասել, որ մարդիկ, ովքեր գալիս են մարզադաշտ, բախտավոր են, քանի որ պարզապես վայելում են շոուն՝ առանց իմանալու, թե ինչ է կատարվում կուլիսներում։

Ճիշտն ասած, եթե խաղի հանդեպ այս կիրքը չունենայի, ֆուտբոլի աշխարհը վաղուց ինձ համար զզվելի կդառնար», — Մբապեի խոսքերը մեջբերում է RMC Sport-ը՝ հղում անելով L’Equipe-ին։

26-ամյա Մբապեն «Ռեալում» հանդես է գալիս 2024 թվականի ամառից։ Նախորդ մրցաշրջանում նա մասնակցել է 59 հանդիպման, խփել 44 գոլ և կատարել 5 գոլային փոխանցում։