Կորեայի կենտրոնական լրատվական գործակալությունը հրապարակել է ԿԺԴՀ-ի արտաքին գործերի նախարարության կոչը՝ ուղղված Իսրայելի իշխանություններին, որում պահանջվում է հրաժարվել Գազա քաղաքը վերահսկողության տակ առնելու ծրագրերից և դուրս գալ Գազայի հատվածից։

Ըստ նախարարության՝ այս ծրագրերը խախտում են միջազգային իրավունքը և «բացահայտորեն ցույց են տալիս Իսրայելի ղեկավարության ավազակային բնույթը»։

Իսրայելի վարչապետ Բենիամին Նեթանյահուն նախկինում հայտարարել էր, որ Իսրայելը ռազմական վերահսկողություն կստանձնի ամբողջ Գազայի հատվածի նկատմամբ։ Ծրագիրը ներառում է պաղեստինցիների տարհանումը Գազա քաղաքից և ցամաքային հարձակման մեկնարկը։

«Անտեսելով միջազգային հանրության միաձայն կոչը՝ դադարեցնել Գազայի հատվածում գրեթե երկու տարի տևած կոտորածը, Իսրայելի հրեական իշխանությունները որոշեցին ուժով գրավել ավերված Գազա քաղաքը», – ասվում է Հյուսիսային Կորեայի արտաքին գործերի նախարարության խոսնակի հայտարարության մեջ։

ԿԺԴՀ-ի արտաքին գործերի նախարարությունը հիշեցրել է, որ մոտ 20 երկրների, այդ թվում՝ Եգիպտոսի, Կատարի, Սաուդյան Արաբիայի, ԱՄԷ-ի, Ինդոնեզիայի, Պակիստանի, Նիգերիայի և Թուրքիայի արտաքին գործերի նախարարությունները օգոստոսի 9-ին համատեղ հայտարարություն են տարածել՝ դատապարտելով Իսրայելի անխոհեմ որոշումը:

Հայտարարության մեջ նաև զգուշացվում է, որ այս քայլը ոչ միայն կխաթարի հակամարտության խաղաղ լուծում գտնելու միջազգային ջանքերը, այլև կհանգեցնի պաղեստինյան ժողովրդի դեմ ագրեսիայի հետագա նողկալի գործողությունների։