Օգոստոսի 6-ին Մոսկվայում կայանալու է կլոր սեղան՝ նվիրված թուրք-ռուսական հարաբերություններին, ինչպես նաև Թուրքիայի ու Ռուսաստանի նախագահների գործընկերային շփումների 21-րդ տարեդարձին: Այս մասին տեղեկացնում է ermenihaber.am-ը։

Միջոցառումը տեղի ունենալու է Կրեմլին կից նախագահական հյուրանոցում: Քննարկմանը մասնակցելու են Թուրքիայի ԶՈՒ Գլխավոր շտաբի Հետախուզության վարչության նախկին պետ, փոխգնդապետ Իսմայիլ Հաքքի Փեքինը, Թուրքիա-Ռուսաստան բիզնես խորհրդի նախագահ Մաքսութ Քոնյարը և այլք:

Բացի այդ հանդիպմանը կմասնակցեն նաև Ռուսաստանի տարբեր մարզերից ժամանած պատգամավորներ և խոշոր գործարարներ։

Ինչպես նշում են թուրքական աղբյուրները, այս պատմական հանդիպման նպատակը 2004 թվականի օգոստոսի 6-ին Ռուսաստանի ու Թուրքիայի նախագահների առաջին հանդիպման նշանակության գնահատումն է երկու երկրների հարաբերությունների զարգացման համատեքստում։

Քննարկման ընթացքում կվերլուծվեն վերջին տարիներին գրանցված հաջողություններն ու մարտահրավերները, ինչպես նաև կներկայացվեն տնտեսության, էներգետիկայի, տուրիզմի, մշակույթի և կրթության ոլորտներում համագործակցության հեռանկարները։