Shamshyan.com-ի տեղեկություններով՝ մարտի 29-ին ՀՀ ներքին գործերի նախարարության քրեական ոստիկանության գլխավոր վարչության Երևանի քրեական վարչության սեփականության դեմ ուղղված հանցագործությունների դեմ պայքարի բաժնի ծառայողները հսկայածավալ օպերատիվ հետախուզական միջոցառումների արդյունքում Երևանում իրականացրել են հատուկ օպերացիա, որի շրջանակներում վնասազերծվել և Երևանի քրեական ոստիկանություն են տեղափոխվել օտարերկրացիներ:

Վերջիններս կասկածվում են Երևանում բնակարանային գողություններ կատարելու մեջ:

Շամշյանի տեղեկություններով՝ վնասազերծվածները Վրաստանի Հանրապետության քաղաքացիներ են, ովքեր կասկածվում են նաև Երևանում մարտի 25-ին «Միլենա Սուիթ» ՍՊԸ-ի տնօրենի «Infiniti» մակնիշի ավտոմեքենայից խոշոր չափի գողություն կատարելու մեջ:

Դեպքի փաստով նյութեր են կազմվել, որոնք փոխանցվել են ՀՀ քննչական կոմիտե:

Նախաքննության շահերից ելնելով՝ այս պահին որոշ հանգամանքներ չենք հրապարակում:

Լրագրող, հանրային գործիչ Նաիրի Հոխիկյանի ֆեյսբուքյան գրառումը․ «Գյումրիի ընտրության հետագա ճակատագրի երկու տարբերակ կա.

1. ընդդիմադիր 4 քաղաքական ուժերը, հատկապես նախկին քաղաքապետ Վարդան Ղուկասյանը և Մարտուն Գրիգորյանը իրար հետ լեզու են գտնում ու կոալիցիայով վերցնում իշխանությունը հայրաքաղաքում։

2. տեղի կունենա նոր ընտրություն, որից առաջ ՔՊ-ն իրեն ենթակա դատախազության ու քննչական կոմիտեի ձեռքով շարքից կհանի հիմնական ընդդիմադիր ուժերին, կմասնատի և ընտրությունների ժամանակ ոստիկանական բռնություններով և ընտրակաշառքներով իր համար կապահովի բացարձակ մեծամասնություն։

Մնում է, հասկանալ, թե գիտակցական ինչ կարողություն ու ազգային արժեքներ ունեն Վարդան Ղուկասյանը և Մարտուն Գրիգորյանը»։

Նաիրի Հոխիկյան

Իրանի գերագույն առաջնորդ այաթոլլահ Ալի Խամենեին ասել է, որ չի հավատում երկրի վրա ԱՄՆ-ի կողմից դրսից հարձակման հնարավորությանը, սակայն եթե Վաշինգտոնը փորձի ապստամբություն հրահրել իսլամական հանրապետության ներսում, դա կոշտ պատասխան կստանա:

«Նրանք սպառնում են ինչ-որ վատ բան անել, բայց մենք չենք կարծում,  դժվար թե դրսից չարիք գործեն: Բայց եթե նույնիսկ անեն, մեր պատասխանը կոշտ կլինի: Եթե հանկարծ որոշեն ապստամբություն սկսել երկրի ներսում, Իրանի ժողովուրդն ինքը կպատասխանի նրանց»,- ասել է նա: Ինչպես գրում է ՏԱՍՍ-ը, ուղիղ հեռարձակումն իրականացրել է IRIB հեռուստաալիքը։

ԱՄՆ նախագահ Դոնալդ Թրամփը կիրակի երեկոյան Վաշինգտոն վերադառնալիս անդրադարձել է ռուս-ուկրաինական հակամարտությանը: Նա դժգոհել է ՌԴ նախագահ Վլադիմիր Պուտինի գործողություններից, սակայն խոսել է ավելի մեղմ տոնով, քան նախկինում։

«Ես չեմ կարծում, որ Պուտինը կխախտի իր խոսքը»,- ասել է նա,- «Ես նրան վաղուց եմ ճանաչում: Մենք միշտ լավ հարաբերություններ ենք ունեցել»:

Խաղաղության շուրջ համաձայնության գալու ժամկետների մասին Թրամփը ասել է, որ գոյություն ունի «հոգեբանական վերջնաժամկետ»: «Եթե կարծեմ, որ նրանք ձգձգում են, ես դժգոհ կլինեմ», – հավելել է նա:

Այնուհետև Թրամփը քննադատել է Ուկրաինայի նախագահ Վոլոդիմիր Զելենսկուն, ասելով. «Նա փորձում է հրաժարվել հազվագյուտ հողային մետաղների գործարքից։ Եվ եթե նա դա անի, խնդիրներ կունենա՝ մեծ, շատ մեծ խնդիրներ»։

Թրամփի խոսքով՝ Զելենսկին ցանկանում է «վերանայել գործարքը»՝ ավելի հուսալի անվտանգության երաշխիքներ ստանալու համար: «Նա ցանկանում է դառնալ ՆԱՏՕ-ի անդամ: Բայց նա երբեք չի դառնա ՆԱՏՕ-ի անդամ: Նա դա հասկանում է», – եզրափակել է նա:

«Ttehran times»-ը տեղեկացել է, որ Իրանի զինված ուժերն ի պատասխան ԱՄՆ նախագահ Դոնալդ Թրամփի սպառնալիքների, մարտական պատրաստության են բերել հրթիռները, որ կարող են հարվածել ԱՄՆ-ի հետ կապված դիրքերին։

Այս հրթիռների զգալի մասը տեղակայված է երկրով մեկ սփռված ստորգետնյա օբյեկտներում, որոնք նախագծված են դիմակայելու օդային հարվածներին:

Հունվարին իր պաշտոնը ստանձնելուց ի վեր Թրամփը բազմիցս հայտարարել է, որ կռմբակոծի Իրանը, եթե երկիրը չգնա իր պահանջած զիջումներին: Իրանցիները հրաժարվել են ներկայիս պայմաններում բանակցել ԱՄՆ-ի հետ՝ հայտարարելով, որ պատրաստ են վճռականորեն արձագանքել ցանկացած ագրեսիայի:

ԱՄՆ նախագահ Դոնալդ Թրամփը ծրագրում է մայիսի կեսերին այցելել Սաուդյան Արաբիա, գրում է Axios-ը՝ հղում անելով աղբյուրներին։ Սա կլինի Թրամփի առաջին արտասահմանյան այցը նրա երկրորդ նախագահության ընթացքում։ Էր Ռիադը ցանկանում է, որ ԱՄՆ նախագահը այցելի երկիր Ուկրաինայի հակամարտությունը կարգավորելուց հետո։

Հրատարակության զրուցակիցների խոսքով՝ Դոնալդ Թրամփի հավանական ուղևորությունը Սաուդյան Արաբիա վերջին շաբաթների ընթացքում քննարկվել է երկու երկրների բարձրաստիճան պաշտոնյաների միջև։ Աղբյուրներից մեկը պարզաբանել է, որ այցի նպատակը կլինի Ծոցի երկրների հետ հարաբերությունների ամրապնդումը, Մերձավոր Արևելքում հակամարտությունների կարգավորման և ներդրումների քննարկումը։

Axios-ի փոխանցմամբ՝ ԱՄՆ նախագահի այցը երկիր ի սկզբանե նախատեսված էր ապրիլի 28-ին, սակայն հետաձգվել է մինչև մայիսի կեսերը։ Զրուցակիցները նաև հավելել են, որ Էր Ռիադը ցանկանում է, որ Դոնալդ Թրամփը երկիր այցելի Ռուսաստանի և Ուկրաինայի միջև հրադադարի հասնելուց հետո։

2017 թվականին՝ իր առաջին նախագահական ժամկետի մեկնարկից հետո, Դոնալդ Թրամփը իր առաջին արտասահմանյան այցը նույնպես կատարել էր Սաուդյան Արաբիա։

Ադրբեջանի նկատմամբ տարածքային պահանջները, որոնք առկա են Հայաստանի օրենսդրության մեջ, ներառյալ Սահմանադրությունը և մի շարք օրենսդրական ակտեր, շարունակում են մնալ տարածաշրջանի կայուն ապագայի հիմնական խոչընդոտը։ Այս մասին ասված է Ադրբեջանի ԱԳՆ հայտարարության մեջ:

Գերատեսչությունն ընդգծել է, որ հետկոնֆլիկտային շրջանում պատմական հնարավորություններ են ի հայտ եկել տարածաշրջանի պատմության արյունոտ էջերը վերջնականապես շրջելու և կայուն խաղաղության հաստատման համար:

«Բաքուն վճռականորեն և անզիջում պահանջում է հրաժարվել Ադրբեջանի նկատմամբ Հայաստանի առկա տարածքային պահանջներից»,- ասվում է հայտարարության մեջ։

«Հայաստանի էլեկտրական ցանցեր» փակ բաժնետիրական ընկերությունը տեղեկացնում է, որ մարտի 31-ին պլանային նորոգման աշխատանքներ իրականացնելու նպատակով ժամանակավորապես կդադարեցվի հետևյալ հասցեների էլեկտրամատակարարումը`

Ժամը 11։00-17:00-ն ընկած ժամանակահատվածում կարգաբերական աշխատանքների իրականացման նպատակով՝ Երևան քաղաքի Ա-1 թաղամասն ամբողջությամբ և հարակից տարածքների էլ․ սնուցումը 1 ժամով մաս-մաս կդադարեցվի:

Երևան քաղաքի՝

11:00-17:00 Վաղարշյան փ. 18, 18Ա շենքեր, Հր.Քոչարի փ. 17-19 շենքեր, Ազատության պող. 1-3/1 շենքեր, Արաբկիր 19, 21, 23, 25, 27 փողոցների 1-25 առանձնատներ, Վ․ Դավթյան փ. 1-43 առանձնատներ, Ծ․Իսակովի պող․ 50/1, 50/2, 50/3, 50/4, 50/5, 50/7 շենքեր, Դավթաշենի թաղ. 5, 6 փողոցներ մասնակի, Առինջ գյուղ՝ «Վեոլիա Ջուր» ՓԲԸ, հարակից տարածքների առանձնատներ և ոչ բնակիչ-բաժանորդներ,

Արմավիրի մարզ`

11:00-14:00 Ամբերդ, Աղավնատուն և Լեռնամերձ գյուղեր,

Արարատի մարզ՝

11:00-13:00 Դիմիտրով, Մասիս, Բաղրամյան, Բուրաստան, Ազատավան, Բերքանուշ, Դալար և Մրգավան գյուղեր մասնակի,

Կոտայքի մարզ՝

10։00-14:00 Բջնի համայնք, «Վիվա Արմենիա», «Թիմ Տելեկոմ», «Յուքոմ» ընկերությունների բջջային օպերատորների կայաններ և հարակից ոչ բնակիչ-բաժանորդներ,

11։00-16։30 Հրազդան քաղաք՝ Միկրոշրջան թաղամաս 53-65 շենքեր, Ջրառատ թաղամաս մասնակի, թիվ 9 դպրոց, թիվ 9 մանկապարտեզ և հարակից բաժանորդներ,

11:00-17:00 Աբովյան քաղաք՝ 4-րդ միկրոշրջան մասնակի, Մայակովսկի, Առինջ գյուղեր մասնակի, Քարաշամ և Թեղենիք համայնքներ, «Բժիշկներ», «Նաիրի», «Տրուդ», «Մարինե» այգեգործական ընկերություններ, «Վիվա Արմենիա», «Թիմ Տելեկոմ», «Յուքոմ» ընկերությունների բջջային օպերատորների կայաններ և հարակից ոչ բնակիչ-բաժանորդներ, Նոր Գեղի գյուղ՝ Կոյուղի թաղամաս և հարակից ոչ բնակիչ-բաժանորդներ, Արզնի համայնք և հարակից ոչ բնակիչ-բաժանորդներ, Բյուրեղավան քաղաքի ոչ բնակիչ-բաժանորդներ մասնակի, «Բյուրեղաշող», «Գոլդեն Ֆլաուեր», «Արզնի Էքսպրես», «Վյակ», «Էյ Էլ Թի», «Արզնի Գրուպ», «Լուսիմա», «Ե/Գ Առողջարան» ՍՊԸ-ներ, «Արզնի էսթետիկա» վիրաբուժության կենտրոն և սպա, Հանգստի գոտի, «Կ․ Պողոսյան» և «Ա․ Ահարոնյան» «Նարեկ 95» ԱՁ-ներ, Սեփականատերեր՝ «Մ․ Հարությունյան», «Նարեկ Առաքելյան», «Վ․ Մանուկյան», «Վ․ Հակոբյան», «Կոյուղի», «Մանո», «Սանատորիա»,«Խաչմերուկ», «Գետաշեն», «Սառնարան», «Գերեզմաններ» և «Գյուղապետարան» թաղամասեր,

Գեղարքունիքի մարզ՝

11։00-14։00 Շորժա, Ջիլ գյուղեր և հարակից ոչ բնակիչ-բաժանորդներ, զորամաս,

11։00-16:00 Երանոս բնակավայր մասնակի,

11։00-16:30 Մադինա, Լեռնակերտ բնակավայրերն ամբողջությամբ, Ներքին Գետաշեն բնակավայր մասնակի,

Տավուշի մարզ՝

12։00-16:00 Դիլիջան քաղաք՝ Սայաթ-Նովայի, Մխիթարյան, Հակոբջանյան, Թախտա, Թբիլիսյան խճուղի, Մյասնիկյան և Ուղանողական փողոցներ մասնակի, Թեղուտ գյուղ,

Շիրակի մարզ՝

10:00-16:00 Անիի տարածաշրջանի՝ Բագրավան, Նոր Արթիկ և Խարկով գյուղեր։

Հայաստանի Հանրապետության Քաղաքացին ազատորեն ընտրություն կատարելու հնարավորություն ունի։ Ֆեյսբուքյան էջում նման գրառում է արել ՀՀ վարչապետ Նիկոլ Փաշինյանը։

«Քաղաքացու ընտրությունը մեզ համար օրենք է։

Շնորհավորում եմ Քաղաքացու վստահությանը արժանացած, ընտրություններում հաղթած բոլոր քաղաքական ուժերին և թեկնածուներին։

Հ․Գ․ Ընտրողների կամքի վրա ապօրինի ազդեցության մասին բոլոր ահազանգերը պետք է մանրամասն քննվեն, դրանց հետագա կրկնությունը բացառելու առաջնահերթ նպատակադրմամբ»,- գրել է նա։