Դոնալդ Թրամփի վարչակազմը որոշել է դադարեցնել ուկրաինական F-16 կործանիչների աջակցությունը՝ ներառյալ բաղադրիչների մատակարարումը, ինչը դժվարություններ է ստեղծել Ուկրաինայի ռազմաօդային ուժերի համար, գրում է Forbes-ը։

Մինչ առաքումը, ինքնաթիռները արդիականացվել են AN/ALQ-131 pods, PIDS+ և ECIPS+ համակարգերով, ինչը մեծացրել է ռուսական սպառնալիքներին դիմակայելու` նրանց կարողությունը։

Վերլուծաբան Դեյվիդ Աքսը նշել է, որ ուկրաինացի զինվորականները մեծ հույսեր են կապում ֆրանսիական Mirage 2000 կործանիչների հետ, որոնք մատակարարվում են Ֆրանսիայի կողմից։ Ֆրանսիական Mirage 2000-ները հագեցած են իրենց հզոր խլացուցիչներով, և ամերիկացիները ներգրավված չեն դրանց ծրագրավորման մեջ, նշում է վերլուծաբանը։

Մինչդեռ Գերմանիան մտավախություն ունի, որ ԱՄՆ-ն կկարողանա հեռակա կարգով անջատել իր գնած F-35 կործանիչները։

Bild-ի հոդվածում նշվում է, որ մտահոգությունները կապված են, այսպես կոչված, Kill Switch մեխանիզմի հետ, որը կոնֆլիկտի դեպքում ցանկացած պահի թույլ կտա հեռակա կարգով արգելափակել F-35-ը։

Գերմանական Hensoldt պաշտպանական ընկերության ներկայացուցիչ Յոահիմ Շրանժոֆերն ասել է, որ այս մեխանիզմը միայն ասեկոսե չէ, և արգելափակումը կարող է տեղի ունենալ ոչ միայն ներկառուցված համակարգերի, այլ նաև մարտական ​​առաքելությունների պլանավորման համակարգի միջոցով՝ այդպիսով թույլ չտալով ինքնաթիռների թռիչքը։

Մյունխենի անվտանգության համաժողովի նախագահ Վոլֆգանգ Իշինգերը կարծում է, որ Գերմանիան պետք է վերանայի F-35-ի գնման պայմանագիրը, եթե վտանգ կա, որ Վաշինգթոնը կսահմանափակի կործանիչների գործողությունները։

Սիրիայի ժամանակավոր նախագահ Ահմեդ ալ-Շարաան կոչ է արել դադարեցնել բռնության նոր բռնկումը՝ հորդորելով նախորդ կառավարության հետ կապված զինված խմբավորումներին վայր դնել զենքերը, «քանի դեռ ուշ չէ», իսկ նոր կառավարությանը հավատարիմներին՝ խուսափել քաղաքացիական անձանց վրա հարձակումներից և բանտարկյալների նկատմամբ բռնություններից:

«Երբ մենք հետ ենք կանգնում էթիկայից, ընկնում ենք նույն մակարդակի վրա, ինչ մեր թշնամին», - ասել է նա: «Ընկած ռեժիմի մնացորդները պատճառ են փնտրում մեր իսկ խախտումների հետևում թաքնվելու»։

Նոր (Հայաթ Թահրիր ալ-Շամ) և պաշտոնանկ արված կառավարությունների կողմնակիցների միջև բախումները դարձել են բռնության ամենալուրջ դրսևորումը դեկտեմբերի սկզբին Բաշար ալ-Ասադի տապալումից հետո։

Անվտանգության ուժերի և Սիրիայի տապալված նախագահ Բաշար Ասադի կողմնակիցների միջև երկօրյա բախումների և դրան հաջորդած ջարդերի հետևանքով ավելի քան 1000 մարդ է զոհվել: Այս մասին հայտնում է Associated Press-ը։

Զոհվածների մեծ մասը խաղաղ բնակիչներ են՝ 750 մարդ։

Մեծ Բրիտանիայում տեղակայված Մարդու իրավունքների սիրիական դիտորդական կենտրոնը հայտնել է, որ 745 խաղաղ բնակիչներից բացի, որոնք հիմնականում զոհվել են զանգվածային սպանությունների ժամանակ, սպանվել են նաև կառավարական անվտանգության ուժերի 125 աշխատակից և Ասադի 148 կողմնակից:

Ալավիական գյուղերի և փոքր քաղաքների բնակիչները պատմել են, որ զինյալները փողոցներում կամ իրենց տների դարպասների մոտ գնդակահարել են ալավիներին, որոնց մեծ մասը տղամարդիկ են եղել: Բազմաթիվ տներ թալանվել են, տեղի են ունեցել զանգվածային հրկիզումներ: Լաթաքիա քաղաքի շրջակայքի մեծ մասում անջատվել է էլեկտրականությունն ու խմելու ջուրը։

Բռնությունից ամենաշատ տուժած քաղաքներից մեկի՝ Բանիյասի բնակիչները պատմել են, որ դիակները թափված են եղել փողոցներում կամ անթաղ մնացել են տներում և տանիքների վրա, և գրոհայինները չեն թողել, որ նրանց վերցնեն և թաղեն: 

Սիրիայի պետական ​​լրատվական գործակալությունը, վկայակոչելով պաշտպանության նախարարության չներկայացված պաշտոնյային, հաղորդում է, որ կառավարական ուժերն իրենց հսկողության տակ են առել Ասադի կողմնակիցներից ազատագրված տարածքների մեծ մասը:

Լրատվամիջոցի տվյալներով, իշխանությունները փակել են ծովափնյա շրջան տանող բոլոր ճանապարհները՝ «խախտումները կանխելու և կայունությունը աստիճանաբար վերականգնելու համար»։

Իրանն ի վիճակի է չեզոքացնել պատժամիջոցները, ուստի չի սպասի ԱՄՆ-ից որևէ նամակի: Ինչպես փոխանցում են իրանական լրատվամիջոցները, այս մասին հայտարարել է Իրանի խորհրդարանի նախագահ Մոհամադ Բաղեր Ղալիբաֆը:

«Ես պետք է ընդգծեմ խորհրդարանի լիակատար պատրաստակամությունը՝ կյանքի կոչելու Իրանի գերագույն առաջնորդ այաթոլլա Սեյեդ Ալի Խամենեիի՝ երկրի խնդիրների լուծմանը նվիրված ռազմավարությունները և նրա իմաստուն հանձնարարականները: Այաթոլլա Խամենեին ընդգծել է տնտեսական և կենսապահովման խնդիրների լուծման առաջնահերթությունը և միանշանակ հայտարարել, որ պետական ​​կառույցների հիմնական ուշադրությունը պետք է կենտրոնացած լինի մարդկանց կենսապահովման խնդիրների լուծմանը։ Ուստի, խորհրդարանի և օրենսդիրների ուշադրության կենտրոնում կլինեն կենսապահովման խնդիրները, և մենք պետական ​​կառույցների միջև համախմբվածության պահպանումն այդ ջանքերի հաջողության պայման ենք համարում»,- ընդգծել է Ղալիբաֆը խորհրդարանի նիստի ժամանակ:Նա նշել է, որ

Մեկնաբանելով Իրանի հետ բանակցություններ սկսելու մասին ԱՄՆ նախագահ Դոնալդ Թրամփի հայտարարությունը, Ղալիբաֆն ասել է, որ այս առումով պետք է նշել, որ ԱՄՆ նախագահի պահվածքն այլ երկրների հետ հարաբերություններում ակնհայտորեն ցույց է տալիս, որ այդ հայտարարությունները պարզապես բանակցությունների ձգտելու կեղծ ցուցադրություն է։

Նա հավելել է, որ ԱՄՆ-ն ձգտում է պարտադրել իր պահանջները և զինաթափել Իրանին, ինչպես նշված է նրա ստորագրած ԱՄՆ քաղաքականության փաստաթղթում։

«Այսօր, ավելի քան երբևէ, պարզ է, որ պատժամիջոցների վերացումը հնարավոր է Իրանի ուժեղացմամբ և պատժամիջոցների չեզոքացմամբ։ Ուստի մենք ԱՄՆ-ից նամակներ չենք ակնկալում և կարծում ենք, որ օգտագործելով մեր հսկայական ներուժը և օգտվելով այլ երկրների հետ արտաքին հարաբերությունների ընդլայնման հնարավորություններից՝ կարող ենք հասնել մի դրության, որի դեպքում հակառակորդն այլ ելք չի ունենա, քան հանելու պատժամիջոցները»,- նշել է նա։

Ավելի վաղ ԱՄՆ նախագահը հայտարարել էր, որ նամակ է ուղարկել Իրանի գերագույն առաջնորդին՝ հույս հայտնելով, որ նրանք կհամաձայնվեն բանակցությունների։

Մարտի 10-14-ին սպասվում է առանց տեղումների եղանակ. ջերմաստիճանը կբարձրանա 5-8 աստիճանով

Երևան քաղաքում՝

Մարտի 9-ի ցերեկը, 10-14-ին սպասվում է առանց տեղումների եղանակ։

Հանրապետության տարածքում`

Մարտի 9-ի ցերեկը, 10-14-ին սպասվում է առանց տեղումների եղանակ։ Քամին հյուսիսարևելյան՝ 2-5մ/վ: 

Օդի ջերմաստիճանը մարտի 9-ի ցերեկը, 10-14-ին աստիճանաբար կբարձրանա 5-8 աստիճանով։

Բելառուսի նախագահ Ալեքսանդր Լուկաշենկոն առաջիկա շաբաթ կայցելի ՌԴ նախագահ Վլադիմիր Պուտինին։

Այս մասին հայտնում է ՏԱՍՍ-ը:

Բացի ՌԴ նախագահի հետ հանդիպումից, Լուկաշենկոն ՌԴ Անվտանգության խորհրդի անդամների հետ խորհրդակցություն կունենա։

ԵՄ դիվանագիտության ղեկավար Կայա Կալլասը հայտարարել է, որ Ռուսաստանի նախագահ Վլադիմիր Պուտինը չի հետաքրքրվում խաղաղությամբ, քանի որ ռուսական զորքերը շարունակում են հարվածներ հասցնել Ուկրաինային։ Այս մասին նա գրել է X-ի իր միկրոբլոգում։

Ըստ Կալլասի՝ Ուկրաինայի խաղաղ բնակիչները շարունակում են կրել պատերազմի ծանր հետևանքները։

«Ռուսական հրթիռները շարունակում են անդադար ընկնել Ուկրաինայի վրա՝ բերելով ավելի ու ավելի շատ մահեր և ավերածություններ։ Պուտինը կրկին ցույց է տալիս, որ շահագրգռված չէ խաղաղությամբ։ Մենք պետք է ուժեղացնենք մեր ռազմական աջակցությունը, հակառակ դեպքում ավելի շատ ուկրաինացի խաղաղ բնակիչներ կվճարեն ամենաբարձր գինը»,-գրել է Կալլասը:

Ֆրանսիան, Գերմանիան, Իտալիան և Մեծ Բրիտանիան աջակցել են Գազայի հատվածի վերականգնման արաբական ծրագրին։ Ինչպես տեղեկացնում է «Արմենպրես»-ը, այդ մասին հայտնել է Իտալիայի ԱԳՆ-ն։

Եգիպտոսի մայրաքաղաք Կահիրեում տեղի է ունեցել Արաբական պետությունների լիգայի արտակարգ գագաթնաժողովը Պաղեստինի հարցով։ Արդյունքում՝ մասնակիցները հավանություն են տվել Գազայի հատվածի վերականգնման համար Եգիպտոսի մշակած ծրագրին, որը ենթադրում է պաղեստինցի ժողովրդի ներկայության պահպանում իրենց հողերում։ Ծրագիրը բաղկացած է երեք փուլից, առաջինը՝ իրենց տները կորցրած պաղեստինցիներին ժամանակավոր կացարաններ տրամադրելն է։

«Մենք՝ Ֆրանսիայի, Գերմանիայի, Իտալիայի և Մեծ Բրիտանիայի արտաքին գործերի նախարարներս, ողջունում ենք Գազայի վերականգնման ծրագրի արաբական նախաձեռնությունը: Ծրագիրը նախանշում է Գազայի վերականգնման իրատեսական ուղին և խոստանում է, որ իրագործվի պաղեստինցիների աղետալի կենսապայմանների արագ և կայուն բարելավում»,-ասված է հայտարարության մեջ:

Նախարարները նշել են, որ վերակառուցման և վերականգնման ջանքերը պետք է խարսխված լինեն ամուր քաղաքական և անվտանգության հիմքի վրա, որն ընդունելի է ինչպես իսրայելցիների, այնպես էլ պաղեստինցիների համար՝ դրանով իսկ երաշխավորելով երկարաժամկետ խաղաղություն և անվտանգություն:

Սիրիայում 2 հայ է զոհվել։ Այս մասին հայտնում է «Գանձասար» թերթը։

Հայր և որդի Անթուան և Ֆատի Պութրոսները Լաթաքիայում կրակոցների զոհ են դարձել։

ԱՄՆ նախագահ Դոնալդ Թրամփը դիտարկում է Ռուսաստանի դեմ պատժամիջոցների խստացման հարցը։ Այս մասին նա գրել է TruthSocial սոցիալական ցանցի իր էջում։

«Հաշվի առնելով այն փաստը, որ Ռուսաստանն այժմ բացարձակապես ջարդում է Ուկրաինան մարտի դաշտում, ես լրջորեն մտածում եմ Ռուսաստանի նկատմամբ զանգվածային բանկային սանկցիաների և մաքսատուրքերի մասին՝ մինչև հրադադարի և վերջնական խաղաղության համաձայնագրի ձեռքբերումը։ Դիմում եմ Ռուսաստանին և Ուկրաինային՝ անհապաղ նստեք բանակցությունների սեղանի շուրջ, քանի դեռ ուշ չէ»,- գրել է նա: