Ուկրաինայի նախագահ Վլադիմիր Զելենսկին ժամանել է Սաուդյան Արաբիայի Ջիդդա քաղաք։ Այս մասին հայտնում է Reuters-ը։ 

Մարտի 11-ին Ջիդդա քաղաքում բանակցություններ կանցկացվեն Ուկրաինայի և ԱՄՆ-ի միջև։

Ուկրաինայի նախագահը ժամանել է Սաուդյան Արաբիայի թագաժառանգ և վարչապետ Մուհամեդ բեն Սալմանի հետ բանակցությունների, ում կառավարությունը միջնորդ դեր է խաղում Ուկրաինայի, ԱՄՆ-ի և Ռուսաստանի միջև բանակցություններում։

Ավելի վաղ Զելենսկին հրապարակել էր պատվիրակության կազմը, որը մեկնելու է Սաուդյան Արաբիա՝ ԱՄՆ-ի հետ բանակցությունների՝ նախագահական գրասենյակի ղեկավար Անդրեյ Երմակը, արտաքին գործերի նախարար Անդրեյ Սիբիհան, պաշտպանության նախարար Ռուստեմ Ումերովը և նախագահի աշխատակազմի ղեկավարի տեղակալ Պավլո Պալիսան։

Ըստ աղբյուրների՝ ամերիկյան պատվիրակության կազմում պետք է լինեն ԱՄՆ ազգային անվտանգության հարցերով խորհրդական Մայք Ուոլցը, Մերձավոր Արևելքի հարցերով նախագահի հատուկ ներկայացուցիչ Սթիվեն Ուիտկոֆը և ԱՄՆ պետքարտուղար Մարկո Ռուբիոն։

Իսրայելի արտգործնախարարության աղբյուրներին հղում տալով՝ մամուլը գրում է, որ Թուրքիան արգելափակել է Իսրայելի մասնակցությունը ՆԱՏՕ-ի տարեկան զորավարժությանը։ Այս մասին գրում է Ermenihaber-ը:

Թուրքիան, մասնավորապես, խոչընդոտել է Իսրայելի մասնակցությունը ՆԱՏՕ-ի «Կայունություն և արտակարգ իրավիճակների պատրաստվածություն» խորագրով տարեկան զորավարժությանը։

Նշվում է, որ ՆԱՏՕ-ի որոշումները սովորաբար կոնսենսուս են պահանջում, և առանց Իսրայելի հետ ակտիվ գործընկերային համաձայնագրի հնարավոր չէ Թուրքիային պարտադրել թույլ տալ Իսրայելի մասնակցությունը դաշինքի պաշտոնական գործունեությանը։

Իսրայելի պաշտոնական շրջանակները Թուրքիային մեղադրել են վետոյի իրավունքը որպես քաղաքական գործիք օգտագործելու մեջ։

Եվրահանձնաժողովի նախագահ Ուրսուլա ֆոն դեր Լեյենը հայտարարել է, որ Եվրոպայի պաշտպանության բեռը Միացյալ Նահանգների վրայից հանելու ջանքերն արագանում են:

Նրա խոսքով՝ ԱՄՆ-ն ճիշտ է այս ուղղությամբ իր պահանջներում, և որ Դոնալդ Թրամփի վարչակազմի դիրքորոշումը չի վնասում դաշնակցային հարաբերություններին:

Պատասխանելով այն հարցին, թե արդյոք նա համարում է ԱՄՆ – ին Դոնալդ Թրամփի օրոք դաշնակից, ֆոն դեր Լեյենն ասել է.

«Իհարկե, ԱՄՆ-ն և ԵՄ-ն դաշնակիցներ են։ Բայց դա չի նշանակում, որ այն մոդելը, որը մենք որդեգրել ենք վերջին 25-30 տարիների ընթացքում կամ ավելի շատ, դեռ ճիշտ է: ԱՄՆ-ը կրում է պաշտպանության համար պատասխանատվության մեծ մասը: Մենք պետք է կատարենք մեր տնային աշխատանքը, մենք պետք է կատարենք մեր պարտականությունները»,- ասել է նա։

Հիսուս Քրիստոսի հրաշափառ Հարության տոնը կամ Սուրբ Զատիկը Հայ առաքելական եկեղեցու 5 տաղավար տոներից մեկն է:

Այս տարի այն կնշվի ապրիլի 20-ին։ Մեծ պահքը մեկնարկել է մարտի 3-ին։  

Սիրիայի պաշտպանության նախարարության խոսնակ, գնդապետ Հուսեյն Աբդուլ-Ղանին հայտարարել է երկրի ծովափնյա շրջաններում նախկին վարչակարգի կողմնակիցների դեմ ռազմական գործողությունների ավարտի մասին՝ շեշտելով, որ պետական կառույցները այժմ կարող են վերսկսել իրենց աշխատանքը՝ անցնելով կյանքի բնականոն ընթացքին։ Այս մասին հայտնում է Սիրիայի «Գանձասար» շաբաթաթերթը։ 

Սիրիայի պաշտպանության նախարարության մամուլի խոսնակը հավելել է, որ հաջորդ փուլում երկրի անվտանգության ծառայությունները պետք է ջանքեր գործադրեն՝ ապահովելու մարդկանց անվտանգությունը։ Նա վստահեցրել է, որ այս համատեքստում մշակվել են նոր ծրագրեր՝ նախկին վարչակարգի կողմնակիցների դեմ պայքարն ավարտելու համար, և պաշտպանության նախարարությունն աշխատում է վերացնել ապագա սպառնալիքները և կանխել քրեական տարրերի վերակազմակերպումը։

ՀՀԿ երիտասարդական կազմակերպության ղեկավար Հենրիխ Դանիելյանի ֆեյսբուքյան գրառումը. «Նիկոլ Փաշինյանի վերջին այցը Գյումրի հերթական անգամ ապացուցեց այն իրականությունը, որի մասին մենք բազմիցս խոսել ենք․ գործող իշխանությունն ամբողջությամբ կտրված է ժողովրդից և չունի հանրային աջակցություն։

Այն պատկերն, ինչին ականատես եղանք, վկայում է, որ հասարակության մեծ մասը այլևս չի վստահում այս կառավարությանը, իսկ Փաշինյանի քաղաքականությունը հիմնված է բացառապես ստի, մանիպուլյացիայի և կեղծիքների վրա։
Գյումրիում հնչած դժգոհությունները ևս մեկ անգամ ընդգծեցին ժողովրդի հիասթափությունն ու իշխանության անկարողությունը՝ լուծելու երկրի առջև ծառացած հիմնախնդիրները։ Տնտեսական անորոշությունը, արտաքին քաղաքականության ձախողումները, անվտանգության սպառնալիքներն ու ազգային շահերի զիջումը ժողովրդի առջև հաշվետվություն պահանջող խնդիրներ են, որոնց պատասխանները այս կառավարությունը չունի։
Հետևաբար, անհրաժեշտ է քաղաքական պատասխանատվության ենթարկել գործող իշխանության ներկայացուցիչներին և պահանջել բացատրություն՝ թե՛ երկրի ներսում իրականացվող աղետալի քաղաքականության, թե՛ պետական շահերի զիջման համար։ Հայաստանի ապագան պահանջում է արդյունավետ, ազգային շահերից բխող նոր քաղաքականություն, որը կկարողանա վերականգնել երկրի անվտանգությունն ու ժողովրդի վստահությունը»։

Հենրիխ Դանիելյան

Այսօր՝ մարտի 10-ին, ՀՅԴ Բյուրոյի նորընտիր անդամները՝ ներկայացուցիչ Արմեն Ռուստամյանի գլխավորությամբ, այցելել են ՀՀ-ում Արցախի մշտական ներկայացուցչություն և հանդիպել Արցախի Հանրապետության նախագահ Սամվել Շահրամանյանի հետ:

Հանդիպմանը քննարկվել են Արցախի բռնի տեղահանված ժողովրդի հիմնախնդիրները, դրանց լուծման հնարավոր տարբերակները՝ հատկապես պատմական հայրենիք վերադարձի ուղղությամբ կատարվող քայլերը:
Կարևորվել է ՀՀ-ում արցախցիների արժանապատիվ ապրելու պայմանների ստեղծումը՝ թե իրավական և թե սոցիալ-հոգեբանական ոլորտներում:

Զրուցակիցներն ընդգծել են Արցախի Հանրապետության պետական ինստիտուտների գոյության ու գործունեության կարևորությունը՝ Արցախի ժողովրդի իրավունքների պաշտպանության և վերականգնման գործում»:

Միացյալ Նահանգները պաշտոնապես չեղարկում է USAID-ի՝ ԱՄՆ զարգացման գործակալության ծրագրերի 83 տոկոսը, X-ում գրել է պետքարտուղար Մարկո Ռուբիոն։

Որոշումը կայացվել է 6-շաբաթյա դիտարկումների արդյունքում։

«5200 արդեն լուծարված պայմանագրերի վրա տասնյակ միլիարդավոր դոլարներ են ծախսվել ոչ ի շահ ԱՄՆ-ի, երբեմն նույնիսկ ի վնաս ԱՄՆ շահերին», – գրել է Ռուբիոն՝ նշելով․ – «Կոնգրեսի հետ խորհրդատվություններից հետո, Պետքարտուղարությունը մտադիր է ուժի մեջ մնացած շուրջ 1000 ծրագրերն ավելի արդյունավետ կառավարել»։

Երկրի հերն անիծել է, Արցախը տվել է Ադրբեջանին, կադաստրի վկայականը կորցրել է, ասում է՝ կադաստրի վկայական չունենք: Այսօր լրագրողների հետ զրույցում ասել է ՀՀԿ ԳՄ անդամ Էդուրադ Շարմազանովն՝անդրադառնալով Գյումրիում երեկ Փաշինյանի արած հայտարարություններին:

Շարմազանովն ասաց. «Ինքը Ադրբեջան ու Թուրքիա պետության տեղապահն է  այստեղ: Երբ ասում է՝ ես ժողովրդի իշխանության տեղապահն եմ, ինքը Էրդողանի և Ալիևի իշխանության տեղապահն է ՀՀ-ում, որրովհետև ՀՀ որևէ ղեկավար երբեք կասկածի տակ չի դրել Անկախության հռչակագիրը, երբեք կասկածի տակ չի դրել Արցախի ինքնորոշման իրավունքը, երբեք չի հիմնավորել, որ Արցախն Ադրբեջանի մաս է, երբեք չի ասել, որ Հայաստանը կադաստրի վկայական չունի, երբեք կասկածի տակ չի դրել Արարատի կապը հայ ժողովրդի հետ, երբեք հարցականի տակ չի դրել Ցեղասպանության միջազգային ճանաչումը։ Երկրի հերն անիծել է, Արցախը տվել է Ադրբեջանին, կադաստրի վկայականը կորցրել է, ասում է՝ կադաստրի վկայական չունենք, ի՞նչն է հետ բերելու»,- ասաց նա:

«Ալիևի ու Էրդողանի կողմից մաշված մեկը խոսում է կիսամաշվածությունից: Ալիևի ու Էդրողանի արանքում կիսամաշվել է, ինքն ի՞նչ կապ ունի ՀՀ անկախության հետ»,- ասաց Շարմազանովը:

Գյումրու նախկին քաղաքապետ Սամվել Բալասանյանն այսօր արձագանքել է Գյումրիում Նիկոլ Փաշինյանի հնչեցրած հայտարարություններին.

«Սիրելի՛ հայրենակիցներ, սիրելի՛ գյումրեցիներ,

Վարչապետի պաշտոնը զբաղեցնող հայտնի անձը Գյումրիում անցկացվող իրենց նախընտրական միջոցառման ժամանակ անդրադարձել է ինձ , հայտարարելով  «Սև Բերդ» ամրոցի ապօրինի սեփականաշնորհման մասին:

Առողջությանս հետ կապված և իմ ընտանիքին բաժին հասած փորձությունների բերումով՝ երկար ժամանակ չեմ անդրադարձել տվյալ անձի հայտարարություններին , սակայն համբերությանս բաժակը լցվել է:

Այս ամենի մեջ ամենազավեշտալին այն է, որ նա նույնիսկ տեղյակ չէ, որ շինծու  քրեական գործը վերաբերվում Է ոչ թե «Սև Բերդ» ամրոցին այլ  դրան հարակից հողերին: Կարծում եմ, քեզ զեկուցող տգետներ շատ կան:

Բոլոր գյումրեցիները գիտեն, թե ինչ վիճակում է գտնվել  «Սև Բերդ» ամրոցը մասնավոր անձից իմ գնելուց առաջ, նորից եմ կրկնում՝ ՄԱՍՆԱՎՈՐ ԱՆՁԻՑ և ինչ է դարձել հիմա: Մշակութային, մարզական, պետական(որոնց մասնակցել ես ինքդ) մակարդակի ինչ միջոցառումներ են տեղի ունեցել «Սեւ բերդ»-ում՝ բացարձակապես անվճար, մինչ օրս քաղաքի տուրիստական զարդն է՝ նորից անվճար: Ձեր խղճուկ խմբակը Գյումրիի զբոսաշրջային զարգացման համար չի արել 10 տոկոսն այն ամենի, ինչ արել է «Սև Բերդ» ամրոցը ՝ մեր քաղաք հարյուր հազարավոր այցելուներ բերելով ու դառնալով թիվ մեկ այցեքարտը:

Ինչ վերաբերում է «Սև Բերդ»-ի ապօրինի լինելուն, խորհուրդ եմ տալիս նախքան մեղադրելը,անմեղության կանխավարկած խախտելը,քո ելույթով պետական ողջ գործիքակազմը իմ ընտանիքի դեմ տրամադրելը՝ ստանալ  ճիշտ տեղեկություններ:
«Սև Բերդ» ամրոցը մեր ընտանիքը ձեռք է բերել նախկին սեփականատիրոջից այլ ոչ թե
համայնքից: Այնպես որ, «Սև Բերդ» ամրոցը  չի կարող դառնալ  քո սիրելի #հատիկառհատիկի կոնտենտ և հայտնվել ռենջ ռովեռի կողքին:

Մարդկային, բարոյական բոլոր սահմանները անցած անձին, խորհուրդ եմ տալիս  հեռու մնալ ինձանից և իմ ընտանիքից:

Սիրելի՛ հայրենակիցներ, սիրելի՛ գյումրեցիներ,

Առողջական խնդիրներս կարգավորվելուն պես վերադառնալու եմ Գյումրի: Ինձ հետ կապված բոլոր շինծու մեղադրանքներին իրավական և քաղաքական պատասխանը տալու եմ, իսկ որդուս՝ Խաչատուր Բալասանյանի գործով «իրավական գործընթացը» դատաքննությունը մտել է բաց փուլ, իրավական ֆարսը բոլորի համար ակնհայտ է լինելու, չնայած այս խմբակի գործողություններում իրավական հետք փնտրելը անիմաստ է:

Այդ անձը խոսեց «վերջին բոյի» մասին, ասեմ որ վերջին բոյ պետք էր տալ ուրիշ տեղ, այլ ոչ թե Գյումրիում՝ «Սև Բերդ»- ի դեմ:

Սիրելի գյումրեցիներ, իմ կոչն է ձեզ՝ ակտիվորեն մասնակցել Գյումրիում կայանալիք ավագանու արտահերթ ընտրություններին՝ մինուս մեկ ձևաչափով, մերժելով մեր ազգին սև ու սպիտակի բաժանած խմբակին և նրանց դրածոյին:                       

Աստված Պահապան Հայ Ազգին»։