Մենք ուզում ենք հավաստիանալ, որ Ադրբեջանի մտադրությունը չէ իր տարածքում հակամարտային իրավիճակը փակել և արտահանել Հայաստանի տարածք։ Այս մասին «Երևանյան երկխոսություն» երկրորդ միջազգային ֆորումի ժամանակ ասել է ՀՀ վարչապետ Նիկոլ Փաշինյանը։
«Ադրբեջանի հետ կարողացել ենք համաձայնեցնել ՀՀ-ի և Ադրբեջանի միջև խաղաղության և միջպետական հարաբերությունների հաստատման մասին համաձայնագրի նախագիծը, փաստաթուղթը վերջնական տեսքի ենք բերել և ավարտել ենք նախագծի շուրջ բանակցությունները։
ԵԱՀԿ Մինսկի խմբի լուծարման օրակարգն ընդունելի է մեզ համար և մենք պատրաստ ենք առաջ շարժվել, բայց մյուս կողմից մենք ուզում ենք հավաստիանալ, որ մենք և Ադրբեջանը նույն կերպ ենք ընկալում իրավիճակը, ուզում ենք հավաստիանալ, որ Ադրբեջանի մտադրությունը չէ իր տարածքում հակամարտային իրավիճակը փակել և արտահանել այն Հայաստանի տարածք»,-հայտարարել է Փաշինյանը։
Նա նաև նշել է՝ եթե Սահմանադրական դատարանը որոշի, որ խաղաղության պայմանագիրը չի համապատասխանում մեր Սահմանադրությանը, այդ դեպքում ես կնախաձեռնեմ սահմանադրական փոփոխություններ։
«Խաղաղության գործընթացն ու խաղաղության պայմանագիրը չպետք է բաց թողնվեն»,- ասաց նա։
Փաշինյանը նշեց, թե հասարակությանը կհամոզեն, որ այդ փոփոխությունն արվի, որպեսզի Հայաստանը հասնի տևական խաղաղության։
«Բայց, եթե ՍԴ-ն որոշի, որ պայմանագիրն ամբողջովին համապատասխանում է ՀՀ սահմանադրությանը, ապա, այդ պարագայում որևէ խոչընդոտ չի լինի փաստաթուղթն Ազգային ժողով ուղարկելու ճանապարհին»,- նշեց վարչապետը։
ԱՄՆ նախագահ Դոնալդ Թրամփը հայտարարել է, որ Միացյալ Նահանգները առաջընթաց է գրանցել Իրանի հետ Թեհրանի միջուկային ծրագրի շուրջ բանակցություններում։ ԱՄՆ նախագահը հավելել է, որ մոտ ապագայում տեղի կունենա բանակցությունների ևս մեկ փուլ, սակայն հստակ ժամկետ չի նշել։ Այս մասին գրում է kommersant.ru-ն:
«Մենք շատ լավ բանակցություններ ունեցանք Իրանի հետ, տեսնենք, թե ինչ կստացվի դրանից: Կարծում եմ, որ մենք կարող ենք լավ նորություններ ունենալ իրանական ճակատում: <...> Մենք իրական առաջընթաց ունենք, լուրջ առաջընթաց», - ասել է Դոնալդ Թրամփը Նյու Ջերսիից Վաշինգտոն թռիչքի ժամանակ:
Ավելի վաղ Իրանի արտգործնախարար Աբբաս Արաղչին հայտարարել էր, որ բանակցությունների հաջորդ փուլի օրն ու վայրը դեռ համաձայնեցված չեն։
Կողմերը մայիսի 23-ին Հռոմում անցկացրել են բանակցությունների հինգերորդ փուլը: Օմանի արտաքին գործերի նախարարը, որը միջնորդ է կողմերի միջև, ասել է, որ «որոշ, բայց ոչ վերջնական առաջընթաց» է գրանցվել: Բանակցությունների գլխավոր խնդիրը մնում է Թեհրանի իրավունքը՝ պահպանել ուրանի հարստացման սեփական ծրագիրը պոտենցիալ համաձայնագրի շրջանակներում։
Թուրքիան մտադիր Է Սիրիայի տարածքում ռազմաբազաներ ստեղծել ահաբեկչության դեմ պայքարի շրջանակներում։ Այս մասին հայտնում է «Türkiye» թերթը ՝ վկայակոչելով թուրքական անվտանգության մարմիններում իր աղբյուրը, փոխանցում է ՌԻԱ «Նովոստին»։
Աղբյուրը նշել է, որ Անկարան Սիրիայի իշխանություններին օգնություն կցուցաբերի բանակի և անվտանգության ուժերի կազմակերպման հարցում:
«Աղբյուրները նշել են, որ Թուրքիայի զինված ուժերը Սիրիայում կստեղծեն ռազմաօդային և ռազմածովային բազաներ՝ «Իսլամական պետության» դեմ պայքարելու համար», - հաղորդել է հրատարակությունը։
Պարբերականի տվյալներով՝ ԻՊ-ի դեմ պայքարի շրջանակներում Սիրիայում հինգ երկրների, այդ թվում ՝ Թուրքիայի կանոնավոր հանդիպումներ են անցկացվում, որոնք քննարկում են խմբավորման դեմ պայքարի մեխանիզմը: Ընդ որում՝ չի հստակեցվում, թե ուրիշ որ երկրներն են ներգրավված բանակցություններում։
Բուֆերային գոտին կզբաղեցնի Ուկրաինայի գրեթե ողջ տարածքը, եթե շարունակվի ռազմական օգնությունը «բանդերային» ռեժիմին: Այս մասին հայտարարել է ՌԴ Անվտանգության խորհրդի փոխնախագահ, երկրի նախկին նախագահ Դմիտրի Մեդվեդևը։
Նա Telegram-ի ալիքում իր գրառմանը կցել է մի տեսանյութ, որում գրեթե ողջ Ուկրաինան, բացառությամբ երկրի արևմտյան մասին մի փոքր հատվածի, նշված է որպես բուֆերային գոտի։
«Հարավկովկասյան երկաթուղի» ՓԲԸ-ն հայտարարություն է տարածել. «2025 թվականի մայիսի 25-ին՝ ժամը 14:35-ին, Էջմիածին–Մասիս երկաթուղային հատվածում տեղի է ունեցել դժբախտ պատահար մահվան ելքով։ Գյումրի–Երևան երթուղով ընթացող էլեկտրագնացքի մեքենավարական անձնակազմը, շարժվելով սահմանված արագությամբ, նկատել է երկաթուղային գծերի վրա կանգնած անձի, որը գտնվել է գնացքից մոտ 130 մետր հեռավորության վրա՝ մեջքով դեպի գնացքը։
Մեքենավարը անմիջապես կիրառել է ձայնային ազդանշաններ և արտակարգ արգելակում, սակայն բախումը կանխել չի հաջողվել։ Երիտասարդ տղան մահացել է ստացած ծանր վնասվածքներից։
Արտակարգ արգելակումից հետո գնացքը շարունակել է շարժվել իներտորեն մոտ 380 մետր։ Վարելու ռեժիմի ճշգրիտ տվյալները պարզ կլինեն արագաչափ ժապավենի վերծանումից հետո։ Դեպքի հանգամանքները քննվում են համապատասխան մարմինների կողմից։
«Հարավկովկասյան երկաթուղի» ՓԲԸ-ն խորին ցավակցություն է հայտնում մահացածի հարազատներին և մտերիմներին։
Այս ողբերգական դեպքը ևս մեկ անգամ ընդգծում է, որ երկաթուղային ենթակառուցվածքը բարձր վտանգավորության գոտի է, և քաղաքացիները պետք է խստորեն պահպանեն անվտանգության կանոնները։ «ՀԿԵ» ՓԲԸ-ն պարբերաբար հիշեցնում է երկաթուղային գծերի հատման կանոնների խախտման հետևանքով առաջացող վտանգների մասին և նախաձեռնում է կրթական ծրագրեր՝ ուղղված անվտանգության պահանջների իրազեկմանը։
ՀԿԵ-ն, ՀՀ կրթության, գիտության, մշակույթի և սպորտի նախարարության և մի շարք ոլորտային կազմակերպությունների հետ համատեղ, մշակել է «Երեխաների վարքի կանոնները երկաթուղային տրանսպորտում» կրթական ծրագիրը, որի շրջանակում արդեն վերապատրաստվել են մոտ 1000 ուսուցիչ և աշակերտ։ Ծրագրի իրականացումը շարունակվում է։
ՀԿԵ-ն ևս մեկ անգամ կոչ է անում քաղաքացիներին զգոն լինել երկաթուղային ենթակառուցվածքի տարածքում, խստորեն պահպանել անվտանգության կանոնները և երկաթուղային գծերը հատել միայն սահմանված վայրերում՝ համոզվելով, որ մոտակայքում գնացք չկա։
Հայտնի է դարձել «Ոսկե խաղակոշիկ 2025»-ի հաղթողը: Մրցանակը բաժին կհասնի Ֆրանսիայի հավաքականի և Մադրիդի «Ռեալի» ֆուտբոլիստ Կիլիան Մբապեին, որը Լա Լիգայում 31 գոլ է խփել:
Նա հավաքել է 62 միավոր։ Պորտուգալիայի Պրիմերայի առաջնությունում 39 գոլ խփելուց հետո 58,5 միավորով երկրորդ տեղում է Վիկտոր Գյոկերեշը (Լիսաբոնի Սպորտինգ):
Երրորդ տեղում Լիվերպուլի հարձակվող Մոհամեդ Սալահն է, ով այսօր խփեց Պրեմիեր լիգայում այս մրցաշրջանի իր 29-րդ գոլը և «Ոսկե խաղակոշիկի» պայքարում հավաքեց 58 միավոր:
Այսօր՝ մայիսի 25-ին, կրակոցներ են հնչել Երևանում։ Ժամը 01:30-ի սահմաններում ՀՀ Ներքին գործերի նախարարության Ոստիկանության համայնքային ոստիկանության գլխավոր վարչության Էրեբունու բաժնում օպերատիվ տեղեկություններ են ստացվել, որ Նոր Արեշ 9-րդ փողոցում կրակոցներ են հնչել և կա վիրավոր։ Մինչ ոստիկաններն ու պարեկները կժամանեին դեպքի վայր, «Էրեբունի» բժշկական կենտրոնից ոստիկանության Էրեբունու բաժին ահազանգ է ստացվում, որ «ձախ ականջախեցու հրազենային վնասվածք» ախտորոշմամբ Երևանի 102 շտապօգնության բժիշկների թիվ 44 խումբը իրենց մոտ է տեղափոխել մի քաղաքացու։ Հիվանդանոց մեկնած ոստիկանները պարզել են, որ վիրավորը Նոր Արեշ 9-րդ փողոցի բնակիչ 47-ամյա Հայկուհի Ե-ն է։
Ֆոտոլրագրող Գագիկ Շամշյանի հաղորդմամբ` ոստիկաններն ու քննիչները պարզել են, որ նույն օրը ժամը 01:00-ի սահմաններում Նոր Արեշ 9-րդ փողոցի տներից մեկի մոտ բարձրաձայն զրուցելու համար վիճաբանություն է առաջացել նույն փողոցի բնակիչ անչափահաս տղայի և նշված հասցեի մոտ հավաքված թվով 5 անծանոթ երիտասարդների միջև։
Վիճաբանությանը միջամտել են անչափահասի հարազատներ՝ նույն փողոցի բնակիչներ 54-ամյա Արթուր Ե-ն, հիվանդանոց տեղափոխված Հայկուհի Ե-ն և 22-ամյա Սեյրան Ե-ն, որն այնուհետև վերածվել է ծեծկռտուքի և այդ ժամանակ հակառակ կողմի մասնակիցներից մեկը իր մոտ գտնվող դեռևս չպարզված հրազենով կրակոցներ է արձակել, ապա դիմել են փախուստի։ Իսկ Հայկուհի Ե-ն տեղափոխվել է հիվանդանոց։
Առավել մանրամասն` սկզբնաղբյուրում:
Մայիսի 25-ի գիշերն Ուկրաինան ենթարկվել է հակամարտության սկզբից ի վեր ամենախոշոր օդային հարձակմանը, հաղորդում է Reuters-ը՝ հղում անելով սեփական հաշվարկներին։
Մայիսի 25-ի գիշերը պայթյուններ են լսվել Օդեսայում, Կիևում և Ուկրաինայի Դնեպրոպետրովսկի մարզում։ Աղբյուրի փոխանցմամբ՝ հարձակումների են ենթարկվել նաև Խարկովը, Նիկոլաևը և Տերնոպիլը։ Ուկրաինայի ՆԳՆ ղեկավար Իգոր Կլիմենկոն հայտնել է 12 զոհի և 60 վիրավորի մասին։
Ռուսաստանի պաշտպանության նախարարությունը հայտարարել է, թե հարվածները հասցվում են միայն ուկրաինական ռազմական օբյեկտներին և դրանց հետ կապված ենթակառուցվածքներին։
Ուկրաինայի նախագահ Վլադիմիր Զելենսկին կոչ է արել Միացյալ Նահանգներին արձագանքել գիշերը տեղի ունեցած հարձակմանը։ Այս մասին նա գրել է Telegram ալիքում։
Հայաստանի պաշտպանության նախարարությունը չի հաստատել իշխող կուսակցության պատգամավոր Հայկ Սարգսյանի այն հայտարարությունը, թե խոշոր գործարարների մեծ մասը երեխաներին ազատում էբանակում ծառայելուց:
Ավելի վաղ իշխող «Քաղաքացիական պայմանագիր» խմբակցության պատգամավոր Հայկ Սարգսյանը հայտարարել էր, որ մեծամասամբ հսկայական կարողություն ունեցող և հարկատուների առաջին հազարյակում ընդգրկված ընտանիքների երեխաները բանակ չեն զորակոչվում: Նա նշել էր, որ այդ տեղեկությունը ստացել է ՊՆ ներկայացուցիչների հետ աշխատանքային քննարկումների ընթացքում:
«Պաշտպանության նախարարությունը նման հաշվառում չի իրականացնում։ Այլ տեղեկություններ չունենք», - մեր հարցմանն ի պատասխան հայտնել են ՊՆ-ից։
Հիշեցնենք, որ զինվորական ծառայության մասին փոփոխությունների նախագիծն առաջարկում է պարտադիր զինվորական ծառայություն անցնել ընդամենը 1 ամիս ու վճարել 24 միլիոն դրամ կամ պարտադիր զինվորական ծառայություն անցնել 4 ամիս և վճարել 18 միլիոն դրամ։ Մինչև 16 տարին լրանալը ՀՀ քաղաքացիությունից հրաժարվելու պետական տուրք սահմանել 15 միլիոն դրամ։ Պարտադիր զինվորական ծառայության անցնելու առավելագույն սահմանային տարիք կնախատեսվի 32 տարեկանը։
Օրինագիծը մայիսի 22-ին ստացավ կառավարության դրական եզրակացությունը, այն առաջիկայում կներկայացվի արդեն Ազգային Ժողովի քննարկմանը։
Իրանը ներկայացրել է սեփական արտադրության օդային երթևեկության կատարելագործված ռադար՝ երկրի քաղաքացիական ավիացիայի ոլորտի դեմ ուղղված արտասահմանյան պատժամիջոցների ֆոնին։
Իրանի նախագահ Մասուդ Փեզեշքիանը շաբաթ օրը տեսակապի միջոցով հրահանգել է երկրի հարավ-արևմուտքում գտնվող Աբադանի օդանավակայանում տեղակայել MSSR-Mode S ռադարային համակարգը։
Իրանի տրանսպորտի նախարարության ներկայացուցիչները հայտարարել են, որ կատարելագործված ռադիոլոկացիոն համակարգը կամրապնդի տարածաշրջանում օդային երթևեկության կառավարման ցանցը։
Իրանի օդանավակայանների և օդային նավիգացիայի ընկերության գլխավոր տնօրեն Մոհամմադ Ամիրանին հայտարարել է, որ երկրորդային հսկողության մոնոիմպուլսային ռադիոլոկացիոն համակարգը ամբողջությամբ նախագծվել և արտադրվել է տեղական ընկերությունների կողմից։
Ամիրանին հայտնել է, որ Իրանի կենտրոնական մասում գտնվող Սպահանի տեխնոլոգիական համալսարանի գիտնականներն իրենց ներդրումն են ունեցել նախագծում՝ հավելելով, որ համակարգը կարող է 450 կիլոմետր շառավղով հետևել ներքին և միջազգային չվերթներին։
Ամիրանին ասել է, որ կառավարությունն այս նախագծի վրա ծախսել է շուրջ 6,9 միլիոն եվրո (7,84 միլիոն դոլար)՝ ներմուծման ծախսերը կրճատելով գրեթե 1 միլիոն եվրոյով։
Ֆոտո
