Իրանն ԱՄՆ-ին է փոխանցել ԱՄՆ նախագահ Դոնալդ Թրամփի նամակի պաշտոնական պատասխանը։ Թրամփն իր նամակում պնդել է միջուկային ծրագրի շուրջ նոր համաձայնագրի կնքման անհրաժեշտությունը: Այս մասին հայտնում է IRNA գործակալությունը՝ վկայակոչելով Իրանի արտաքին գործերի նախարար Աբբաս Արաղչիին։
Արաղչիի խոսքով՝ պատասխանը փոխանցվել է «համապատասխան խողովակով»՝ Օմանի միջնորդությամբ։ ԱՄՆ-ին ուղղված նամակում Իրանը ներկայացրել է իր դիրքորոշումը ինչպես ներկա իրավիճակի, այնպես էլ Թրամփի ուղերձի բովանդակության վերաբերյալ:
Իրանի ԱԳ նախարարը կրկին ընդգծել է, որ Թեհրանը բացառում է Վաշինգտոնի հետ ուղիղ բանակցությունների հնարավորությունը, քանի դեռ շարունակվում է պահպանվել «առավելագույն ճնշման» քաղաքականությունը և ռազմական սպառնալիքներ են հնչում:
Իրանի ԱԳ նախարարը հավելել է, որ անուղղակի բանակցությունները կարող են շարունակվել այնպես, ինչպես նախկինում է եղել։
Հիշեցնենք, որ դեռ մարտի 7-ին ԱՄՆ նախագահ Դոնալդ Թրամփը հայտարարել էր, որ նամակ է հղել Իրանի գերագույն առաջնորդ Ալի Խամենեիին և կնախընտրեր իրանական միջուկային ծրագրի հարցով Թեհրանի հետ գործարք կնքել։ Մարտի 25-ին Երևանում ՀՀ ԱԳ նախարար Արարատ Միրզոյանի հետ համատեղ ասուլիսի ժամանակ Իրանի ԱԳ նախարար Աբբաս Արաղչին հայտնել էր, որ Իրանը դեռ չի պատասխանել ԱՄՆ նախագահի նամակին, բայց պատասխանն արդեն պատրաստման փուլում է։ Նա հավելել էր, որ հիմա էլ իրենք եվրոպական 3 երկրի և այլ շահագրգիռ պետությունների հետ բանակցում են միջուկային ծրագրի վերաբերյալ։ Վստահեցրել էր՝ Իրանը երբեք չի լքել բանակցային սեղանը և չի լքի։
0Comments