Սպիտակ տունը հունվարի 9-ին կհայտարարի Ուկրաինային տրամադրվող ռազմական օգնության նոր փաթեթի մասին, հայտնում է Associated Press-ը՝ վկայակոչելով երկու աղբյուրների։
Պաշտոնական հայտարարությունը, ըստ գործակալության, տեղի կունենա ԱՄՆ պաշտպանության նախարար Լլոյդ Օսթինի Գերմանիա այցի ժամանակ։
Այս փաթեթը վերջինը կլինի հեռացող Ջո Բայդենի վարչակազմի համար։ Աղբյուրները նշում են, որ դա «զգալի» կլինի, բայց դժվար թե ներառի բոլոր չորս միլիարդ դոլարները, որոնք ԱՄՆ Կոնգրեսն արդեն հաստատել է Ուկրաինային հատկացնելու համար։
Բայդենի վարչակազմը վերջին շաբաթներին արագացրել է Ուկրաինային ռազմական օգնության մատակարարումը` մտավախություն ունենալով, որ Դոնալդ Թրամփը, վերադառնալով Սպիտակ տուն, կարող է հրաժարվել Կոնգրեսի կողմից Կիևին հատկացված միջոցները փոխանցելուց, որոնք մինչ այդ չեն ծախսվել: Դեկտեմբերի վերջին հայտարարվեց 2,5 միլիարդ դոլար հատկացնելու մասին, որը 2023 թվականի հունվարից ի վեր ամենամեծ փաթեթն է:
0Comments