Երկու երկիր Ռուսաստանին օգնում են շրջանցել պատժամիջոցները․ որոնք են դրանք

Ռուսաստանի դեմ արևմտյան պատժամիջոցները թուլացրել են պատերազմը ֆինանսավորելու նրա կարողությունը: Այդ մասին, ըստ Լրագրի, գրում է EUobserver-ը։

Նշվում է, որ պատժամիջոցներն ամենամեծ վնասը հասցրել են էներգետիկ և բանկային ոլորտներին։ Ռուսաստանի բոլոր խոշոր բանկերը, բացի մեկից, արդեն հայտնվել են սև ցուցակում, իսկ ռուս վարկատուները փակել են 670 գրասենյակ:

Ստեղծված իրավիճակի պատճառով Կրեմլը կփորձի բանկերը վերակապիտալացնել լրացուցիչ 2 տրիլիոն ռուբլու ինֆուզիոնով։ Միաժամանակ, միջազգային ներդրողները քիչ են հետաքրքրված ռուսական պարտատոմսեր գնելու հարցում։

Փաստորեն, ներքին էմիսիան Ռուսաստանում մնացել է միջոցների միակ աղբյուրը։ Հատկապես հաշվի առնելով այն հանգամանքը, որ միջազգային շուկաները հրաժարվում են ռուսական նավթի առևտրից։ «Եվրոպայում նախկինում գնված ծավալների միայն երկու երրորդն է այժմ վերաուղղորդվում զգալի զեղչով՝ մոտ 25 դոլար մեկ բարելի դիմաց»,- ասվում է հաղորդագրության մեջ։

Միևնույն ժամանակ, օգոստոսին ՌԴ-ում նավթի արդյունահանումը կրճատվել է 10%-ով, գազի արդյունահանումը՝ 22%-ով, իսկ պրոֆիցիտը կրճատվել է մինչև ընդամենը 137 մլրդ ռուբլի ամռանը։

Նավթի և նավթամթերքների նկատմամբ ԵՄ էմբարգոն, որն ուժի մեջ կմտնի դեկտեմբերին՝ «նավթի գնի սահմանաչափի» հետ միասին, ակնկալվում է, որ ավելի կնվազեցնի ռուսական արտահանման եկամուտները։ «Բուն պատերազմի և պատժամիջոցների արդյունքում Ռուսաստանը մտել է ռեցեսիա, որը կարող է երկար տևել», – նշել է հրատարակությունը։

Բացի այդ, պատժամիջոցները արգելափակեցին ռուսական արտահանումը Եվրոպա տարեկան 90 միլիարդ եվրոյով, ինչը հանգեցրեց ռուսական պողպատի արտադրության 30%-ով և փայտանյութի արտադրության 90%-ով անկմանը: Այն նաև արգելափակեց տարեկան 30 միլիարդ եվրոյի բարձր տեխնոլոգիաների և արդյունաբերական արտահանումը, ինչը խաթարեց հիմնական սպառողական ապրանքների արտադրությունը, ինչպիսիք են մեքենաները, սառնարանները և լվացքի մեքենաները:

Բացի այդ, ԵՄ-ն սառեցրել է ռուսաստանցիների ակտիվները Եվրոպայում՝ 17,4 մլրդ եվրոյի չափով։ Ռուսաստանում գործող մոտ 3000 օտարերկրյա ընկերությունների մոտ 40%-ն արդեն լքել է ռուսական շուկան կամ գտնվում է գործընթացի մեջ, ինչի հետևանքով 540,000 աշխատատեղ է փակվել:

Ռուսաստանում ռազմական արտադրության հետ կապված խնդիրների մասին է վկայում նաև այն, որ Կրեմլը սկսել է անօդաչու թռչող սարքեր և զինամթերք գնել Իրանում և Հյուսիսային Կորեայում։

Չնայած պատժամիջոցների բոլոր հետևանքներին՝ Ռուսաստանին դեռ հաջողվում է մասամբ շրջանցել սահմանափակումները։ Կրեմլին այս հարցում օգնում են Չինաստանն ու Թուրքիան։

«Չինաստանի արտահանումը Ռուսաստան այս տիրույթի 30 ամենահայտնի ապրանքների (տրանսպորտային սարքավորումներից մինչև էլեկտրական մեքենաներ), որոնք նախկինում ներկրվում էին ԵՄ-ից և ԱՄՆ-ից, ներխուժումից հետո կտրուկ նվազել է, սակայն օգոստոսին նույն ժամանակահատվածի համեմատ աճել է 20%-ով», ասվում է զեկույցում։

Երկրորդ եռամսյակից ի վեր միայն Թուրքիայի արտահանումը Ռուսաստան գրեթե կրկնապատկվել է, իսկ ԵՄ անդամ որոշ երկրների արտահանումը Թուրքիա նույնպես աճել է, ինչը վկայում է պատժամիջոցներից խուսափելու մասին (եվրոպական ապրանքները Թուրքիայից վերարտահանվում են Ռուսաստան):

Ղազախստանը նույնպես օգնում է Մոսկվային, իսկ ԵՄ-ի արտահանումը Ղրղըզստան սեպտեմբերի 5-ից 18-ն ընկած ժամանակահատվածում գրեթե չորս անգամ աճել է նախապատերազմյան շրջանի համեմատ։

Բացի այդ, Կրեմլը փորձում է մասնակիորեն ծածկել դեֆիցիտը և շրջանցել պատժամիջոցները համակարգիչների, սմարթֆոնների, սպառողական էլեկտրոնիկայի, ավտոպահեստամասերի և նույնիսկ Lego ապրանքների «զուգահեռ ներմուծման» միջոցով՝ առանց հեղինակային իրավունքի սեփականատերերի թույլտվության։