Գերմանիան կմիջամտի, եթե գազի օպերատորները բավարար չափով չլցնեն պահեստները՝ նոր պահանջները բավարարելու համար, քանի որ կառավարությունը հաջորդ ձմռանը մատակարարումներ ապահովելու ավելի կոշտ դիրքորոշում է ընդունում, գրում է Bloomberg-ը:
Համաձայն նոր կանոնների, որոնք հաստատվել են խորհրդարանի վերին պալատի կողմից ուրբաթ օրը եւ ուժի մեջ են մտել մայիսի 1-ից, օպերատորները պետք է մինչեւ նոյեմբերի 1-ը լրացնեն պահեստները 90 տոկոսով։ Ներկայումս դրանք լցված են 26 տոկոսով։
Ներկայիս օրական 0,3-0,5 տոկոսային կետով համալրումը նշանակում է, որ պահեստները լրացնելը կարող է տեւել մինչեւ հոկտեմբերի վերջ։ Այս մասին ասել է էկոնոմիկայի նախարար Ռոբերտ Հաբեքը։ Նա նշել է, որ եթե ամառվա ընթացքում բավարար առաջընթաց չգրանցվի, կառավարությունը քայլեր կձեռնարկի։
Նոր օրենքն ընդունվել է որպես Բեռլինի պատասխան՝ Ուկրաինայում տիրող իրավիճակի հետ կապված էներգետիկ անվտանգության մտահոգությունների ֆոնին։ Գերմանիայի կանցլեր Օլաֆ Շոլցի կառավարությունը հայտարարել է, որ մինչեւ 2024թ․ կեսերը ցանկանում է նվազեցնել ռուսական գազի մասնաբաժինը մինչեւ վառելիքի ներմուծման ընդհանուր ծավալի մոտ 10 տոկոսը՝ ներկայիս մոտ 40 տոկոսից։ Օրենքի համաձայն՝ մինչեւ հոկտեմբերի 1-ը պահեստը պետք է լցված լինի 80 տոկոսով եւ մինչեւ փետրվարի 1-ը կարող է իջնել մինչեւ 40 տոկոսի:
0Comments