Թեհրանն ունի միջուկային զենք ստեղծելու տեխնիկական հնարավորություններ, սակայն նման խնդիր կառավարության օրակարգում չկա։ Այս մասին երկուշաբթի հայտարարել է Իրանի Ատոմային էներգիայի կազմակերպության (AEOI) ղեկավար, փոխնախագահ Մոհամմադ Էսլամին, գրում է ՏԱՍՍ գործակալությունը։
«Իրանն ունի ատոմային ռումբ ստեղծելու տեխնիկական հնարավորություն, սակայն նման ծրագիր օրակարգում չկա»,- մեջբերում է նրա խոսքերը Fars գործակալությունը։
AEOI-ի ղեկավարը նշել է, որ մեղադրանքներն առ այն, որը Թեհրանը ձգտում է միջուկային զենք ստեղծել, անհիմն են։
«Այդ կեղծ մեղադրանքները Իսրայելի կողմից հնչում են հակահեղափոխական ուժերի աջակցությամբ՝ հասարակական կարծիքը փոխելու նպատակով»,- ասել է նա։
«Մեր բոլոր գործողությունները (միջուկային ծրագրի մշակման համար) իրականացվում են ՄԱԳԱՏԷ-ի վերահսկողության ներքո գտնվող Միջուկային զենքի չտարածման պայմանագրի շրջանակում»,- ասել է նա։
Հուլիսի 22-ին ՄԱԳԱՏԷ-ի տնօրեն Ռաֆայել Գրոսին ասել էր, որ Իրանի միջուկային ծրագիրը 2015 թվականից ի վեր զգալի առաջընթաց է գրանցել։ Նրա խոսքով՝ ոչ մի երկիր, որը չունի ռազմական մշակումներ, մինչև 60 տոկոս ուրան չի հարստացնում, ինչպես որ դա անում է իրանական կողմը։ Սակայն Գրոսին հավելել է, որ Թեհրանի կողմից միջուկային համաձայնագրով ստանձնած պարտավորությունների աստիճանական հրաժարումը չի նշանակում, որ Իրանը զբաղվում է միջուկային զենքի ստեղծմամբ։
0Comments