Գեղեցկության ֆրանսիական բաղադրատոմսը. ինչպես կիրառել

ELLE.ru-ն ներկայացնում է գեղեցկության դասեր ֆրանսուհիներից:

Կանոն #1. Լինել առավելագույնս բնական

Մաշկը խնամելը շատ ավելի կարևոր է, քան թաքնվելը դիմահարդարման մի քանի շերտերի տակ: Նրանք գիտեն՝ գոյություն չունի «ճիշտ» կամ «սխալ» գեղեցկություն: Շատ ավելի կարևոր է, թե դու ինքդ ինչպես ես քեզ զգում, քան, թե ինչպես է շրջապատը քեզ ընկալում: Այնուամենայնիվ, բնական տեսքը պահանջում է մանրակրկիտ աշխատանք: Մասնագիտական կոսմետիկ պրոցեդուրաները ցանկացած փարիզուհու համար կենսական անհրաժեշտություն են, այլ ոչ թե շքեղություն:

Կանոն #2. Ոչ մի դիետա

«Ամեն առավոտ ես հաճույքով կարագ եմ քսում բագետի վրա և ջեմ՝ կրուասանի»,- ELLE-ին տված հարցազրույցում խոստովանել է Ջեյն Բիրկինի դուստրը՝ դերասանուհի Լու Դուայոնը: Ոչ մի ֆրանսուհի դիետա չի պահում: Դիետաների արդյունքը ոչ միայն կարճաժամկետ է, այլև վնասում է մաշկը: Գեղեցիկ կազմվածքի գաղտնիքը փոքր չափաբաժիններն են: Ֆրանսուհիները ուտում են այն, ինչ ցանկանում են, սակայն փոքր չափաբաժիններով:

Կանոն #3. Bedroom look կամ անկողնային սանրվածք

«Մի կողմ դրեք ձեր ֆենը»,- նման խորհուրդ կտա ձեզ ոչ միայն ոճի խորհրդանիշ Կարոլին դե Մեգրեն, այլ նաև Մարսելի կամ Նիցցայի ցանկացած բնակչուհի: Պառկեք քնելու խոնավ վարսերով և առավոտյան մի սանրվեք:

Կանոն #4. Իդեալական օծանելիք

Գտեք ձեր կատարյալ օծանելիքը մինչև երեսուն տարեկանը: Եվ հետո օգտագործեք միայն դա: Բուրմունքը պետք է դառնա Ձեր այցեքարտը՝ ճանաչելի և անմոռանալի: Բայց ֆրանսուհիների գաղտնիքն է նաև այն, թե որտեղ է պետք ցողել օծանելիքը: Օրինակ՝ կոճերին, ծնկի ետևում, ուսերին, ձեռքի մատների արանքում, անրակին և վարսերի երկայնքով:

Կանոն #5. Կարմիր շուրթեր

Այո, նրանք սիրում են բնականությունը, բայց կարմիր շուրթերն իսկական ֆետիշ են դարձել ֆրանսուհիների համար: Խորհուրդ. եթե ցանկանում եք կարմիր շրթներկ օգտագործել, կարող եք նաև տուշ օգտագործել: Դիմահարդարման մյուս պարագաները ցանկալի չեն. շուրթերը պետք է ուշադրության կենտրոնում լինեն:

Կանոն #6. Մանկական հնարքներ

Բացի այն, որ ֆրանսուհիներն իրենց կոսմետիկ պարագաները գնում են դեղատներից, նրանց սիրելի բաժանմունքներից մեկը մանկական լոսյոնների հատվածն է: Լայֆհաք, որով կիսվել է Լետիցիա Կաստան. օգտագործել նշի յուղ՝ մարմնի համար: Սուպերմոդելն այս հայտնագործությունն արել է հղիության ընթացքում և այժմ անընդհատ խնամում է ձեռքերի և ամբողջ մարմնի մաշկը նշի յուղով:

Կանոն #7. Սառը ջուր

Ֆրանսիացիները քաջատեղյակ են սառը ջրի առավելություններին, ինչը խթանում է արյան շրջանառությունը (և դա լավագույնս արտացոլվում է մաշկի վրա): Այսպիսով, հարցազրույցում դերասանուհի Լեա Սեյդուն խոստովանել է, որ նույնիսկ հանգստացնող լոգանքից հետո միշտ սառը ցնցուղ է ընդունում: Այս խորհուրդը կօգնի մաշկը լավ վիճակում պահել: