Արդեն երրորդ օրն է, ինչ Թուրքիայում շարունակվում են ընդդիմության զանգվածային հանրահավաքներն ու երթերը։ Ցույցերը ցրելու համար ոստիկաններն ավելի հաճախ են մահակներ, արցունքաբեր գազ և ջրցան մեքենաներ կիրառում։ Թուրքիայի նախագահ Ռեջեփ Թայիփ Էրդողանը հայտարարել է, որ իշխանությունները աչք չեն փակի «փողոցային ահաբեկչության» վրա:
«Հետևելով մարգինալ խմբերին, հարձակվելով մեր ոստիկանության վրա, սպառնալով մեր դատավորներին և դատախազներին, մարտահրավեր նետելով ժողովրդավարությանը և ազգային կամքին, դիմելով ապօրինի և ոչ ժողովրդավարական միջոցների՝ այս երկրում ոչնչի չի կարելի հասնել: Թուրքիան «փողոցում գտած» երկիր չէ և չի ընկրկի փողոցային ահաբեկչության առաջ», - ըստ թուրքական լրատվամիջոցների՝ ասել է Էրդողանը։
Նա ընդգծել է, որ կառավարությունը չի հանդուրժի «Թուրքիային ահաբեկելու» փորձերը։
«Կցանկանայի հայտարարել, որ չենք հանդուրժի Թուրքիան ահաբեկելու և երկրի անդորրը խաթարելու, մեր ժողովրդի կայունության դեմ ոտնձգությունների որևէ փորձ։ ԺՀԿ-ի ղեկավարի՝ փողոց դուրս գալու կոչը փակուղային է», – հայտարարել է Թուրքիայի նախագահը։
Էրդողանը, առաջին անգամ մեկնաբանելով Իմամօղլուի ձերբակալության պատճառով ստեղծված իրավիճակը, հայտարարել է ընդդիմության կողմից ոստիկանության և արդարադատության նկատմամբ քաղաքական ճնշման փորձերի մասին:
Թուրքիայում իրավիճակը սրվել է մարտի 19-ին՝ կոռուպցիայի վերաբերյալ խոշոր գործի շրջանակներում Ստամբուլի քաղաքապետ, ընդդիմադիր Ժողովրդահանրապետական կուսակցության անդամ Էքրեմ Իմամօղլուի ձերբակալությունից հետո: Տրվել են նաև ավելի քան 100 մարդու ձերբակալման օրդերներ։ ԺՀԿ-ի ղեկավար Օզգուր Օզելը դա որակել է հեղաշրջման փորձ՝ Իմամօղլուի ձերբակալությունը մեկնաբանելով որպես ընտրություններում իր գլխավոր ընդդիմախոսից Էրդողանի ազատվելու ձգտում: Հետևելով ԺՀԿ-ի կոչին, ի աջակցություն Իմամօղլուի, քեմալիստական կուսակցության հազարավոր կողմնակիցներ դուրս են եկել փողոց։
0Comments