Ազգային ժողովի «Իմ քայլը» խմբակցությունը մարտի 1-ի երթին խմբակցության մասնակցության ձևաչափը հստակեցնելու համար աշխատանքային խումբ է ստեղծել: Ինչպես ԱԺ-ում լրագրողների հետ ճեպազրույցում հայտնեց խմբակցության քարտուղար Հակոբ Սիմիդյանը՝ նման որոշում է կայացվել խմբակցության նիստում:
«Նիստում հիմնականում քննարկեցին մարտի 1-ի երթի համար խմբակցության անելիքների վերաբերյալ հարց: Սակայն, քանի որ խմբակցությունը մեծ է, ստեղծեցինք աշխատանքային խումբ, որն արագ կմշակի մասնակցության ձևաչափը: Աշխատանքային խումբը կհավաքի առաջարկները և կորոշենք»,-ասաց Սիմիդյանը:
Նա նշեց՝ մասնակցության վերաբերյալ պատգամավորների առաջարկներն ու կարծիքները շատ են եղել: Աշխատանքային խումբը առաջարկների կոնտեքստում ի մի կբերի՝ պաշտոնապես հայտարարում են, որ ողջ խմբակցությունով են մասնակցելու երթին, թե ով ինչպես կորոշի:
«Սա հիշատակի երթ է: Երկրորդ հերթին պետք է կարևորենք, որ Հայաստանում քաղաքական գործընթացների պատճառով որևէ մարդ կյանքի իրավունքից չզրկվի կամ առհասարակ որևէ իրավունք չոտնահարվի»,-նշեց Սիմիդյանը:
Երթը կսկսվի մարտի 1-ին ժամը 18։30-ին Ազատության հրապարակից:
Հայաստանի Հանրապետության վարչապետ Նիկոլ Փաշինյանն ավելի վաղ քաղաքացիներին հրավիրել էր 2019 թվականի մարտի 1-ին քաղաքացիական հզոր երթով շարժվել Ազատության հրապարակից դեպի Մյասնիկյանի արձան: Նա հայտնել է նաև, որ այդ օրը հարգանքի տուրք կմատուցվի 2008 թվականի մարտի 1-ի 10 զոհերի և ընդհանրապես քաղաքական բռնության բոլոր զոհերի հիշատակին:
0Comments