Պեկինում գործում է եզակի ռեստորան՝ ROBOT RESTAURANT-ը, որն այցելուներին առաջարկում է գաստրոնոմիական փորձի նոր մակարդակ՝ համատեղելով առաջադեմ ռոբոտատեխնիկական տեխնոլոգիաները և մշակութային ինտերակտիվ ժամանցը։ Հաստատությունը գտնվում է Պեկինի AI Robot Park-ում (E-Town) և դիրքավորվում է որպես ֆուտուրիստական տարածք՝ «խելացի սննդի» համար։ 

ROBOT RESTAURANT-ում հյուրերը կարող են շփվել բազմազան ռոբոտների հետ։ Դրանց թվում են՝ ռոբոտ-բարմենը, որը դիմավորում է այցելուներին և անկաշկանդ զրույցներ է վարում, բազմալեզու «Սյաո Ցի» ռոբոտը, որը կարող է շփվել յոթ լեզվով, ինչպես նաև «Լի Բայ» և «Սու Շի» ռոբոտները, որոնք բանաստեղծություններ են կարդում և կատակերգական համարներ ցուցադրում։ Հատուկ ուշադրություն է գրավում «Նյուտոն» ռոբոտը, որը ֆիզիկական տեսությունների միջոցով բացատրում է ուտեստների պատրաստման գիտական հիմքերը։ 

Հաստատությունը համալրված է տարբեր ռոբոտացված համակարգերով. ռոբոտ-բարիստան ստեղծում է լատտե-արտ, բաբլ-թիի ռոբոտը (bubble tea) անփոփոխ որակով և արագությամբ է պատրաստում ըմպելիքները, իսկ մեխանիկական ձեռքը ճշգրիտ կերպով ավելացնում է մրգեր, սառույց և այլ բաղադրիչներ։ Բացի այդ, հյուրերը կարող են համտեսել սմուզիներ և պանրային փրփուրով ըմպելիքներ, որոնք պատրաստված են ռոբոտների կողմից։ 

Ռեստորանի ճաշացանկը համատեղում է տեխնոլոգիականությունն ու գաստրոնոմիական նորարարությունները։ Հանրաճանաչ ուտեստների թվում են՝ «Alpha | Core Beef Burger Combo», «Omega | Cold Fish Core Processor» և «Cheese Burst Gravity Loader»: Սպասարկող և վերամշակող ռոբոտներն օգնում են պահպանել ծառայության բարձր մակարդակը։ Երկրորդ հարկում բաց է ռոբոտացված սպառողական ապրանքների թեստավորման գոտի, որտեղ այցելուները կարող են ծանոթանալ նորույթներին և ընդլայնել իրենց տեխնոմշակութային փորձը։ 

Ռեստորանի դիզայնը լիովին արտացոլում է տեխնոլոգիական և ֆուտուրիստական ոճը. այն համատեղում է մարդու և մեքենայի փոխազդեցությունը, խելացի ողջույնի համակարգերը և ինտերակտիվ տարրերը՝ եզակի տարածք ստեղծելով ժամանակակից և հետաքրքրաշարժ գաստրոնոմիական փորձի համար։

Խորեն Գրիգորյան Պեկինից