Հայաստանում նախատեսվում է ընդլայնել բիզնեսի համար հարկային արտոնությունները, եթե նրանք դպրոցներին, բուհերին, ինչպես նաև զինծառայողների կյանքի և առողջության ապահովագրության հիմնադրամին նվիրատվություններ անեն: «Քաղաքացիական օրենսգրքում» նախատեսված համապատասխան այս փոփոխությունների նախագիծը ներկայացվեց ԱԺ քննարկմանը:

ՀՀ էկոնոմիկայի նախարար Գևորգ Պապոյանը հայտնեց, որ շահութահարկից ազատված նվիրատվությունների ծավալը կավելանա 10 անգամ: Ընկերությունները կկարողանան առանց հարկային պարտավորությունների նշված հաստատություններին փոխանցել նախորդ տարվա իրենց շրջանառության մինչև 2.5%-ի չափով տեխնիկա կամ ֆինանսական միջոցներ՝ ներկայիս 0.5%-ի փոխարեն:

Ըստ նախարարի՝ եթե կառավարությունը համոզվի, որ հարկային արտոնությունների ընդլայնումը հարկերից խուսափելու սողանցք չի դառնա, այդ մեխանիզմը կարող է տարածվել նաև այլ ոչ առևտրային հաստատությունների վրա՝ մշակութային, մարզական և այլն: