Մենք պետք է շարունակենք սահմանազատման գործընթացը Ալմա-Աթայի հռչակագրի հիման վրա ճշգրիտ այնպես, ինչպես նշված է Հայաստանի Հանրապետության և Ադրբեջանի Հանրապետության միջև սահմանազատման հանձնաժողովների համատեղ գործունեության կանոնակարգում, որը Հայաստանի և Ադրբեջանի միջև կնքված և վավերացված առաջին երկկողմ միջազգային փաստաթուղթն է։ Այս մասին Քաղաքացիական պայմանագիր» կուսակցության 7-րդ համաժողովում ասել է ՀՀ վարչապետ Նիկոլ Փաշինյանը:

«Բազմիցս եմ ասել, որ մեր օկուպացված տարածքների խնդրի լուծումը, ինչպես պատկերացրել, այնպես էլ պատկերացնում ենք այս պրոցեսի շրջանակում, այն սկզբունքների շրջանակում, որը հիշատակեցի և որոնց մասին ասել եմ: Անվտանգությունը նաև տարածաշրջանի տրանսպորտային կոմունիկացիաների բացումն է, ապաշրջափակումը և «Թրամփի ուղի. հանուն միջազգային խաղաղության և բարգավաճման» նախագիծը մեզ հնարավորություն է տալու ինտեգրվել աշխարհին, երկաթուղային կապ ունենալ Հայաստանի տարբեր հատվածների, բայց և Իրանի Իսլամական Հանրապետության, Ռուսաստանի Դաշնության, Չինաստանի, Կենտրոնական Ասիայի հետ և դառնալ խաղաղության խաչմերուկ»,-նշել է Փաշինյանը։ 

Փաշինյանն առաջարկել է ծափահարել ԱՄՆ նախագահ Դոնալդ Թրամփին՝ իր աջակցության և Ադրբեջանի հետ խաղաղության հաստատման ջանքերի, իր ջանքերի համար։ Դահլիճը ծափահարել է, այնուհետև վարչապետը շարունակել է խոսքը՝ ապաշրջափակման մասին: 

«Թուրքիայի հետ մեր ակտիվ երկխոսությունը վստահություն է տալիս, որ մենք առաջիկայում կունենանք նաև ցամաքային տրանսպորտային հաղորդակցություն Թուրքիայի, այսպիսով նաև Եվրոպական Միության հետ։ Սա նույնպես վճռական և կարևոր գործոն է, առավել ևս, եթե հաշվի առնենք, որ այս տարի ընդունեցինք և Հանրապետության նախագահի կողմից վավերացնելուց հետո ուժի մեջ է «Եվրոպական Միությանը Հայաստանի անդամակցելու գործընթացի մեկնարկի մասին» օրենքը, և մենք արդեն ակտիվացրել ու ակտիվացնելու ենք մեր ջանքերը այս ուղղությամբ»,-նշել է Նիկոլ Փաշինյանը, հավելելով՝ օրենքը լրացուցիչ երաշխիք է, որ մենք՝ կառավարող մեծամասնությունը ավելի կակտիվացնի իր ջանքերը ժողովրդավարական բարեփոխումների, օրենքի առաջ բոլորի հավասարության, հակակոռուպցիոն պայքարի ուղղությամբ։