Նա նշել է, որ որոշ մեկնաբանություններ հիմնված են կեղծ տեղեկատվության վրա և կարող են ուղղված լինել Հարավային Կովկասի երկրների հետ Իրանի հարաբերությունների վատթարացմանը: Թեհրանը կարծում է, որ տարածաշրջանում հաղորդակցությունների ապաշրջափակման հարցին պետք է ուշադիր և նրբանկատորեն մոտենալ:

Արտաքին միջամտության հարցը շարունակում է կարմիր գիծ մնալ Թեհրանի համար։ «Մենք որևէ կերպ օգտակար չենք համարում արտաքին միջամտությունը և արտատարածաշրջանային ուժերի ներկայությունը և կարծում ենք, որ այդ հարցը աշխարհաքաղաքական բարդություններ կառաջացնի»,- ասել է Բաղային:

Ընդ որում, նա ասել է, որ պաշտոնական Երևանը հավաստիացրել է, որ Հայաստանի հարավում (Իրանի հետ սահմանի մոտ՝ խմբ․) երկաթու վերակառուցումն իրականացվելու է հայկական ընկերությունների և Հայաստանի օրենսդրության համաձայն գրանցված ամերիկյան ընկերության մասնակցությամբ, և ոչ մի օտարերկրյա զորք չի տեղակայվելու սահմանների երկայնքով:

ԱԳՆ ներկայացուցիչը նաև անդրադարձել է Հայաստանի և Ադրբեջանի միջև խաղաղության համաձայնագրի 12-րդ հոդվածին ու հայտարարել. «Ըստ այդ հոդվածի՝ օտարերկրյա զինված ուժեր չեն տեղակայվելու Հայաստանի և Ադրբեջանի սահմանների երկայնքով»:

«Մենք շատ զգայուն ենք այս հարցի նկատմամբ, և Հայաստանն ինքը գիտակցում է օտարերկրյա զինված ուժերի ներկայության հետևանքները», - հավելել է նա:

Հարցազրույցի ավարտին ԱԳՆ ներկայացուցիչը ևս մեկ անգամ ընդգծել է. «Մենք լավ հարաբերություններ ունենք Հարավային Կովկասի երկրների հետ և կարծում ենք, որ այդ տարածաշրջանի կայունությունն ու անվտանգությունը կարևոր են մեզ համար»:

Բաղային հավելել է, որ Իրանը պատրաստ է քայլեր ձեռնարկել տարածաշրջանի երկրների հետ երկկողմ հարաբերություններն ու համագործակցությունն ամրապնդելու համար և աջակցել ցանկացած գործողության, որը կամրապնդի տարածաշրջանի կայունությունն ու անվտանգությունը:

Հիշեցնենք` ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը օգոստոսի 8-ին Վաշինգտոնում ստորագրեցին նաև 7 կետից բաղկացած համատեղ հռչակագիր, որով նախատեսվում է Հայաստանի հարավային հատվածով (Սյունիքի մարզ) ռազմավարական տարանցիկ ճանապարհ ստեղծել, որը կկոչվի «Թրամփի ուղի» (TRIPP) և Ադրբեջանին առևտրային հասանելիություն կապահովի դեպի Նախիջևան: ԱՄՆ–ն ճանապարհը վարձակալում է 99 տարով` ևս 99 տարով երկարաձգելու հնարավորությամբ։

Հայաստանի և Ադրբեջանի արտգործնախարարներ Արարատ Միրզոյանն ու Ջեյհուն Բայրամովն էլ Հայաստանի, Ադրբեջանի և ԱՄՆ ղեկավարների ներկայությամբ նախաստորագրեցին «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։