Թուրքիայի հայրենասիրական կուսակցության նախագահ Դողու Փերինչեքը իրանական Mehr գործակալությանը տված հարցազրույցում հայտարարել է, որ «Զանգեզուրի միջանցքը ամերիկա-իսրայելական նախագիծ է, որը սպառնում է տարածաշրջանային երկրների, մասնավորապես՝ Թուրքիայի և Իրանի անվտանգությանը»։ 

Նա ընդգծել է, որ նախագիծը «սպառնալիք է Թուրքիայի և Իրանի անվտանգությանը»՝ ընդգծելով տարածաշրջանի երկրներին միավորելու անհրաժեշտությունը՝ «արտաքին միջամտությանը դիմակայելու համար»։

«Ինչի՞ համար է այս միջանցքը։ Այն խոչընդոտում է Հարավային Կովկասի, այսինքն՝ Իրանի, կապը այնպիսի երկրների հետ, ինչպիսիք են Հայաստանը, Վրաստանը և Ռուսաստանը։ Այդ միջանցքը ամերիկա-իսրայելական նախագիծ է և, անշուշտ, լուրջ սպառնալիք է Թուրքիայի անվտանգության համար։

Ինչն է սպառնում Թուրքիային։ Իհարկե, Իսրայելն ու Ամերիկան։ Ամերիկայի և Իսրայելի ցանկացած գործողություն սպառնում է Թուրքիային։ Ահա թե ինչու մեր կուսակցությունը մտահոգված է այդ հարցով։ Մենք տեսնում ենք, որ Թուրքիան շրջապատված է Միացյալ Նահագներով՝ Եգեյան ծովից և Արևելյան Միջերկրական ծովից մինչև Սիրիայի հյուսիս և Իրաք, իսկ այժմ քննարկվում է Իսրայելի և Ամերիկայի ներկայության հարցը Կովկասում։ Ահա թե ինչու Զանգեզուրի միջանցքը լուրջ սպառնալիք է Թուրքիայի համար, և մեր կուսակցությունը դեմ է այդ նախագծի իրականացմանը։

Զանգեզուրի միջանցքը կապող օղակ է Արևելքի և Արևմուտքի, ինչպես նաև Արևմուտքի և Արևելքի միջև։ Բայց եթե այդ կապն օգտագործվի Հարավի և Հյուսիսի միջև կապերը խզելու համար, ապա այդ միջանցքը կարող է նաև դառնալ պատ, որը խոչընդոտում է Իրանի և Զանգեզուրի միջանցքում գտնվող երկրների միջև հարաբերություններին։ Հետևաբար, այդ միջանցքը նախագիծ է Իրանի և Թուրքիայի տնտեսական անվտանգության դեմ։

Լավագույն լուծումն է միավորել տարածաշրջանի երկրները ընդդեմ Ամերիկայի և Իսրայելի։ Տարածաշրջանի որ երկրները։ Իրանը, Թուրքիան, Ադրբեջանն ու Հայաստանը, Վրաստանն ու Ռուսաստանը, և նույնիսկ Ղազախստանը։ Հարավային և Հյուսիսային Կովկասի այդ երկրները պետք է ինքնուրույն լուծում գտնեն՝ իրենց տնտեսական անվտանգությունը պահպանելու համար։ Լուծումը ամերիկա-իսրայելական միջամտությունը դադարեցնելն է»,- հայտարարել է թուրք քաղաքական գործիչը։