ԱՄՆ նախագահ Դոնալդ Թրամփը հայտարարել է, որ ԱՄՆ-ն կարող է կրկին հարվածել Իրանին, եթե Թեհրանը փորձի վերականգնել միջուկային ներուժը։ Այս մասին նա հայտարարել է օգոստոսի 6-ին Սպիտակ տանը՝ լրագրողների հետ զրույցում։ 

«Դե, մենք դադարեցրինք Մերձավոր Արևելքի պատերազմները՝ կանխելով Իրանի կողմից միջուկային զենքի ստացումը», - ասել է նա։ «Նրանք կարող են ասել, որ ամեն ինչ սկսելու են նորից, բայց դա շատ վտանգավոր քայլ կլինի նրանց համար, քանի որ մենք կվերադառնանք», - ասել է նա։ 

«Հենց որ նրանք սկսեն, մենք կվերադառնանք։ Եվ կարծում եմ՝ նրանք դա հասկանում են», - եզրափակել է Թրամփը։

Հունիսի 13-ի գիշերը Իսրայելը ռազմական գործողություն է սկսել Իրանի դեմ։ Մեկ օրից պակաս ժամանակահատվածում իսլամական հանրապետությունը պատասխան հարձակում է իրականացրել։ ԱՄՆ-ը հակամարտությանը միացել է դրա սրումից ինը օր անց և հարվածներ է հասցրել Ֆորդոյում, Նաթանզում և Սպահանում գտնվող Իրանի միջուկային օբյեկտներին։ Հունիսի 23-ի երեկոյան Իրանը հարձակվել է Մերձավոր Արևելքում ԱՄՆ-ի ամենամեծ ռազմաօդային բազայի՝ Կատարում գտնվող Ալ-Ուդեյդի վրա։ Դրանից հետո ԱՄՆ նախագահ Դոնալդ Թրամփը հայտարարել է, որ Իսրայելն ու Իրանը համաձայնության են եկել։ Հրադադարի ռեժիմն ուժի մեջ է մտել հունիսի 24-ին։