Կամբոջական զորքերի կողմից Թաիլանդի ուղղությամբ արձակված հեռահար արկերն ընկել են հարևան Լաոսի տարածք: Այս մասին հայտարարել է Թաիլանդի ցամաքային զորքերի մամուլի ծառայության ղեկավար գեներալ-մայոր Վինտհայ Սուվարին։

Նա հավելել է, որ Լաոսում արկերի ընկնելու վայրերը հայտնաբերվել և արձանագրվել են:

«Դա այդքան էլ նման չէ պատահականության, պատահաբար շատ դժվար է այդքան շատ վրիպել», - ասել է Սուվարին:

Նա նշել է, որ Լաոսի սահմանը բախումների վայրից այնքան էլ հեռու չէ, բայց այնքան մոտ չէ, որ արկերը պատահաբար մի քանի անգամ անընդմեջ ընկնեն Լաոսի տարածք:

«Եթե պատահական չէ, ուրեմն դա արդեն խաղ է առանց կանոնների: Դա ամենևին էլ ջենտլմեն զինվորների արարք չէ», - հավելել է ցամաքային զորքերի պաշտոնական ներկայացուցիչը՝ նշելով, որ Լաոսի տարածքի գնդակոծումը կարող էր կամբոջացի զինվորականների սադրանք լինել՝ ուղղված Թաիլանդի և Լաոսի միջև հարաբերությունները սրելուն։

Հիշեցնենք` Թաիլանդի և Կամբոջայի միջև հարաբերությունները վատթարացան մայիսի 28-ին սահմանի վիճելի հատվածում երկու երկրների զինծառայողների միջև տեղի ունեցած բախումից հետո, որի հետևանքով կամբոջացի զինվորական մահացավ:

Թաիլանդի և Կամբոջայի սահմանին իրավիճակը կտրուկ սրվեց հուլիսի 24-ին։

Այս երկրները տարածքային խնդիրները «ժառանգություն» են ստացել գաղութային Ֆրանսիական Հնդկաչինից, որի հետ սահմանազատումը Սիամի թագավորությունը (այժմ՝ Թաիլանդ) ավարտեց 1907-ին։ Սահմանի որոշ հատվածներ դժվարամատչելի լինելու պատճառով դուրս են մնացել ֆրանսիական կողմի սահմանազատման հանձնաժողովի ուշադրությունից։ Երբ 1953-ին Կամբոջան անկախացավ Ֆրանսիայից, այդ տարածքները դարձան տարածքային վեճի առարկա։