«Ժողովուրդ» օրաթերթը գրում է. «Վրաստան-Հայաստան ֆուտբոլային խաղի ընդհանուր հաշվով 9:1 պարտությունը էլի զայրացրել է հայ ֆուտբոլասերներին, բայց պետք է իրավիճակին սթափ աչքով նայել եւ արձանագրել, որ մոտ ապագայում դեռ մենք չենք էլ կարող երազել լավ ֆուտբոլի մասին: Առաջիկայում հիմնական խաղացողները պետք է լինեն հետհեղափոխական մարզումներ անցած եւ արդեն տապալում արձանագրած ֆուտբոլիստները: Ինչո՞ւ. խոսե՛նք փաստերով:

«Ժողովուրդ» օրաթերթը ուսումնասիրեց աղյուսակները եւ պարզեց, որ Հայաստանի 17, 19 եւ 21 տարեկանների հավաքականների խաղերից Եվրո 25-ի խմբային որակավորման խաղերում բոլոր երեք տարիքայիններն էլ զբաղեցրել են վերջին հորիզոնականները, երեքը միասին կրել են 14 պարտություն, 2 ոչ-ոքի եւ 0 հաղթանակ: (Տե՛ս սանդղակի լուսանկարը): Սա նշանակում է, որ մեր ֆուտբոլի ապագան համարվող հավաքականները միայն այս մրցելույթներում բաց են թողել 42 գնդակ, խփել՝ միայն 4-ը: Սա այն սերունդն է, որի ուղղակի պատասխանատուն ֆուտբոլային հենց այս իշխանություններն են՝ հետհեղափոխական Հայաստանում պատրաստված ֆուտբոլիստները:

Այսինքն՝ առաջիկա տարիներին նրանցից պետք է համալրվի հայկական հավաքականը: Թե ինչ են արել ՀՖՖ-ում, որ երեխաները ֆուտբոլում հաջողելու փոխարեն արդյունք չունեն, թերեւս զբաղվեն իրավապահները, հարցեր տան վերջապես, թե ուր են ԲԿՄԱ-ում հայտնված «տաղանդավոր ֆուտբոլիստները», կամ գոնե՝ ինչպես են նրանք հայտնվել բանակային ֆուտբոլի թիմում ու, ըստ էության, ազատվել բանակից:

Ահա հենց այս իրողությունները հաշվի առնելով է, որ Մելիքբեկյան-Նիկողոսյան զույգի գործողությունների ու անգործության մասին առաջիններից մեկը խոսել է «Ժողովուրդ» օրաթերթը եւ ներկայացրել փաստեր, որ Նիկոլ Փաշինյանը ժամ առաջ պարտավոր է կազմակերպել իր հովանավորյալների հեռացումը՝ հայկական ֆուտբոլը աղետից փրկելու համար:

Տարիներ շարունակ ականջալուր չեղան մեր հրապարակումներին(Ֆուտբոլային կրքերը չեն հանդարտվում),(Հայկական ֆուտբոլն անդունդ գլորող Արմեն Մելիքբեկյանն իշխանությունից թույլտվություն է ստացել), (Մելիքբեկյանի շուրջ օղակը սեղմվում է), ու արդյունքը համազգային սպորտային նվաստացումն էր Երեւանում եւ Թբիլիսիում: Եվ ամենաողբերգականն այն է, որ այդ խայտառակությանը հետեւում էր անձամբ երկրի ղեկավարը իր նախարարներով ու մերձավորներով:

2050 թ.-ին աշխարհի ու Եվրոպայի առաջնության մրցանակային տեղ խոստացած Նիկոլ Փաշինյանը միայն հիմա իր աչքերով տեսավ, որ իր թերթի սպորտային լրագրող Արմեն Նիկողոսյանն ու ՀՖՖ նախագահ «ընտրված» Արմեն Մելիքբեկյանն այս տարիների ընթացքում, մեղմ ասած, խաբել ու զբաղվել են ամեն ինչով՝ բացի ֆուտբոլը զարգացնելուց:

«Ժողովուրդ» օրաթերթի՝ ՀՖՖ-ին մոտ կանգնած աղբյուրները հայտնում են, որ հայկական ֆուտբոլում բարոյահոգեբանական վիճակը խայտառակ ծանր է, իրար հետեւից հեռացող խոշոր ներդրողներին ամենայն հավանականությամբ կհետեւեն նորերը, եւ նորմալ չէ, երբ իշխանությունները չեն արձագանքում երկրի չեմպիոն «Փյունիկ»-ի արդեն նախկին սեփականատեր Արթուր Սողոմոնյանի հեռանալուն, չեն արձագանքում Գյումրու «Շիրակի»-ի սուր հայտարարություններին, «Սեւան», «Լոռի» եւ այլ ակումբների սեփականատերերի անցյալի տագնապալի ազդակներին, չեն արձագանքում, որ աշխարհի ամենահայտնի հայը՝ պրոֆեսիոնալ ֆուտբոլիստ Հենրիխ Մխիթարյանն անգամ լքեց մեր հավաքականը:

Արդյունքը սա է ու հայկական ֆուտբոլի դժոխային վիճակը, որից դուրս գալու ելքերն այլեւս տեսանելի չեն: ՀՖՖ-ն այս տարիների ընթացքում ֆուտբոլի մակարդակը իջեցրեց ջիբրալթարների, սանմարինոների ու Ֆարերյան կղզիների մակարդակին:

Հ.Գ մեզ փոխանցում են, որ եթե շարունակեն ֆեդերացիայի ղեկին մնալ Արմենները, ապա հաջորդ փուլով հավաքականը կլքեն նաեւ մնացած ֆուտբոլիստների մի մասը: Ու այս ֆոնին երկրի իշխանությունները շարունակում են պահել իրենց հովանավորլայներին՝ թքած ունենալով մի ամբողջ սերնդի երազանքի ու ֆուտբոլային ապագայի վրա: Գլխավորը՝ Արմեն Մելիքբեկյանը Նիկոլ Փաշինյանի հոր անվան մրցաշար է կազմակերպում, փաստացի քծնում վարչապետին, որ պահպանի ՀՖՖ պաշտոնն ու շարունակի ապականել դաշտը:

«Ժողովուրդ» օրաթերթը, իհարկե, գործուն ջանքեր գործադրեց՝ ՀՖՖ-ից ստեղծված իրավիճակի վերաբերյալ մեկնաբանություն ստանալու, բայց, ինչպես միշտ, չստացվեց:

Մեզ մնում է հիշեցնել, որ Արմեն Մելիքբեկյանը խոստացել է ավելի լավ ֆուտբոլ ունենալ եւ առաջ գնալ»:

«Հրապարակ» թերթը գրում է. «ՔՊ-ում քննարկում են Գյումրու ընտրությունների նախընտրական ամփոփիչ հավաքին Փաշինյանի մասնակցության հարցը: ՔՊ շարքայիններն առայժմ հրաժարվում են մեկնաբանել լուրերը, սակայն մեծ է հավանականությունը, որ Փաշինյանն անձամբ է եզրափակելու քարոզարշավը, որ, իր սովորույթի համաձայն, մյուս թեկնածուների դեմ սեւ փիառ անի։

Մարտի 30-ի ընտրությունների` օրենքով սահմանված մեծ հրապարակային բանավեճը, որին պետք է մասնակցեն ընտրացուցակների առաջին դեմքերը, տեղի կունենա մարտի 27-ին։ Այն, որ իշխանական ողջ ներուժը կենտրոնացվել է Գյումրիում, եւ մյուս մարզերը մոռացվել են, ակնհայտ է: Տեղեկացանք, որ թերեւս Գյումրու ընտրությունների պատճառով է Փաշինյանը չեղարկել Սյունիք կատարելիք այցը, չնայած նախապես որոշվել էր, որ պետք է այս շաբաթ Կապան այցելի:

Առավել մանրամասն թերթի այսօրվա համարում

Արտյոմ Երկանյանը ֆեյսբուքյան իր էջում գրում է․

«Երկու հայ, Լևոն Արոնյանն ու Սամվել Սևյանը վիճարկում են Ամերիկայի ուժեղագույն շախմատիստի տիտղոսը։

Այս տաղանդավոր գրոսմայստերները կարող էին ներկայացնել Հայաստանը…»։

Կարճ ընդմիջումից հետո Ռուսաստանի Դաշնության և Միացյալ Նահանգների պատվիրակությունները շարունակել են իրենց հանդիպումը Սաուդյան Արաբիայում, որը տևել է ավելի քան ինը ժամ: Այս մասին հայտնում են Թերթը և ТАСС-ը: 

Ավելի վաղ ՌԴ նախագահի օգնական Յուրի Ուշակովը հայտարարել էր, որ խորհրդակցությունների թեման լինելու է սևծովյան հացահատիկի նախաձեռնության վերսկսումը։

ԱՄՆ նախագահի ազգային անվտանգության հարցերով խորհրդականը հաստատել է, որ պատվիրակությունները կենտրոնանալու են Սև ծովում ռազմական գործողությունները դադարեցնելու խնդրի վրա։ Նա նշել է, որ բանակցությունների հաջորդ փուլում Ռուսաստանն ու Միացյալ Նահանգները կքննարկեն հրադադարի վերիֆիկացիային, խաղաղապահ զորախմբին, տարածքների պատկանելիությանն առնչվող հարցեր։

Մեկնարկել է Իրանի Իսլամական Հանրապետության արտաքին գործերի նախարար Սեյեդ Աբբաս Արաղչիի պաշտոնական այցը Հայաստանի Հանրապետություն: Հայտնում է ՀՀ ԱԳՆ-ն:

Արարատ Միրզոյանը ողջունել է Սեյեդ Աբբաս Արաղչիին Երևանում: Նախարարները քննարկում են ունեցել աշխատանքային ընթրիքի ձևաչափով:

Իրանը պատրաստ է անուղղակի բանակցություններ վարել ԱՄՆ-ի հետ, քանի դեռ Թեհրանի և Վաշինգտոնի միջև բացակայում է ուղղակի երկխոսության հնարավորությունը ԱՄՆ նախագահ Դոնալդ Թրամփի սպառնալիքների և առավելագույն ճնշման քաղաքականության պատճառով։ Ինչպես տեղեկանում է ՏԱՍՍ գործակալությունից, այդ մասին հայտարարել է Իրանի արտգործնախարար Աբբաս Արաղչին։

«Մեր դիրքորոշումն այս հարցում միանգամայն պարզ է. Իրանը առավելագույն ճնշման քաղաքականության ներքո, հնչեցված սպառնալիքների ներքո ուղղակի բանակցությունների չի գնա ԱՄՆ-ի հետ մինչև հակառակ կողմի մոտեցման մեջ փոփոխություններ տեղի չունենան Իրանի և Իրանի ժողովրդի նկատմամբ։ Հաշվի առնելով այն քաղաքականությունն ու մեղադրանքները, որոնք հնչում են ամեն օր, մենք ուղղակի բանակցությունների չենք գնա ամերիկյան կողմի հետ, բայց անուղղակի բանակցությունների համար ճանապարհը բաց է», – ընդգծել է նա SNN հեռուստաալիքի եթերում։

Արաղչիի խոսքով՝ Թեհրանի գլխավոր խնդիրը երկրի ու նրա ժողովրդի շահերի պաշտպանությունն է, և իշխանությունները «ոչ մի հնարավորություն բաց չեն թողնի» դրա իրագործման համար։

Մարտի 7-ին Թրամփը Truth Social հարթակի իր էջում գրել էր, որ նամակ է ուղարկել Իրանի գերագույն առաջնորդ Այաթոլլա Ալի Խամենեիին՝ առաջարկելով բանակցություններ վարել Թեհրանի միջուկային ծրագրի շուրջ: Նամակը մարտի 13-ին Իրանին էր փոխանցել Արաբական Միացյալ Էմիրությունների պատվիրակությունը։

Իրանի առաջնորդը հայտարարել է, որ իր երկիրը երկխոսության չի գնա ԱՄՆ-ի հետ, քանի որ Վաշինգտոնը մտահոգված է միայն սեփական շահերով։

ԱՄՆ նախագահ Դոնալդ Թրամփի վարչակազմը օրինական կարգավիճակից կզրկի Կուբայից, Հայիթիից, Նիկարագուայից և Վենեսուելայից ժամանած ավելի քան 500 000 անձանց։ Այդ մասին ծանուցում է հրապարակել ԱՄՆ ներքին անվտանգության նախարարությունը:

Ըստ փաստաթղթի՝ թվարկված երկրներից միգրանտների և նրանց մերձավոր հարազատների համար Միացյալ Նահանգներ մուտքի իրավունքի տրամադրման ծրագրերը կդադարեցվեն։

Այն ներգաղթյալները, որոնց վրա տարածվում էին այդ ծրագրերը, պետք է Միացյալ Նահանգների տարածքը լքեն Դաշնային գրանցամատյանում ծանուցման հրապարակումից հետո 30 օրվա ընթացքում, այսինքն՝ մինչև ապրիլի 24-ը, նույնիսկ եթե երկրում մնալու նրանց թույլտվության ժամկետը դեռ չի լրացել:

Դեռ հունվարին նախարարությունը հայտնել էր, որ կկրճատի այն ծրագրերը, որոնք որոշ մարդկանց թույլ են տալիս ժամանակավորապես ապրել և աշխատել ԱՄՆ-ում։ Ըստ գերատեսչության՝ նախորդ վարչակազմը նման ծրագրերի միջոցով 1,5 միլիոն միգրանտների թույլ է տվել մտնել երկիր։

Թրամփը բազմիցս հանդես է եկել ԱՄՆ ներգաղթային քաղաքականության խստացման օգտին։ Հունվարի 20-ին նախագահի պաշտոնն ստանձնելուց հետո նա ստորագրել է հրամանագիր Մեքսիկայի հետ սահմանին արտակարգ դրության ռեժիմ սահմանելու մասին։ Ներքին անվտանգության նախարարությունն ընդլայնել է ամերիկյան իրավապահ մարմինների լիազորությունները՝ թույլ տալով նրանց արտաքսել անօրինական ներգաղթյալներին, այսպես կոչված, արագացված ընթացակարգով, այսինքն՝ առանց ներգաղթային դատարանի վճռի:

ՀՀ ԱԺ «Պատիվ ունեմ» խմբակցության հայտարարել է, որ չի մասնակցի Ազգային ժողովի քառօրյա նիստին.

«ՀՀ ԱԺ առաջիկա նիստերին օրվա կառավարիչների կողմից ՀՀ ԱԺ «Պատիվ ունեմ» խմբակցության պատգամավոր, Հայաստանի Հանրապետական կուսակցության Գործադիր մարմնի անդամ Տարոն Մարգարյանի դեմ շուրջ յոթ տարի շարունակվող քաղաքական հետապնդման հերթական բեմադրված ներկայացմանը ֆրակցիան չի մասնակցելու։

Քաղաքական ընդդիմախոսներին լռեցնելու համար գործիք դարձած ՀՀ իրավապահ համակարգի գործողությունների քաղաքական գնահատականները տրված են ՀՀԿ Գործադիր մարմնի սույն թվականի մարտի 12-ի և մի շարք այլ հայտարարություններում»:

Հիշեցնենք, որ ԱԺ քառօրյա նիստերում քննարկվելու է «Պատիվ ունեմ» խմբակցության պատգամավոր Տարոն Մարգարյանին և ՔՊ խմբակցությունը լքած անկախ պատգամավոր Հովիկ Աղազարյանին անձեռնմխելիությունից զրկելու հարցը։ Տարոն Մարգարյանը գրառում է կատարել՝ նշելով, որ իր դեմ հարուցված քրեական գործը համարում է շինծու ու կոչ է արել «Պատիվ ունեմ» ու «Հայաստան» խմբակցություններին չմասնակցել նիստերին։

Երևանում է Իրանի արտգործնախարարը: «Զվարթնոց» օդանավակայանում Սեյեդ Աբբաս Արաղչիի գլխավորած պատվիրակությանը դիմավորել է Հայաստանի արտաքին գործերի փոխնախարար Վահան Կոստանյանը:

Սպասվում է, որ վաղը Հայաստանի արտգործնախարարությունում տեղի կունենա Աբբաս Արաղչիի և Արարատ Միրզոյանի հանդիպումը, որին կհաջորդի նախարարների համատեղ մամուլի ասուլիսը:

Այցի շրջանակում նախատեսված է նաև նախարար Արաղչիի «Բանակցության ուժը» գրքի շնորհանդեսը։ Իրանի ԱԳՆ պաշտոնական ներկայացուցչի հաղորդմամբ՝ Երևանում Արաղչին հանդիպելու է նաև վարչապետ Նիկոլ Փաշինյանի հետ։

Բացի երկկողմ հարաբերությունների շուրջ քննարկումներից՝ օրակարգում նաև Հարավային Կովկասի վերջին իրադարձություններն են։

Թուրքիայի նախագահի աշխատակազմը հերքել է տեղեկությունն այն մասին, թե   ցուցարարները, որոնք Անկարայում բողոքի ակցիա են իրականացնում ի պաշտպանություն Ստամբուլի ձերբակալված քաղաքապետ Էքրեմ Իմամօղլուի, իբր մտել են Թուրքիայի առաջնորդ Ռեջեփ Թայիփ Էրդողանի նստավայր։

«Այն պնդումը, թե ցուցարարները մտել են նախագահական համալիր, չի համապատասխանում իրականությանը: Պարզվել է, որ իսրայելական քարոզչական հարթակներում տեղադրված որոշ նկարներ արվել են Անկարայի համալսարանի համալսարանում ցույցերի ժամանակ», – այս մասին ասվում է Թուրքիայի նախագահի Հաղորդակցության վարչության հայտարարության մեջ:

Թուրքիայի դատարանը որոշում է կայացրել ձերբակալել Ստամբուլի քաղաքապետ Էքրեմ Իմամօղլուին, որը կասկածվում է կոռուպցիայի մեջ։ Թուրքիայի տարբեր խոշոր քաղաքներում՝ Ստամբուլում, Իզմիրում և Անթալիայում շարունակվում են զանգվածային բողոքի ցույցերը՝ ի պաշտպանություն Իմամօղլուի։