Վերջերս շատ էր հանրային հարթակ նետվում այն փաստարկը, որ Ստամբուլյան կոնվենցիայի հետ կապված աղմուկը կեղծ օրակարգ է:
Մինչդեռ ստորև նշված փաթեթի նյութերն ապացուցում են, որ դեռևս 2019 թվականի մայիսից ՀՀ կառավարությունը ձեռնամուխ է եղել Ստամբուլյան կոնվենցիայի վավերացման փաթեթի նախապատրաստման աշխատանքներին:
Կոնվենցիայի առնչությամբ Արտաքին գործերի նախարարության կողմից տրված եզրակացության մեջ նշվել է՝ «2019 թվականին Եվրոպայի խորհրդի 70-ամյակի կապակցությամբ ԵԽ քարտուղարությունը նախաձեռնել է ԵԽ կոնվենցիաների ստորագրման և/կամ վավերագրերի հանձնման երկու հանդիսավոր արարողություն՝ ս.թ. մայիսի 16-17-ին Հելսինկիում կայանալիք Եվրոպայի խորհրդի նախարարական համաժողովի և ս.թ. սեպտեմբերի 30-ից հոկտեմբերի 4-ը Ստրասբուրգում կայանալիք ԵԽԽՎ աշնանային նստաշրջանի ընթացքում։ Հաշվի առնելով վերոնշյալը՝ նպատակահարմար է այս ժամկետներից մեկի ընթացքում իրականացնել «Կանանց նկատմամբ բռնության և ընտանեկան բռնության կանխարգելման և դրանց դեմ պայքարի մասին» Եվրոպայի խորհրդի կոնվենցիայի վավերագրերի հանձնումը։»:
ՀՀ արդարադատության նախարարության եզրակացության համաձայն՝ «Կոնվենցիան պարունակում է Հայաստանի Հանրապետության օրենքին հակասող, ինչպես նաև օրենքի փոփոխություն կամ նոր օրենքի ընդունում նախատեսող նորմեր:․․»:
Փաթեթում առկա է նաև ՀՀ կառավարության որոշման նախագիծը, որի եզրափակիչ մասի համաձայն պետք է՝
«1. Հավանություն տալ 2018 թվականի հունվարի 18-ին Ստամբուլում ստորագրված «Կանանց նկատմամբ բռնության և ընտանեկան բռնության կանխարգելման և դրանց դեմ պայքարի մասին» Եվրոպայի խորհրդի կոնվենցիան վավերացնելու մասին Հայաստանի Հանրապետության օրենքի նախագծի վերաբերյալ Կառավարության օրենսդրական նախաձեռնությանը:
2. Միջազգային պայմանագրում ամրագրված պարտավորությունների՝ Սահմանադրությանը համապատասխանությունը որոշելու նպատակով դիմել Սահմանադրական դատարան:․․․:»:
Այսինքն խնդիր էր դրված մինչև 2019թ․ հոկտեմբեր ամիսը վավերացնել Ստամբուլյան կոնվենցիան, որի նախապատրաստական աշխատանքները կատարվում էին անաղմուկ:
Հետևաբար այս հարցը հանրային քննարկման թափանցիկ դաշտ տանող մտահոգ քաղաքացիներին չի կարելի մեղադրել կեղծ օրակարգ ձևավորելու մեջ:
ՀՀ ՓՊ նախագահ Արա Զոհրաբյան
0Comments