ԱՄՆ նորընտիր նախագահ Դոնալդ Թրամփը հայտնել է, որ մտադիր է պաշտոնավարման առաջին օրը ստորագրել գրեթե 100 հրամանագիր: Այս մասին հայտնել են լրագրողները։
«Պաշտոնը ստանձնելուց հետո մի քանի ժամվա ընթացքում ես կստորագրեմ տասնյակ հրամանագրեր, որոնց թիվը կհասնի հարյուրի»,- մեջբերել են լրագրողները ԱՄՆ ընտրյալ նախագահի խոսքերը։
Թրամփն ավելացրել է, որ փաստաթղթերն ուղղված են լինելու «շատ բաների չեղարկմանը, որոնք արել է [ԱՄՆ հեռացող նախագահ Ջո] Բայդենը»։
Ավելի վաղ Թրամփի ընտրական շտաբի տնտեսական գծով ավագ խորհրդական Սթիվեն Մուրն ասել էր, որ պետության նոր ղեկավարը կարող է ստորագրել 50-100 հրամանագրեր իր պաշտոնավարման առաջին օրը, իսկ հաջորդ շաբաթներին սպասվում է ավելին: Տնտեսագետը կարծում է, որ հրամանագրերի մեծ մասը նվիրված է լինելու էներգետիկ խնդիրներին։ Թրամփն, օրինակ, կարող է չեղարկել Բայդենի հրամանները՝ կապված որոշ տարածքներում էներգիայի արտադրության եւ նավթի ու գազի նոր հանքավայրերի շահագործման, էլեկտրական մեքենաների օգտագործման, մաքուր էներգիայի զարգացման ծրագրերի ֆինանսավորման եւ բնապահպանական չափանիշների խստացման արգելքի հետ։
0Comments