Հայկ Մարությանը գաղափար չունի՝ ինչպես պետք է կառավարել քաղաքը, այդ պոտենցիալը չունի, նա «չի ձգում» քաղաքապետի պաշտոնին

«Երբ որ դու չես կարողանում ոչինչ անել, պատճառաբանում ես տարբեր բաներ՝ նախկին իշխանություններ
Արմեն Բադալյան

Վարչապետի մակարդակով աղբահանության խնդրին նման կարևորություն տալը ժողովրդական երկրներում նորմալ չէ, բայց Հայաստանի նման երկրում, որտեղ անձնիշխանության համակարգ է ձևավորված, և բոլոր հարցերը լուծվում են վարչապետի մակարդակով, նորմալ է:

Այս մասին Tert.am-ի հետ զրույցում ասաց քաղաքական և ընտրական տեխնոլոգիաների փորձագետ Արմեն Բադալյանը՝ անդրադառնալով աղբահանության խնդրի վերաբերյալ վարչապետ Նիկոլ Փաշինյանի և Երևանի քաղաքապետ Հայկ Մարությանի աշխատանքային հանդիպմանը, որը ներկայացվեց վարչապետի ֆեյսբուքյան ուղիղ եթերում:

«Ժողովրդավարական նորմալ երկրներում, երբ բոլոր իշխանության մարմինների գործառույթները հստակ են, և յուրաքանչյուրը գիտի՝ ինչ պետք է անի, բնականաբար, և՛ աղբն է ժամանակին մաքրվում, և՛ մնացած գործերն են արվում: Այդ երկրների համար սա նորմալ երևույթ է, բայց ոչ Հայաստանի համար»,- նշեց նա:

Ուղիղ եթերի ընթացքում քաղաքապետ Հայկ Մարությանը աղբահանության ներկայիս վիճակի համար մեղադրում էր «Սանիտեկ» ընկերությանը և նախորդ իշխանություններին: Նաև քաղաքապետի և վարչապետի կողմից ակնարկներ եղան «Սանիտեկի» ընկերության Հայաստան գալու կասկածելի հանգամանքների վերաբերյալ:

«Երբ որ դու չես կարողանում ոչինչ անել, պատճառաբանում ես տարբեր բաներ՝ նախկին իշխանություններ, վատ եղանակ, բայց ոչ քո գործունեությունը: Իշխանությունը երբ ընտրվում է, չի ընտրվում նրա համար, որպեսզի 1 տարի քննադատի, թե նախկիններն ինչու այս կամ այն գործը լավ չեն արել, այլ իր գործունեությունն է իրականացնում: 1.5 ամսից կլրանա 1 տարին, ինչ Հայկ Մարությանը քաղաքապետի պաշտոնում է, և տեսնում ենք, որ որևիցե դրական իմաստով փոփոխություն չկա, բացասականով կա՝ աղբահավաքություն չկա: Բնականաբար, երբ դու չես կարողանում ինչ-որ արդյունք ցույց տալ, դու պետք է պատճառ գտնես: Պատճառ գտնելն ավելի հեշտ է, գցել ամեն ինչ նախորդ իշխանությունների վրա»,- նշեց Արմեն Բադալյանը:

Հարցին, թե ինչու քաղաքային իշխանությունները, քաղաքապետը չեն կարողանում գրեթե 1 տարվա ընթացքում լուծել աղբահանության խնդիրը, Արմեն Բադալյանը պատասխանեց. «Քաղաքապետը, ժողովրդական լեզվով ասած, «չի ձգում» քաղաքապետի պաշտոնին»:

Ըստ նրա՝ քաղաքային իշխանությունների ամենակարևոր խնդիրը աղբահանությունը չէ, կան շատ ավելի կարևոր հարցեր, որոնք անգամ չեն քննարկվում:

«Քաղաքապետ չեն ընտրվում որպես քաղաքի գլխավոր հավաքարար, որպեսզի գան և միայն աղբահանության հարցը լուծեն: Նա քաղաքի զարգացման ծրագիր պետք է ունենա, որտեղ աղբահանությունը շատ փոքր մասն է լինելու: Քաղաքում շատ ավելի լուրջ խնդիրներ կան, քան աղբահանության խնդիրն է: Աղբահանությունն ուղղակի տեսանելի խնդիր է, երբ բոլորի բակերում, բոլորի աչքի առաջ աղբի կույտեր են, դա տեսանելի է, բայց կան շատ ավելի լուրջ խնդիրներ՝ տնտեսության զարգացման խնդիրը, տրանսպորտի, համատիրությունների, կանաչապատման հարցերը: Այդ ուղղություններով ընդհանրապես որևէ գործողություն չի կատարվում:

Մենք տեսնում ենք, որ ինչպես կառավարությունը, այնպես էլ քաղաքապետը քաղաքի զարգացման ծրագիր չունի: Ինչպես երևում է, քաղաքապետը և իշխող քաղաքական ուժը դրանից գաղափար չունեն՝ ինչպես պետք է կառավարել քաղաքը, հատկապես մայրաքաղաքը: Նա այդ պոտենցիալը չունի, ուղղակի վարչապետը ժամանակին հարմար գտավ, որ հենց այդ անձը պետք է լինի քաղաքապետ, և հենց նա էլ դարձավ»,- եզրափակեց քաղաքական և ընտրական տեխնոլոգիաների փորձագետը: