ԱՄՆ նախագահ Ջո Բայդենը սովորաբար արթնանում է առավոտյան ժամը 7:00-ին Սպիտակ տան երկրորդ հարկի գլխավոր ննջասենյակում. սովորաբար սենյակում լինում է միայն նախագահի կատուն՝ Ուիլոուն: Վերջինս ծառայում է որպես նախագահի «զարթուցիչ», որը քայլում է Բայդենի վրայով՝ նրան արթնացնելու համար, DailyMail.com-ին պատմել են Սպիտակ տան աղբյուրները: Այդ ժամին առաջին տիկին Ջիլ Բայդենը, որն ավելի վաղ արթնացող է, արդեն ոտքի է լինում:
Այնուհետև ժամը 8:00-ի սահմանում Բայդենը սկսում է իր մոտ 45 րոպեանոց մարզումը ֆիզիկական թերապևտի հետ: Վերջինս կենտրոնանում է հավասարակշռող վարժությունների վրա՝ օգնելու պայքարել նախագահի երերուն քայլվածքի դեմ:
Նախագահն իր աշխատասենյակ է գնում առավոտյան ժամը 10:00-ից ոչ շուտ և սովորաբար հեռանում է երեկոյան 19:00-ին: Օգնականները նրա հանրային միջոցառումների մեծ մասը պլանավորում են առավոտյան ժամը 10:00-ից մինչև երեկոյան 16:00-ը, քանի որ, ըստ Սպիտակ տան աղբյուրների, «այդ ժամանակահատվածում է նրա միտքն առավել պայծառ աշխատում»:
Նրա մամուլի ասուլիսները խիստ սահմանափակ են. համեմատած Օբամայի հետ՝ նա անցկացրել է ասուլիսների ընդամենը կեսը: Բայդենը հաճախ ուշանում է ասուլիսներից՝ մինչև մեկ ժամ. օգնականներն այս ուշացումն անվանում են «Բայդենի ժամանակ»: Նախագահին տրվող հարցերը խիստ սահմանափակ են, որպեսզի վերջինս հնարավորինս քիչ սխալներ թույլ տա: Բայդենի օգնականները նրան տեղեկացնում են նաև օրվա կարևոր նորությունների, իրադարձությունների մասին, որպեսզի նախագահը պատրաստված լինի, եթե նա որոշի ոտքի վրա պատասխանել մամուլի ներկայացուցիչների հարցերին:
Բայդենի՝ աստիճաններին սայթաքելու սովորությունը նրա օգնականներին ստիպել է Գաղտնի ծառայությանը լրացուցիչ գործակալ դնել Air Force One-ի փոքր աստիճանների ներքևում: Բացի այդ, նա առավել հաճախ կրում է հատուկ մարզակոշիկներ, որոնք չեն սայթաքում:
Նախագահն իր հետ կրում է «հուշաթերթիկներ», որոնք պատրաստում են իր օգնականները: Դրանք սովորաբար հիմնական ուղղորդումներ են տալիս Բայդենին, օրինակ՝ որտեղ նստել, ում դիմել կամ ինչ խոսել:
Սովորաբար նախագահի պաշտոնական աշխատանքային օրն ավարտվում է 17:00-ին: Բայդենը հազվադեպ է երեկոյան միջոցառումներ անցկացնում՝ նախընտրելով երեկոներն անցկացնել Սպիտակ տան նստավայրում։
Երեկոյան նա Օվալաձև աշխատասենյակում է մնում մինչև երեկոյան ժամը 19:00-ի սահմանում, որից հետո գնում է առաջին տիկնոջ հետ ճաշելու: Նախագահը երեկոյան ճաշի համար նախընտրում է պաստա, մինչդեռ առաջին տիկինը նախընտրում է խորոված ձուկ կամ բանջարեղենով հավ:
Նախագահի քնելու ժամը 23:00-ին է։
Պարբերականը նկատում է, որ գալիք ընտրությունների նախաշեմին ամերիկացիների մեծ մասին անհանգստացնում է՝ արդյոք Բայդենն ունի՞ բավականաչափ մտավոր սրություն և ֆիզիկական էներգիա Սպիտակ տանը ևս մեկ ժամկետ ծառայելու համար: Սակայն հարցումները ցույց են տալիս, որ ամերիկացիների ճնշող մեծամասնությունը կարծում է, որ նա չափազանց մեծ է նորից առաջադրվելու համար:
0Comments