Փարիզում աճուրդով վաճառքի կհանվի 364 կիլոգրամանոց երկնաքար

^{Ֆրանսիայում աճուրդի կհանվի Երկրի վրա ընկած տիեզերական օբյեկտների ամենամեծ հավաքածուն։ Աճուրդը տեղի կունենա հոկտեմբերի 21-ին Փարիզում։ Այս մասին ասվում է Lucien աճուրդների տան կայքում, որը վաճառքի կազմակերպիչն է, տեղեկացնում է ՏԱՍՍ-ը։}

^{Ապագա սակարկությունների գլխավոր ցուցանմուշը Մոն Դյո երկնաքարն է, որի քաշը 364 կիլոգրամ է։ Երկրի վրա այն ընկել է 19-րդ դարավերջին, ներկայում Ֆրանսիայի տարածքում գտնված մեծությամբ երրորդ երկնաքարն է։ Փորձագետների գնահատականներով՝ տիեզերական օբյեկտի արժեքը կազմում է 80-120 հազար եվրո։}

^{Մյուս լոտը լուսնային երկնաքարի կտորն է՝ 157 կիլոգրամ քաշով, որը հայտնաբերվել է ֆերմերի կողմից 1968-ին Օբ հյուսիսարեւելյան դեպարտամենտում։ Նրա արժեքը կկազմի 30-50 հազար եվրո։}

^{Սակարկություններին կներկայացվեն նաեւ NASA-ի լուսանկարներ, Le Parisien եւ France Soir թերթերի համարներ՝ նվիրված Apollo 11 առաքելությանը, Լուսնի պատկերով ծրարներ։ Մինչեւ աճուրդը բոլոր լոտերը երկու օր կցուցադրվեն «Դրուո» հյուրանոցում։}

^{Ինչպես նշել են աճուրդների տանը, սակարկությունները կդառնան միջոցառման մի մասը, որը նվիրված է Լուսնի վրա մարդու առաջին հայտնվելու 50-ամյակին։ Apollo 11-ը Երկրի արբանյակի վրա վայրէջք է կատարել 1969 թվականի հուլիսի 20-ին։ Աստղագնացներն էին՝ նավի հրամանատար Նիլ Արմսթրոնգը եւ լուսնային մոդուլի օդաչու Էդվին (Բազ) Օլդրինը։ Անձնակազմի երրորդ անդամը՝ Մայքլ Քոլինզը, մերձլուսնային ուղեծրում էր նավի հրամանատարական մոդուլով։}