Երկրորդ նախագահ Ռոբերտ Քոչարյանը կալանավայրից հոդված է գրել, որում վարչապետ Նիկոլ Փաշինյանին մեղադրում է իշխանությունը չարաշահելու, իրեն սահմանադրական իրավունքներից զրկելու և այլ հարցերում։
Քոչարյանի հոդվածը հրապարակվել է անգլերենով, euractiv.com կայքում։
«Դեկտեմբերին խորհրդարանական ընտրություններից ընդամենը երկու օր առաջ երկրորդ անգամ ձերբակալվելուց հետո, ես շարունակում եմ ապօրինաբար բանտում պահվել՝ սպասելով դատավարության մեկնարկին»,- գրել է Քոչարյանը։
Նրա պնդմամբ` իրեն կալանավորել են, քանի որ ինքը ընդդիմադիր քաղաքական գործիչ է և ունակ է քննադատել վարչապետ Նիկոլ Փաշինյանին, մարտահրավեր նետել, հաշվետու դարձնել նրան հանրության մտահոգող իրական խնդիրների՝ պետական կառավարման, ազգային անվտանգության և տնտեսության հարցերում։
Ապա երկրորդ նախագահն իր հոդվածում անդրադառնում է 2008 թվականի մարտի 1-ի դեպքերին, պնդում, որ բանակն այն ժամանակ օգտագործվել է պետական կառույցների պահպանության, ոչ թե ցուցարարների դեմ պայքարելու համար։
Երկրորդ նախագահը հայտարարում է, որ իր կալանավորումը քաղաքական մոտիվացիա ունի։
«Այդ է պատճառը, որ Եվրոպայի խորհրդին և Եվրոպական միությանը կոչ եմ անում կանգնել իմ կողքին ու մարդու իրավունքների չափանիշներին, ներառյալ արդար դատավարության, խտրականությունից պաշտպանության չափանիշներին, լիարժեք և խիստ հետևելու պահանջ ներկայացնել Հայաստանի իշխանություններին»,- ասվում է հոդվածում։
0Comments