Թուրքիայի ընդդիմադիր Ժողովրդա-հանրապետական կուսակցության (CHP) նախագահ Օզգուր Օզելը հայտարարել է, որ փրայմերիզների ընթացքում գրեթե 15 միլիոն քաղաքացիներ Ստամբուլի ձերբակալված քաղաքապետ Էքրեմ Իմամօղլուին առաջադրել են որպես հանրապետության նախագահի թեկնածու։ Ստամբուլում ունեցած ելույթի ժամանակ Օզելը նաեւ կոչ է արել Թուրքիայի նախագահ Թայիփ Էրդողանին որոշել արտահերթ նախագահական ընտրությունների անցկացումը եւ դրանցում մրցակցել Իմամօղլուի հետ։
«Մարտի 23-ին մեր կուսակցության 1,653 միլիոն անդամներ քվեարկել են մեր երկրի ապագա նախագահ Էքրեմ Իմամօղլուի օգտին։ Սա ամենավճռական պատասխանն է ներկայիս հեղաշրջման փորձին։ Մենք նաև հրավիրել ենք քաղաքացիներին գալ մեր համերաշխության քվեատուփերի մոտ և քվեարկել։ Մենք նրանցից 13,21 միլիոն ձայն ենք ստացել ապագա նախագահ Էքրեմի համար։ Ընդհանուր առմամբ, նրա օգտին քվեարկել է ավելի քան 14,85 մլն մարդ»,- ասել է Ժողովրդա-հանրապետական կուսակցության ղեկավարը։
Օզելն ասել է, որ «փրայմերիզների արդյունքները կասկածի տակ են դրել Էրդողանի լեգիտիմությունը» և «անխուսափելի են դարձրել արտահերթ ընտրությունները»։ «Մենք ձեզ մարտահրավեր ենք նետում այս հրապարակից։ Եթե վախից չազատեք իմ թեկնածու Իմամօղլուին, մենք բոլորս ձեզ հետ կմրցենք ընտրություններում»,- ասել է նա։
Իմամօղլուն, ով ավելի վաղ բանտ էր տեղափոխվել, այնտեղից X-ի միջոցով դիմել էր. «Ուզում եմ ձեզ լավ նորություն հայտնել Սիլիվրիի բանտից։ Մեր Ժողովրդա-հանրապետական կուսակցության փրայմերիզներին ռեկորդային մասնակցություն է գրանցվել։ Քվեարկել են 15 մլն քաղաքացիներ: Նրանք Էրդողանին ասել են. «Հերիք է»: Երբ տեղադրվեն քվեատուփերը, երկիրը անմոռանալի ապտակ կտա այս կառավարությանը»,- գրել է Իմամօղլուն իր էջում։
0Comments