Վրաստանի խորհրդարանի մոտ հավաքված ցուցարարները հարձակվել են շենքի վրա և կոտրել պատուհանները՝ վնասելով 48 սենյակ։ Այդ մասին ճեպազրույցում հայտարարել է Վրաստանի խորհրդարանի նախագահ Շալվա Պապուաշվիլին։
«Լրատվամիջոցների ստեղծած պատկերի պատճառով շատերը հավանաբար կարծում են, որ ցուցարարներին չի հաջողվել ներխուժել խորհրդարան, և ցուցարարները միայն ներկով հետքեր ու մակագրություններ են թողել։ Նախորդ օրը տեղի ունեցած հարձակման հետևանքով վնասվել է 48 աշխատասենյակ։ Վնասվել են Չիչինաձեի (փողոց) և Ռուսթավելիի (պողոտա) կողմի գրեթե բոլոր պատուհանները։ Վնասվել են գրասենյակային տարբեր սարքավորումներ։ Այրվել է Չիչինաձեի փողոցի կողմում գտնվող խորհրդարանի փայտյա դուռը, ավերվել են խորհրդարանի կենտրոնական մասնաշենքի ջեռուցման և հովացման բլոկները, վնասվել են պահեստները և համակարգչային լաբորատորիան, խորհրդարանի ճաշարանը, պատուհանները»,- ասել է Պապուաշվիլին։
0Comments