Բրյուսելում վարչապետ Նիկոլ Փաշինյանի, Եվրոպական հանձնաժողովի ղեկավար Ուրսուլա ֆոն դեր Լայենի, ԱՄՆ պետքարտուղար Էնթոնի Բլինքենի հետ հանդիպմանը ելույթով է հանդես եկել եվրոպական դիվանագիտության ղեկավար Ժոզեպ Բորելը:
«Երկու ամիս առաջ Բրյուսելում մենք Հայաստանի հետ գործընկերության խորհրդի նիստ անցկացրինք: Պարզ էր, որ մեր հարաբերությունները զարգանում են դրական ուղիով, դրանք ավելի ամուր են, քան երբևէ, և որ կա հարաբերություններն առաջ մղելու փոխադարձ հետաքրքրվածություն: Այսօր այստեղ հենց այդ նպատակով ենք:
Մեր ամերիկյան գործընկերների հետ այս գործընկերությունը տեղափոխում ենք հաջորդ մակարդակ, միավորելով ուժերը՝ ցույց տալու մեր ամուր հանձնառությունը Հայաստանի ինքնիշխանությանը, ժողովրդավարությանը և դիմակայունությանը: Ցանկանում ենք միավորել մեր ուժերը՝ ամրապնդելու և առաջ մղելու մեր հարաբերությունները բոլոր ուղղություններով:
Մեր Գործընկերության խորհրդի շրջանակում արտգործնախարար Արարատ Միրզոյանի հետ պայմանավորվել ենք Հայաստան-Եվրամիություն գործընկերային օրակարգը հասցնել հնարավոր ամենաբարձր մակարդակի: Դրանք միայն խոսքեր չեն:
Հանձնաժողովի նախագահը հայտարարեց Հայաստանի համար դիմակայունության բարելավման միջոցառումների էական փաթեթի մասին՝ ամրապնդելու այդ գործընկերության օրակարգը: Գիտենք, որ Հայաստանը շարունակում է աշխատել բարեփոխումների և դիմակայունության բարձրացման ուղղությամբ, և այդ ջանքերը մաս են կազմելու Համապարփակ և ընդլայնված գործընկերության համաձայնագրի:
Դա բարձրացնելու է հայ հասարակության դիմակայունությունը: Տեսել ենք՝ ինչպես են Հայաստանին թիրախավորում օտարերկրյա տեղեկատվական մանիպուլյացիաներով և միջամտություններով: Մեր հանձնառության մասն է աջակցությունն այդ տեղեկատվությանը դիմակայելուն և մարդկանց հասկացնելը՝ ո՛րն է գործելու ճիշտ ուղին, այդ թվում՝ մեդիագրագիտության բարձրացման միջոցով»,-ասել է Բորելը:
Նա հավելել է, որ ուժեղ և կայուն Հայաստան նշանակում է ավելի ուժեղ և կայուն Հարավային Կովկաս, և որ ԵՄ-ի աշխատանքն ուղղված է տարածաշրջանի բոլոր երկրների շահերին։
0Comments