Ռուսաստանը քաղաքացիությունից զրկել է բնապահպան ակտիվիստ Արշակ Մակիչյանին

Ավելի վաղ դատարանը որոշել էր, որ Մակիչյանների ընտանիքը 18 տարի առաջ քաղաքացիություն ստանալու ընթացակարգի ժամանակ կեղծ տեղեկություններ է ներկայացրել, գրում է Ամերիկայի ձայնը։

Մոսկվայի դատարանը Ռուսաստանի քաղաքացիությունից զրկել է հայազգի բնապահպան և հակապատերազմական ակտիվիստ Արշակ Մակիչյանին, ով ժամանակին հայտնի էր բնապահպանական հարցերի շուրջ իր միայնակ բողոքի ակցիաներով: Այս մասին հայտնել են ակտիվիստն ու նրա փաստաբանը։

Ըստ նրանց՝ դատարանը քաղաքացիությունից է զրկել նաեւ Ռուսաստանում գտնվող նրա երկու եղբայրներին եւ ծնողին։

Մակիչյանը իր և իր ընտանիքիք անդամներին քաղաքացիությունից զրկելու մասին դատարանի որոշումը որակում է որպես վրեժխնդրություն իր քաղաքական գործունեության համար։

Շվեդ բնապահպան ակտիվիստ Գրետա Թունբերգի գործընկեր Մակիչյանն այժմ բնակվում է Բեռլինում:

Նա հայտնի դարձավ հատկապես 2019 թվականին, երբ Մոսկվայի Պուշկինսկայա հրապարակում շուրջ մեկ ամիս իրականացրեց անհատական բողոքի ակցիաներ:

Անցյալ տարի նա փորձեց առաջադրվել Պետդումայի պատգամավորության համար և օգնել մեկ այլ ընդդիմադիր թեկնածուի նրա քարոզարշավում:

Վերջին ամիսներին նա բազմիցս արտահայտվել է Ուկրաինա ռուսական ուժերի ներխուժման դեմ։

Հայաստանում ծնված Մակիչյանին և նրա ընտանիքին Ռուսաստանի քաղաքացիությունից զրկելու որոշումանը նախորդել էր անցյալ շաբաթ դատարանի մեկ այլ որոշում, ըստ որի նրանք կեղծ տեղեկություններ են ներկայացրել 2004 թվականին քաղաքացիություն ստանալու համար: Այդ ժամանակ Արշակ Մակիչյանը 10 տարեկան էր։

Հոդվածը պատրաստվել է Associated Press գործակալության նյութի հիման վրա