Իրաքյան Քրդստանում գիշերը բախումներ են տեղի ունեցել: Տեղեկությունը հայտնում են մերձավորարևելյան թեմաներ լուսաբանող տելեգրամյան ալիքները։

Վարկածներից մեկի համաձայն՝ ազդեցիկ Հարքի ցեղի ներկայացուցիչները ապստամբել են Բարզանիի կառավարության դեմ, որը սերտ կապեր ունի Անկարայի հետ: Մեկ այլ վարկածի համաձայն՝ տեղի ունեցածը կապված է միջցեղային վեճերի հետ:

Նշվում է, որ փակվել էին հիմնական ճանապարհները: Մասնավորապես ընդդիմադիր ջոկատները փակել են Քուվեյրն ու Էրբիլը կապող կարևոր մայրուղին՝ աջակցող ուժերի տեղափոխումը կանխելու համար:

Տեղեկություններ կան, որ մարտերը տեղի են ունեցել Խոր Մոր գազի հանքավայրի մոտ:

Հատկանշական է, որ հուլիսի 6-ին թուրքական քրդամետ DEM կուսակցության պատվիրակությունը մեկնել էր Իմրալի կղզի, որտեղ հանդիպել էր Թուրքիայում արգելված Քրդստանի աշխատավորական կուսակցության առաջնորդ Աբդուլլահ Օջալանի հետ: Բանակցությունները տեղի էին ունեցել կազմակերպության զինաթափման մոտալուտ մեկնարկի մասին հաղորդագրությունների ֆոնին: Նշվել էր, որ Քրդստանի աշխատավորական կուսակցության զինաթափումը կսկսվի այս շաբաթ Իրաքի հյուսիսում։

Բացի այդ, հուլիսի 6-ին Թուրքիայի պաշտպանության նախարարությունը հայտնել էր Իրաքի հյուսիսում տեղի ունեցած միջադեպի մասին. քարանձավներից մեկում, որտեղ, ըստ Անկարայի, կարող էին քուրդ զինյալներ թաքնված լինել, 19 զինծառայող թունավորվել էր մեթանով։ Ավելի ուշ հայտնի էր դարձավ, որ նրանցից 12-ը մահացել են հիվանդանոցում։