Եթե Հայաստանը շահագրգռված է տարածաշրջանային հաղորդակցությունների ապաշրջափակմամբ, ապա պետք է գործնական քայլեր ձեռնարկի այդ ուղղությամբ։ Ինչպես փոխանցում են ադրբեջանական լրատվամիջոցները, այս մասին հայտարարել է Ադրբեջանի ԱԳՆ խոսնակ Այհան Հաջիզադեն՝ անդրադառնալով տարածաշրջանում տրանսպորտային հաղորդակցությունների վերաբերյալ Հայաստանի վարչապետ Նիկոլ Փաշինյանի հայտարարությանը։

Նա նշել է, թե Հայաստանը «44-օրյա պատերազմից հետո դրական ներդրում չի ունեցել տարածաշրջանում հաղորդակցությունների բացման գործընթացում և չնայած Հայաստանի հանձնառությանը` ապաշրջափակել Ադրբեջանի արևմտյան շրջանները Նախիջևանի հետ կապող տրանսպորտային հաղորդակցությունները, Երևանը դեռևս չի կատարել դրանք»:

«Հայաստանը շեղվում է գործընթացից և իր պարտավորություններից՝ գործնականում դժվար իրագործելի բարդ ուղիներով։ Եթե Երևանն իսկապես շահագրգռված է հաղորդակցությունների բացմամբ, չպետք է խուսափի իր պարտավորություններից, այլ գործնական քայլեր ձեռնարկի, որոնք համապատասխանում են տարածաշրջանի նոր իրողություններին», -հայտարարել է Հաջիզադեն: 

ՀՀ առողջապահության նախարարության գրառումը. «Աշխարհում յուրաքանչյուր ութերորդ մարդն ունի ավելորդ քաշ։ Վերջին 30 տարում մեծահասակների շրջանում ավելորդ քաշի ցուցանիշը կրկնապատկվել է, իսկ պատանիների շրջանում՝ քառապատկվել։
Հայաստանում իրականացված մանկական ճարպակալման համաճարակաբանական հսկողության (COSI) հետազոտության արդյունքների համաձայն՝ ավելորդ քաշ (ներառյալ ճարպակալում) ունեցող 7-8 տարեկան երեխաների թիվը կազմել է 27.7%: STEPS և Առողջապահության համակարգի գործունեության գնահատման հետազոտությունների տվյալներով` ավելորդ քաշի և ճարպակալման տարածվածությունը կազմումը է շուրջ 50%:

Ճարպակալման վտանգները

Ճարպակալումը կտրուկ մեծացնում է ոչ վարակիչ հիվանդություններով հիվանդացության ռիսկը` սրտանոթային, շաքարային դիաբետ, քաղցկեղ, նյարդաբանական խանգարումներ, քրոնիկական շնչառական հիվանդություններ, ինչպես նաև՝ մարսողական խանգարումներ:

Ո՞րն է ավելորդ քաշի և ճարպակալման պատճառը

Ավելորդ քաշը և ճարպակալումը էներգիայի ընդունման (սննդակարգի) և էներգիայի ծախսման (ֆիզիկական ակտիվություն) միջև անհավասարակշռության հետևանք են: Այն կարող է առաջանալ բազմաթիվ գործոնների համադրմամբ, այդ թվում՝ ժառանգական, հորմոնալ, սննդակարգային, ֆիզիկական թերակտիվության, հոգեբանական և սոցիալական հանգամանքների հետևանքով:

Ավելորդ քաշի ազդեցությունը դեռահասների վրա

Ավելորդ քաշի առկայությունը մանկության և պատանեկության հասակում ուղղակիորեն ազդում է երեխաների և դեռահասների առողջության վրա և ավելի ուշ տարիքում ուղեկցվում է 2-րդ տիպի շաքարային դիաբետի և սրտանոթային հիվանդությունների զարգացմամբ: Այն թողնում է նաև հոգեբանական հետևանքներ. ազդում է կյանքի որակի վրա, դառնում խտրական վերաբերմունքի պատճառ:

Ինչպե՞ս կանխարգելել

Ավելորդ քաշից խուսափելու նպատակով անհրաժեշտ է վարել առողջ կենսակերպ՝ բարձրացնել ֆիզիկական ակտիվությունը, սահմանափակել բարձր կալորիականությամբ, տրանսճարպեր, ճարպեր, աղ, շաքար պարունակող սննդամթերքի և շաքար պարունակող ըմպելիքների ընդունումը, օգտագործել առողջ սնունդ (մրգեր, բանջարեղեն, լոբազգիներ, ամբողջական հացահատիկներ և ընկուզեղեն), հրաժարվել ծխախոտից և ալկոհոլից, պահպանել քաշի ավելացման նորմերը հղիության ընթացքում, նորածնին առաջին 6 ամիսներին բացառապես կրծքով կերակրել, հետևել երեխաների սննդակարգին, ֆիզիկական ակտիվությանը՝ անկախ երեխայի ներկայիս մարմնի քաշից»:

ՌԴ Ալթայի երկրամասի Զավյալովոյի շրջանի ղեկավար Նիկոլայ Օնիշչենկոյին գնդակահարել են սրճարանից դուրս գալիս։ Այդ մասին  տեղեկանում է ՏԱՍՍ գործակալությունից:

«2025 թվականի մարտի 4-ի ցերեկը Զավյալովո գյուղում գտնվող սրճարանից դուրս գալիս հրազենով սպանել են Զավյալովոյի շրջանի վարչակազմի ղեկավարին։ Սույն փաստով հարուցվել է քրեական գործ», – հայտնել են ՌԴ Քննչական կոմիտեի տարածաշրջանի Քննչական վարչությունից։

Գերատեսչությունում հավելել են, որ հանցագործության կասկածանքով Զավյալովո գյուղում ձերբակալվել է տեղի բնակիչ։

Օնիշչենկոն ծնվել էր 1973 թվականի օգոստոսի 8-ին։ Ալթայի երկրամասի Զավյալովոյի շրջանի ղեկավարի պաշտոնում ընտրվել էր 2022 թվականի հոկտեմբերին։ Մինչ այդ Օնիշչենկոն աշխատել էր ներքին գործերի մարմիններում:

Հունգարիան արգելափակել է ԵՄ փաստաթղթի նախագիծը, որը նախատեսում էր անվտանգության երաշխիքներ Ուկրաինայի համար և ռազմական օգնության նոր փաթեթ, հայտնում է Politico-ն։

Ուրբաթ օրը ԵՄ դեսպանների հանդիպման ժամանակ Հունգարիան արգելափակել է Ուկրաինային վերաբերող տեքստի նախագիծը, որը ներառում էր ձևակերպումներ անվտանգության երաշխիքների մասին, որոնք Եվրամիությունը կարող էր տրամադրել Կիևին, ինչպես նաև ռազմական օգնության նոր փաթեթի մասին:

Այս որոշումը առիթ է դարձել ԵՄ երկրների միջև ավելի լայն պառակտման՝ կապված պատերազմի ժամանակ Ուկրաինային աջակցելու իրենց մոտեցման հետ:

Սլովակիայի վարչապետ Ռոբերտ Ֆիցոն էլ, իր հերթին, հայտարարել է, որ իր երկիրը կհրաժարվի Ուկրաինային հետագա ֆինանսական կամ ռազմական օգնությունից:

Ֆիցոն նաև մերժել է Արևմուտքի այսպես կոչված «ուժով միջոցով խաղաղության» տարբերակը, որը, նրա կարծիքով, անիրատեսական քաղաքականություն է:

Ռուսական “АльфаСтрахование” ընկերությունը ապահովագրական հատուցման ամբողջական վճար է կատարել Ակտաուի մերձակայքում «Ադրբեջանական ավիաուղիներ» ավիաընկերության ինքնաթիռի վթարի կապակցությամբ: Այդ մասին հայտնել է ընկերության ավիացիոն և տիեզերական ապահովագրության գծով գլխավոր տնօրենի տեղակալ Իլյա Կաբաչնիկը:

Ընկերությունն արդեն վճարում է նաև ուղևորներին հասցված վնասի համար։ Պաշտոնյան հայտնել է, որ Embraer 190 ինքնաթիռն ապահովագրություն է ունեցել “АльфаСтрахование” ընկերությունում: Նրա խոսքով՝ ինքնաթիռի համար ամբողջ ապահովագրական գումարի վճարումը կատարվել է փետրվարին։

Քաղաքագետ Գարիկ Քեռյանի ֆեյսբուքյան գրառումը. «Զելենսկին պետք է հեռանա Ուկրաինայից, բնակություն հաստատի մի երկրում, որը ներգրավված չէ ուկրաինական հակամարտության մեջ և այնտեղ համաներում ստանա, հայտարարել է ամերիկացի ձեռնարկատեր Իլոն Մասկը։

Այսպես է գործարարը մեկնաբանել X սոցիալական ցանցում օգտատերերից մեկի հաղորդագրությունն այն մասին, որ Զելենսկին, ուկրաինական հակամարտության ավարտից հետո, հավանաբար կպարտվի ընտրություններում և կհայտնվի ճաղերի հետևում կոռուպցիոն գործով։

Ինչպես նշել է Մասկը, Զելենսկին բռնապետ է, ով հանուն իշխանության «անմեղ ուկրաինացիներին ուղարկում է մսաղաց»։

Կարծում եմ, որ կասկած չկա այլևս, որ սա աշխարհի ամենահին դեմոկրատական պետության՝ ԱՄՆ-ի իշխող վարչակարգի պաշտոնական գնահատականն է ուկրաինական վարչակարգի մասին, որին Հայաստանի փորձանքագետները որակում էին որպես դեմոկրատիայի առաջամարտիկ և հակադեմոկրատական Ռուսաստանի զոհ:

Ինչքան հասկանում եմ կոռուպցիան և մսաղացը դեմոկրատիայի հետ կապ չունեն: Պատմության ողջ ընթացքում իրական դեմոկրատիաների գերնպատակը միշտ էլ եղել է պատերազմների կանխումը բոլոր հնարավոր միջոցներով: Դեմոկրատ առաջնորդը, որպես կանոն միշտ ընտրում է այն ուղին և լուծումը, որը հնարավորություն է տալիս թեկուզ և կորուստներով՝ կանխել պատերազմը, հատկապես այն դեպքում, երբ դրա շահառուն ավելի շատ արտաքին դերակատարներն են:

Կարճ ասած այսուհետ Զելենսկին քաղաքականապես լրիվ սպառված է, առանց ԱՄՆ-ի պատերազմի շարունակումը՝ մսաղացի շարունակում է:

Եվրոպան չի կարող ֆինանսավորել այս պատերազմը, որովհետև Հունգարիան և Սլովակիան արգելափակում են այս մասին ԵՄ բոլոր որոշումները:

Հնարավոր է, որ նրանց միանան ԵՄ անդամ նոր պետություններ»:

Գարիկ Քեռյան

Երևանի քաղաքապետարանի ևս մեկ պաշտոնյա է ձերբակալվել հակակոռուպցիոն հետաքննության շրջանակներում: Այս մասին հայտնել է քաղաքապետարանի մամուլի խոսնակ Հայկ Կոստանյանը։

«Դեռևս նախորդ ամիս Երևանի քաղաքապետարանի պաշտոնյանների ձերբակալությունից հետո, նշված գործի շրջանակում այսօր ձերբակալվել է Երևանի քաղաքապետարանի ևս մեկ պաշտոնյա»,- գրել է նա՝ հավելելով, որ լրացուցիչ տեղեկությունների համար պետք է դիմել հակակոռուպցիոն կոմիտե:

«Հրապարակի» տեղեկություններով՝ ձերբակալվել է քաղաքապետարանի կոմունալ վարչության պետ Ա. Կարոյանը։

Փետրվարին իրավապահ մարմինները ձերբակալել էին քաղաքապետարանի 8 աշխատակցի, որոնցից չորսը կալանավորվել են։

Հայաստանն ունի տվյալներ ԱՄՆ-ից արտաքսման ենթակա ավելի քան 2,000 քաղաքացու վերաբերյալ։ Այս մասին հայտարարել է սփյուռքի գործերի գլխավոր հանձնակատար Զարեհ Սինանյանը։

Հունվարի վերջին ԱՄՆ ներգաղթի և մաքսային ծառայությունը (ICE) զեկույց էր հրապարակել, որում ասվում էր, որ ապօրինի ներգաղթյալներին ուղղված նախագահ Դոնալդ Թրամփի քաղաքականության համաձայն՝ ՀՀ 2808 քաղաքացի պետք է արտաքսվի։

«Մենք գիտենք 2,000-ից ավելի ՀՀ քաղաքացիների մասին, բայց այդ թիվը շատ ավելի մեծ է։ Նրանցից քանիսն են արդեն արտաքսվել` մեզ հայտնի չէ: Այդ հարցով այլ կառույցներ են զբաղվում, արտաքսված քաղաքացիներն էլ չեն կարող սփյուռքի մաս համարվել, քանի որ ԱՄՆ-ում գտնվել են ապօրինի», – նշել է Սինանյանը։

Մազերի խնամքը շատ կարևոր է, սակայն ոչ բոլորն են ճիշտ խնամում մազերն ու գլխամաշկը, քանի որ կան բազմաթիվ տարածված «միֆեր», որոնց մարդիկ շարունակում են հավատալ: Ձեզ ենք ներկայացնում դրանցից մի քանիսը:

Մազերը ցանկալի է չորացնել բնական ճանապարհով

Իրականում այս խորհուրդն արդիական է միայն կարճ սանրվածքի առկայության դեպքում, որը թույլ կտա վարսերին չորանալ 10-15 րոպեում: Երկար մազերը հարկավոր է չորացնել վարսահարդարիչի օգնությամբ, քանի որ ջրի մոլեկուլները կարող են ներթափանցել մազերի մեջ ու նվազեցնել դրանցում պրոտեինների պարունակությունը՝ դարձնելով վարսերը փխրուն ու խամրած: Սակայն հարկ է հիշել, որ վարսահարդարիչ օգտագործելիս օդի հոսանքը պետք է հնարավորինս սառը լինի:

Թեփը վկայում է գլխամաշկի չորության մասին

Թեփն առաջանում է ճարպագեղձերի գերակտիվության դեպքում, ուստի որևէ կապ չունի մաշկի չորության հետ: Յուղերի ու յուղային բաղադրիչներ պարունակող խնամքի միջոցների հաճախակի գործածությունը նույնպես կարող է դառնալ թեփի առաջացման պատճառ, ուստի հարկավոր է չչարաշահել նմամ միջոցները:

Ծայրերը հաճախակի կտրելը խթանում է մազերի աճը

Մազերի աճը կախված չէ սանրվածքից: Այն մեծ մասամբ պայմանավորված է գենետիկայով ու սննդից  ստացված սննդարար նյութերով: Բացի այդ, այս հարցում որոշիչ գործոն է հանդիսանում մազարմատների ակտիվությունը:

Մազերը մշտապես հավաքելը հանգեցնում է մազաթափության

Նման դեպքերում մազաթափություն կարող է սկսվել միայն մազերը չափազանց ձիգ հավաքելու դեպքում: Հակառակ դեպքում որևէ նման խնդիր չի սպառնում:

Լվանալուց հետո մազերը հարկավոր է անպայման ցողել սառը ջրով

Համարվում է, որ սառը ջրով ցողելը «փակում» է մազերի թեփուկները, ինչի շնորհիվ դրանք ավելի ամուր ու առաձգական են դառնում, սակայն իրականում մազերը բաղակացած չեն կենդանի բջիջներից, ուստի չեն «զգում» ջրի տաք կամ սառը լինելը:

Մազերը հաճախակի սանրելը նպաստում է դրանց առողջությանը

Օրական ընդամենը երկու անգամ մազերը սանրելը բավական կլինի դրանց առողջությունը պահպանելու համար: Մազերը հաճախակի սանրելու դեպքում գլխամաշկի ճարպը կհայտնվի մազերին, ինչի հետևանքով մարդն ստիպված կլինի հաճախ լվանալ գլուխը:

Այնպես չէ, որ մենք Ադրբեջանին առաջարկ ենք արել, ենթադրենք, բացասական պատասխան է եկել և դրանով քննարկումն ավարտվել է. քննարկման պրոցեսը գնում է, այդպես 12 դեպք է եղել, և գնացել, եկել է այդ փաստաթուղթը, և մենք այսօր ունենք արդեն 15 առնվազն համաձայնեցված կետ, որը մեծ ձեռքբերում է: Այս մասին, այսօր՝ մարտի 4-ին, ԱԺ-ում  լրագրողների հետ զրույցում ասաց ԱԺ նախագահ Ալեն Սիմոնյանը:

«Եթե կհիշեք, ամենասկզբից, երբ որ խոսակցությունը սկսվեց խաղաղության պայմանագրի մասին, ընդամենը հինգ միջազգայնորեն ընդունված կետի մասին էր խոսքվում, իսկ այսօր 15 կետի մասին է խոսքը»,-ասաց նա:

Անդրադառնալով էսկալացիայի հավանականության մասին, Ալեն Սիմոնյանն ասաց. «Էսկալացիայի պատճառներ ստեղծելու հետ կապված մենք միշտ պետք է ամեն ինչ անենք, որ նման առիթ և պատճառ չլինի։ Հայաստանի Հանրապետությունը բազմիցս ասել ենք որևիցե տարածքային պահանջ չունի և իր հանձնառած պարտավորությունների և համաձայնագրերի շատ ուժեղ հետևում է և հետևողական շարունակելու է աշխատանքները բոլոր խնդրահարույց հարցերը լուծելու ուղղությամբ: Էսկալացիայի վտանգ կա, բայց էսկալացիայի առիթ և պատճառ, կարծում եմ՝ չկա և պետք է չլինի»:

Նա նկատեց, որ միշտ պետք է ելնենք ամենաբացասական կանխավարկածից, որ յուրաքանչյուր պահին կարող է յուրաքանչյուր բան տեղի ունենա. Որևիցե բան չպետք է բացառենք, վստահ չլինենք, որ ամեն ինչ այսպես է լինելու, այնպես է լինելու, պետք է միշտ աշխատանքային այդ պրոցեսը շարունակվի։ Ես չեմ ուզում շատ մանրամասնեմ վարչապետի ասածը, որովհետև դուք իրեն հարց տալու, նաև մեր ընդդիմադիր գործիչները իրեն հարց տալու հնարավորություն նաև այս շաբաթ ընթացքում կունենան ընդգծեց Ալեն Սիմոնյանը: