Իսրայելի պաշտպանության նախարար Իսրայել Կացը հաստատել է, որ իսրայելական ուժերը «անորոշ ժամանակով կմնան» Լիբանանի հետ սահմանի երկայնքով բուֆերային գոտում, և որ նրանց տեղակայումն այնտեղ «կախված է իրավիճակից»։ Բացի այդ, նախարարը հավելել է, որ իսրայելական ուժերը նաև կմնան Գազայի և Եգիպտոսի միջև ընկած հատվածում, այսպես կոչված, «Ֆիլադելֆիական միջանցքում»։ Այս մասին հայտնում է Asharq al-Awsat-ը։

Իսրայելցի պաշտոնյայի խոսքով` իրենք ԱՄՆ-ից ստացել են «կանաչ լույս», և ուժերի այնտեղ մնալը կախված է իրավիճակից, ոչ թե ժամանակից։

Իր հերթին ՀԱՄԱՍ-ը քննադատել է Իսրայել Կացի հայտարարությունները Գազայի և Եգիպտոսի միջև ընկած հատվածը բուֆերային գոտի դարձնելու մասին՝ «համարելով այն  հրադադարի համաձայնագրի ակնհայտ խախտում»։

Հայտարարությունում ընդգծվում է ՀԱՄԱՍ-ի լիակատար հավատարմությունը հրադադարի համաձայնագրին և համաձայնագրի երկրորդ փուլի համար բանակցություններ վարելու պատրաստակամությունը, և կոչ է արվում միջնորդներին, միջազգային հանրությանն անհապաղ և լուրջ քայլեր ձեռնարկել՝ Իսրայելին «ստիպելու հարգել համաձայնագիրը»: ՀԱՄԱՍ-ը նաև հերքել է Իսրայելի պաշտպանության նախարարի հայտարարությունները հրադադարի ընթացքում զինվորների և բնակավայրերի վրա հարձակումներ իրականացնելու մասին։

«Ֆիլադելֆիական միջանցքը», որը նաև հայտնի է որպես «Սալահ ադ-Դին միջանցք», սահմանային գոտի է, որը տարածվում է 14,5 կիլոմետր՝ Միջերկրական ծովից մինչև Պաղեստինի տարածքում գտնվող Քերեմ Շալոմ անցումը: Այն համարվում է բուֆերային գոտի՝ 1979 թվականին Եգիպտոսի և Իսրայելի միջև ստորագրված Քեմփ-Դեյվիդի համաձայնագրով։

ԴՕԿ կուսակցության խորհուրդը ֆեյսբուքյան էջում հանդես է եկել պաշտոնական հայտարարությամբ.

«2025 թ. փետրվարից իրականացվում են տոտալ-քաղաքական հետապնդումներ՝ ԴՕԿ կուսակցության պատվավոր նախագահ Վարդան Ղուկասյանի նկատմամբ։Այս պահին վտանգված է նրա կյանքը, և մեր համար նրա անվտանգությունը առաջնահերթ նշանակություն ունի։Հաշվի առնելով առկա իրադարձությունները՝ ԴՕԿ կուսակցության խորհուրդը որոշեց առաջնահերթություն տալ Վարդան Ղուկասյանի կյանքի և ազատության անհրաժեշտությանը՝ չմասնակցելով Գյումրի համայնքի ավագանու արտահերթ ընտրություններին»։

ԱՄՆ-ից ստացված զենքի և տեխնիկայի պաշարները Ուկրաինային կբավականացնեն «երկու-երեք ամիս»: Այս մասին Financial Times-ին հայտնել է ուկրաինական հետախուզությունում մի բարձրաստիճան աղբյուր։

Սա ավելի քիչ է, քան ասում էին այլ լրատվամիջոցների աղբյուրները, ըստ որոնց ամերիկյան զենքն Ուկրաինային կբավականացնի առնվազն վեց ամիս։

«Սրանից հետո մեզ համար շատ դժվար կլինի։ Դա չի լինի լիակատար կոլապս, բայց մենք ստիպված կլինենք ավելի արագ նահանջել», – ասել է FT-ի աղբյուրը։

«Քարնեգի» հիմնադրամի ռազմական վերլուծաբան Մայքլ Քոֆմանը նույնպես պարբերականին ասել է, որ «մենք կսկսենք խոշոր հետևանքները տեսնել երկու ամսից»:

«Եվ առաջին հերթին դրանք կապված կլինեն ճշգրիտ հարվածներ հասցնելու Ուկրաինայի կարողության հետ», – հավելել է Քոֆմանը:

Իր հերթին, BBC-ի ռուսական ծառայությունը հաղորդում է, որ ըստ ուկրաինացի ռազմական վերլուծաբան Պավել Նարոժնիի՝ խոսքը HIMARS համակարգի մասին է, որին Ուկրաինայում իրական փոխարինող չկա։ Ուկրաինան դեռևս կունենա բրիտանական և ֆրանսիական «Storm Shadow/SCALP» թևավոր հրթիռները, սակայն դրանք ավելի դանդաղ են ու հեշտ խոցելի, հավելել է Նարոժնին:

Վաշինգտոնի կողմից Կիևին ռազմական օգնության դադարեցման մասին հրապարակումներից հետո Ուկրաինայի վարչապետ Դենիս Շմիհալը հայտարարել է, որ իր երկիրը կանի հնարավոր ամեն բան ԱՄՆ-ի հետ կապերը պահպանելու համար։

«Ժողովուրդ» օրաթերթը գրում է. «ՀՀ Ազգային ժողովի պատգամավոր Թագուհի Թովմասյանը շրջակա միջավայի նախարար Հակոբ Սիմիդյանից հետաքրքրվեց, թե ԱԺ բերված նոր նախագծով որքան է թանկանալու Սևանի «սիգ» ձկնատեսակը: Նախարարը շրջանցեց հարցը` չներկայացնելով կոնկրետ սակագների մասին տեղեկություններ: Միայն ասաց, թե որսագողության համար նոր չափանիշներ են սահմանել, ջրային պարեկներն են գործի անցել և այլն:

Մինչդեռ իրականում, բերված նոր հարկատեսակով, մյուս ապրանքատեսակների թանկացմանը զուգահեռ թանկանալու է նաև Սեւանի էկոլոգիապես մաքուր սիգի գինը:

Նշենք, որ Հայաստանում միակ մատչելի ծովամթերքը սիգն է, որը հասանելի է քաղաքացիների համար, սակայն այն ևս թանկանալու է: «Ժողովուրդ» օրաթերթը պարզեց, որ սկզբի սիգի 1 կգ արժեքը այսօրվա 65 դրամից կդառնա 200 դրամ, բայց թանկացումները դեռ առջևում են»:

Առավել մանրամասն թերթի այսօրվա համարում

ԱՄՆ նախագահ Դոնալդ Թրամփը Կանադայի վարչապետ Ջասթին Թրյուդոյին անվանել է «նահանգապետ» և սպառնացել կրկնապատկել կանադական ապրանքների վրա նախօրեին սահմանած 25 տոկոս մաքսատուրքերը։

«Խնդրում եմ, Կանադայի նահանգապետ Թրյուդոյին բացատրեք, որ երբ նա մաքսատուրքեր սահմանի ԱՄՆ ապրանքների վրա, մեր կողմից պատասխան սակագինն անմիջապես նույն չափով կբարձրանա»,- սոցցանցի իր էջում գրել է ԱՄՆ նախագահը։

«Ժողովուրդ» օրաթերթը գրում է. «Երեկ ՀՀ Ազգային ժողովում ԱԺ պատգամավոր Թագուհի Թովմասյանը ՀՀ Կառավարության միջազգային հարցերով ներկայացուցիչ Եղիշե Կիրակոսյանից հետաքրքրվեց, թե ինչ է անում ՀՀ Կառավարությունը հայ ռազմագերիների եւ պատանդ պահվող քաղաքացիական այլ անձանց խոշտանգման մասով` հիշատակելով, որ Ռուբեն Վարդանյանի դեմքին կապտուկներ կան, Բակո Սահակյանի ատամնաշարի առջեւի մասը չկա: Այսինքն՝ հայ գերիները Բաքվի բանտերում խոշտանգվում են:

ՀՀ Կառավարության միջազգային հարցերով ներկայացուցիչը ԱԺ ամբիոնից հայտարարեց, թե «Ունենք առանձին ամբողջական գանգատը, որի գրավոր փուլը ավարտվել է նախորդ տարվա ավարտին` դեկտեմբերին: Ունենք կիրառված միջանկյալ միջոցներ Ադրբեջանի նկատմամբ, որի շրջանակներում պարբերաբար ստանում ենք տեղեկություն պահվող անձանց վիճակի մասին, նրանց առողջականի, պահման պայմանների մասին:

Վերջին տվյալները ստացել ենք փետրվարի սկզբին: Դրանից հետո, բնականաբար, մենք հետեւում ենք մամուլում շրջանառվող որոշ տեսանյութերի, նկարների, ինչը Դուք նշեցիք. դրանք ուշադրությամբ ուսումնասիրվում են, ուշադրության կենտրոնում են: Եվ դրանք էլ ներկայացնում ենք Եվրադատարանի ուշադրությանը` պահանջելով, որ պարտավորեցնի, լրացուցիչ տեղեկություններ տրամադրի ոչ միայն Ռուբեն Վարդանյանի, ԼՂ նախկին ղեկավարության, այլեւ Բաքվում պահվող բոլոր անձանց մասին:

Մենք էլ ունենք որոշակի անհանգստություններ` պահվող այլ անձանց իրավունքների հետ կապված, եւ այդ մասով աշխատանքները շարունակվում են»:

Մեծ Բրիտանիայի վարչապետն անդրադարձել է Ուկրաինայի շուրջ զարգացումներին և ռուս-ուկրաինական կարգավորման եվրոպական հնարավոր ծրագրին: Քիր Սթարմերի խոսքով՝ նախ հարկավոր է շարունակել Ուկրաինային ռազմական աջակցությունը և մեծացնել Ռուսաստանի վրա տնտեսական ճնշումը:

«Պայմանավորվել ենք Կիևին 2,2 միլիարդի նոր վարկ տրամադրելու մասին, որը կփոխհատուցվի ռուսական սառեցված ակտիվների հաշվին», – մանրամասնել է պաշտոնյան:

Սթարմերի խոսքով` երկարաժամկետ խաղաղության ցանկացած պայմանավորվածություն պետք է երաշխավորի Ուկրաինայի ինքնիշխանությունն ու անվտանգությունը։

«Ուկրաինան պետք է լինի բանակցությունների սեղանի շուրջ, երբ խոսքը վերաբերում է իր ապագային», – շեշտել է Մեծ Բրիտանիայի կառավարության ղեկավարը:

Նա շեշտել է պատերազմի ավարտից հետո էլ համատեղ ուժերով Ուկրաինայի պաշտպանությունն ամրապնդելու կարևորությունը:

«Ուկրաինացիների համար պատերազմը 3 տարի առաջ չի սկսվել։ Նրանք Պուտինի հետ նախկինում էլ պայմանագրեր են կնքել։ Չենք կարող կրկին թույլ համաձայնագիր ընդունել», – հավելել է Սթարմերը:

«Հրապարակ» թերթը գրում է. «Օրերս ՀՀ գլխավոր զինկոմի պաշտոնակատար է նշանակվել Գագիկ Մխեյանը, նախորդը՝ Արեն Սարգսյանը, եւս պաշտոնակատար էր՝ շուրջ 2 տարի, եւ աշխատանքից ազատվել է իր դիմումի համաձայն՝ այդպես էլ պաշտոնի չնշանակվելով։ ՊՆ-ում տարակուսած են Սարգսյանի անսպասելի հեռանալուց, առավել եւս՝ Մխեյանի նշանակումից։

Նա հայտնի է որպես «նախկինների» համակիր՝ Ռոբերտ Քոչարյանի պաշտոնավարման ժամանակներից ՊՆ-ում բարձր պաշտոններ է զբաղեցրել, երկար տարիներ եղել է Գեղարքունիքի զինկոմը, իր շրջապատում չի թաքցրել, որ երազում է հանրապետության գլխավոր զինկոմ դառնալ։

ՊՆ մեր աղբյուրների պատմելով՝ կադրային կրիզիսը ՊՆ-ում իրեն զգացնել է տալիս, պատահական չէ, որ վերջին շրջանում Պապիկյանն առանցքային պաշտոններում հիմնականում նախկինների ժամանակ աչքի ընկած զինվորականների է նշանակում»:

Ռուսաստանի Դաշնության և ԱՄՆ-ի ներկայացուցիչները Էր-Ռիադում պայմանավորվել են առանձին բանակցություններ վարել Իրանի շուրջ ստեղծված իրավիճակի թեմայով, սակայն նման խորհրդակցությունների ձևաչափն ու ժամանակը որոշված ​​չեն։ Ինչպես տեղեկացնում է  «ՌԻԱ Նովոստի»-ն, այդ մասին լրագրողներին ասել է ՌԴ նախագահի օգնական Յուրի Ուշակովը։

Նա հաստատել է, որ Էր-Ռիադում ռուս-ամերիկյան բանակցությունների ընթացքում քննարկվել է Իրանի շուրջ ստեղծված իրավիճակը։

«Այո, մենք պայմանավորվել ենք առանձին բանակցություններ վարել այս հարցի շուրջ»,- ասել է Ուշակովը՝ պատասխանելով արևմտյան ԶԼՄ-ների հաղորդագրություններին, որ իրանական խնդիրը բարձրացվել է Էր-Ռիադում:

Նա հավելել է, որ մինչ այժմ Վաշինգտոնից որևէ կոնկրետ համաձայնության ազդանշաններ չեն եղել, թե ինչպես և երբ դա իրականացնել:

ԱՄՆ-ը չի բացառում Ուկրաինային զենքի և ռազմական տեխնիկայի մատակարարումների վերականգնման հնարավորությունը, եթե Կիևն սկսի խաղաղ բանակցությունները։ Կոնգրեսում՝ լրագրողների հետ զրույցում, այս մասին հայտարարել է ԱՄՆ փոխնախագահ Ջեյ Դի Վենսը։

«Միացյալ Նահանգների նախագահ Դոնալդ Թրամփը հստակ ասել է՝ ցանկանում է, որ ուկրաինացիները նստեն բանակցությունների սեղանի շուրջ: Կարծում եմ, երբ դա տեղի ունենա, շատ հարցեր կդիտարկվեն»,- ասել է նա։