Ամփոփելով հեղափոխության մեկ տարին՝ այսօր խորհրդարանական ճեպազրույցների ժամանակ «Լուսավոր Հայաստան» խմբակցության ղեկավար Էդմոն Մարուքյանը հայտարարել է.
«Իշխանության ամենամեծ խնդիրը կադրային քաղաքականություն է, ու բազմաթիվ բնագավառներում տեսլական չունենալը: Եթե լիներ յուրաքանչյուր ոլորտի մասին տեսլական ու կադրային քաղաքականությունն ավելի լավը լիներ, քան կա, հեղափոխության արդյունքների կապիտալիազացիան մոտավորապես հինգ անգամ ավելի արդյունավետ կլիներ»:
Մարուքյանը հիշեցնում է, որ մեկ տարի է՝ կառավարությունն աշխատում է, ու իրենք էլ չգիտեն, թե ինչ կառուցվածք են ուզում. «Մեկ տարի է` չգիտեն փոխմարզպետներին ազատելո՞ւ են, թե՞ ոչ: Հինգ ժամ կարող եմ թվարկել, թե էլի ինչեր: Մի տարի է՝ Հարկային օրենսգրքից խոսում ենք, երեկ նոր ստացել ենք Հարկային օրենսգրքի փոփոխությունների փաթեթը: Այնպես չի, որ մեզնից կադրեր չեն գնացել կառավարություն: Եթե առաջարկ եղել է, ասել ենք՝ գնացեք, աշխատեք: Որևէ ափսոսանք չունենք, դրա մասին շատ ենք խոսել: Եթե ինչ-որ բան սխալ արած լինեինք, ապա քաղաքական արենայում գոյություն չէինք ունենք, մինչդեռ ավելին ենք, քան կայինք: Ամեն ինչ շատ լավ է եղել, շատ ճիշտ է եղել: Հիմա պետք չէ հետ նայել ու տեսնել, թե ով ինչ ասեց ու արեց, այլ առաջ նայենք ու կապիտալիզացնենք ունեցածը»:
Մարուքյանն ասում է, որ ժողովուրդն անհամբեր է և ամենօրյա ռեժիմով սպասում է արդյունքների՝ երբ կյանքը կլավանա:
«Կյանքը վատանում է, կրճատումներ են լինում: Մշակույթի նախարարության պետական հուշարձանների պահպանության ՊՈԱԿ-ի աշխատակիցները, որ ամսական 50 հազար դրամ աշխատավարձ են ստանում, յուրաքանչյուր ամիս բարձրանում էին որևէ սարի լանջի վրա` տեսնելու՝ հուշարձանն ինչ վիճակում է գտնվում: Հիմա արդեն մի քանի ամիս է, այդ մարդիկ հավելյալ գումարները չեն ստանում ու իրենց գրպանից են գումար ծախսում, որ գնան, տեսնեն, թե այդ հուշարձաններն ինչ վիճակում են»,- ասել է Մարուքյանը:
0Comments