Ամռանը գյուղական բնակչության շրջանում բողոքի ակցիաների ալիք է սպասվում: Հունվարի 28-ին լրագրողների հետ զրույցում այս մասին ասաց սոցիոլոգ Ահարոն Ադիբեկյանը:
Նրա խոսքով՝ սա կապված է Կառավարությունում առաջարկվող կառուցվածքային փոփոխությունների եւ Գյուղատնտեսության նախարարության լուծարման հետ:
«Ամռանը, ակնհայտ է, որ կաթնամթերքի վաճառքի հետ կապված խնդիր կառաջանա, ինչը գյուղացիների շրջանում դժգոհության եւ բողոքի ակցիաների կհանգեցնի», - ընդգծեց Ադիբեկյանը:
Խոսելով պետական ապարատի ներկայացուցիչներին տրված պարգեւավճարների հարցի մասին՝ նա նկատեց, որ պետական կառավարման ոլորտում ֆինանսավորման թերությունը կարող է կոռուպցիայի բարգավաճմանը հանգեցնել:
Պատասխանելով սահմանի իրավիճակի մասին հարցին՝ փորձագետը նշեց, որ հայկական բանակը շարունակում է խաղաղության գլխավոր երաշխավորը մնալ: Սոցիոլոգի համոզմամբ՝ հայկական բանակը սպառազինության պակասը փոխհատուցում է հոգեբանական գործոններով, ինչպես նաեւ կազմակերպվածությամբ եւ կարգապահությամբ:
«Բացի այդ, Ադրբեջանի տարածքով անցնող նավթատարների եւ գազատարների առկայությունը եւ պետության բազմազգ բնույթը նրանց բացասական կողմերն են: Ռուսաստանի հետ մտերմանալու փորձը դեռ նույնպես Բաքվի համար անարդյունք է», - եզրափակեց Ահարոնյանը:
0Comments