Հավաքած փողերը կլցնի սեփական ճամպրուկները՝ հիվանդ երեխաներին օգնելու փոխարեն

^{ՆԻԿՈԼԻ ՆՇԱԾ ԿՈՂՈՊՏԻՉՆԵՐՆ ՈՒ ԳՌՓՈՂՆԵՐՆ ԱՆՆԱՅԻ ԹԵԹԵՎ ՁԵՌՔՈՎ ԴԱՐՁԱՆ ԲԱՐԵՐԱՐ ԵՎ ԱՉՔԻ ԼՈՒՅՍ}

^{11-րդ դարում կաթոլիկ եկեղեցում մի հատկանշական ավանդույթ ձևավորվեց՝ կապված մարդկանց մեղքերի թողության հետ: Անվանեցին այդ երևույթը «ինդուլգենցիա», որը լատիներենից թարգմանաբար նշանակում է «ողորմածություն»:}

^{11-րդ դարից այս կողմ՝ 21-րդ դար, համարյա ոչինչ չի փոխվել: Դարձյալ մարդկանց մեղքերի թողություն են տալիս, բայց, արի ու տես, որ Հայաստանում դա անողը տիկին Աննան է՝ «ամենայն հայոց վարչապետ» Նիկոլ Փաշինյանի կինը: Այսօրվա իր դարակազմիկ ասուլիսում առևտրականի հոգեբանությամբ այս անձնավորությունը հայտարարել է, թե ով էլ որ իր ղեկավարած հիմնադրամներին մուծվի, եթե անգամ մուծված գումարը գողացված է, ինքը միայն ուրախ կլինի:}

^{«Եթե պետբյուջեից գողացված միջոցներ են, ավելի լավ, եթե փոխանցվում են և ծառայեցվում են պետությանը և պետության քաղաքացիներին։ Գումարի ծագումն անձնապես ինձ համար կապ չունի»,- հայտարարել է Աննա Հակոբյանը՝ հավելելով, որ երախտապարտ է գործարարներ Սամվել Ալեքսանյանին և Արտակ Սարգսյանին՝ դրամաշնորհներ տալու համար:}

^{Այսպիսով, աբսուրդի թատրոնը շարունակվում է: Աննա Հակոբյանը ինդուլգենցիայի տակ է վերցնում և մեղքերի թողություն տալիս ա՛յն մարդկանց, ա՛յն գործարարներին, ում հասցեին իր ամուսինը ժամանակին՝ ընդդիմություն եղած տարիներին, ինչ ասես՝ ասում էր՝ նրանց մեղադրելով ժողովրդին կողոպտելու, թալանելու և գռփելու մեջ: Այսինքն, կողոպտիչներն ու գռփողները թավշյա իշխանության օրոք մեկ ակնթարթում դարձան բարերարներ և աչքի լույս միայն այն պատճառով, որ մուծվել են տիկնոջ հիմնադրամներին:
Մի կողմ թողնելով հանգամանքը, որ Աննա Հակոբյանը չափազանց շատ բան է վերցնում իր վրա՝ իրեն դնելով համարյա թե կաթոլիկ եկեղեցու հոգևորականի տեղ, նշենք, որ գործող իշխանության քաղաքականությունը ինչպես երկակի եղել է հենց առաջին օրվանից, այնպես էլ մնացել է: Ով իրենց թրի տակով անցնում է՝ լավն է, ով քննադատում է՝ ազգի թշնամի է:}

<sup>Ամեն գնով մեծ գումարներ հավաքագրելու մարմաջը Աննա Հակոբյանին ոչ մի լավ տեղ չի հասցնելու: Մյուս առումով, հասկանալի է, թե նա ինչու է այդքան շահագրգռված դրամահավաքությունը արագ տեմպերով առաջ մղել: Նա հասկանում է, որ ամեն ժամը մոտեցնում է իր ամուսնու անփառունակ իշխանության վերջին և խայտառակ օրը, երբ ուշքի եկած ժողովրդական զանգվածները հաշիվ կպահանջեն իրենց խաբելու, շահագործելու և իրենց զգացմունքների հաշվին վարչապետի աթոռը զավթելու համար:
Աննա Հակոբյանը հասկանում է, թերևս, որ հասունանում է իրենց՝ երկրից փախչելու օրը: Եվ հավաքած փողերը նա, իմ խորին համոզմամբ, կլցնի սեփական ճամպրուկները՝ հիվանդ երեխաներին օգնելու փոխարեն:

Այստեղ հարցն այլ է՝ արդյոք կհասցնե՞ն փախչել:</sup>

^{Անի Կարապետյանի ֆեյսբուքյան էջից}