Վեթինգը պետք է կիրառվի նաեւ նախորդ եւ ներկա նախարարների դեպքում

^{Կրթության եւ գիտության նախարար Արայիկ Հարությունյանի կարծիքով՝ վեթինգը պետք է կիրառվի նաեւ նախորդ եւ ներկա նախարարների դեպքում։ Այս մասին այսօր՝ մայիսի 30–ին կառավարությունում լրագրողների հետ ճեպազրույցում հայտարարեց նա։}

^{«Եթե հիշում եք 2-3 տարի առաջ այն ժամանակ դեռ պատգամավոր Նիկոլ Փաշինյանը խոսեց, որ յուրաքանչյուրի՝ պաշտոնյա ժամանակ  ձեռք բերվածը պետք է ստուգվի։ Ինքս դեմ չեմ անցնելու վեթթինգով՝ զտմամբ»,–ասաց նա։}

 ^{Հարցին, թե մտավախություն չունի՞, որ իր հետ կապված էլ ինչ–որ բաներ կբացահայտվեն, Հարությունյանը պատասխանեց.}

^{«Ես ինքս պետական պաշտոնյա չեմ եղել եւ այն ինչ–որ վաստակել եմ 99 տոկոսով ԵՊՀ–ում վաստակածն է եղել»։}

^{Հարցին, թե ի՞նչ կտա վեթինգը, եթե այն կիրառվի բոլոր դատավորների նկատմամբ, նախարարը պատասխանեց.}

^{«Մամուլում հրապարակվում են բազմաթիվ նյութեր, որտեղ հստակ երեւում է, որ որեւէ դատավոր ինչ–որ մի ժամկետում մի քանի տասնյակ միլիոնի նվիրատվություն է ստանում, գույքի քանակն է ավելանում, պետք է իմանալ, թե որտեղից այդ գույքը, գուցե օրինական ճանապարհով է ձեռք բերել, պետք է ստուգվի, սակայն այն, որ համակարգի նկատմամբ համատարած անվստահություն կա, փաստ է,  եւ դատավորները, որոնք արդար եւ ազնիվ են, իրենց քրտինքով են այդ գույքը վաստակել, չպետք է խնդիր ունենան»։}

^{Հիշեցնենք, որ վարչապետ  Նիկոլ  Փաշինյանը մայիսի 20-ին կառավարությունում  հրավիրված  խորհրդակցության ընթացքում հայտարարել էր, որ  եկել է դատական համակարգում վիրահատական միջամտություններ իրականացնելու ժամանակը: Վարչապետն ընգծել էր, որ Հայաստանում գործող բոլոր դատավորները պետք է ենթարկվեն, այսպես ասած, vetting-ի: Այսինքն՝ հանրությունը պետք է ամբողջական տեղեկատվություն ունենա դատավորի ունեցած քաղաքական կապերի ու ծագումնաբանության, գույքային վիճակի, դատավորի կարգավիճակում եւ նախորդ շրջանում ծավալած գործունեության, անհատական եւ պրոֆեսիոնալ հատկանիշների մասին:}