Ճանապարհային ոստիկանությունը առաջիկայում կշարունակի խնդրահարույց խաչմերուկները գծանշել «վաֆլիներով», իսկ վարորդները խախտման համար կտուգանվեն մոտ 5000 դրամով։ Այս մասին այսօր՝ ապրիլի 30–ին, մամուլի ասուլիսի ժամանակ ներկայացրեց Ճանապարհային ոստիկանության (ՃՈ) պետ, գնդապետ Եգոր Կարապետյանը։
«Ճանապարհային ոստիկանությունը, երբ «վաֆլիների» գծանշումը արեց, հայտարարություն տարածեց, որ սա փորձնական է, արվում է, որ մեր վարորդների աչքը տեսնի եւ սովորի, արդեն այսօր ՃՈ–ն ներկայացրել էր մի քանի փոփոխություններ, որոնց մի մասը մայիսի 5-ին ուժի մեջ կմտնեն, որոնց թվում են նաեւ վաֆլիները։ Երբ մենք նորից կգծանշենք խնդրահարույց խաչմերուկները «վաֆլիներով», կդրվեն ճանապարհային նշաններ, արդեն կտուգանվեն 5000 դրամի կարգի»,–նշեց նա։
ՃՈ պետի տեղակալ Արման Չիլինգարյանն էլ հայտնեց, որ մայիսի 5-ից փոփոխություններն են սպասվում նաեւ շրջանաձեւ երթեւեկության խաչմերուկների վերաբերյալ:
«Գիտեք, որ փորձնական եղանակով մոտ մեկ տարի կիրառեցինք ճանապարհային նշանների եղանակով, որ շրջանաձեւ խաչմերուկի ներսում գտնվող վարորդն ունի առավելություն ներս մտնողի հանդեպ: Հիմա արդեն կանոնն է փոխվել, եւ մայիսի 5-ից ՀՀ բոլոր շրջանաձեւ երթեւեկությամբ խաչմերուկներում, որտեղ չեն լինի տեղադրված հակառակ ճանապարհային նշաններ, որ դրսից մուտք գործողն ունի առավելություն, կանոնի ուժով շրջանաձեւ երթեւեկության մեջ գտնվող վարորդը կունենա առավելություն»,-ասաց նա:
ՃՈ պետի տեղակալի խոսքով՝ փոփոխություններ են կատարվելու նաեւ ճանապարհային նշանների խմբերում, ավելացվելու են հետիոտներին եւ հեծանիվներին վերաբերող ճանապարհային նշանները:
0Comments