Աննա Հակոբյանը խոստանում է կրել բացառապես հայ դիզայներների արտադրանքը

Հայաստանի Հանրապետության վարչապետի տիկին Աննա Հակոբյանն ապրիլի 25-ին այցելել է հայկական արտադրության MADE Fashion corner խանութ և կատարել մի շարք գնումներ:

Խանութի հիմնադիրներն են չորս հայ դիզայներներ՝ Արևիկ Սիմոնյանը՝  «Kivera Naynomis» բրենդով, Արամ Նիկոլյանը՝ «Nikolyan» բրենդով, Ֆաինա Հարությունյանը՝ «FAINA» բրենդով և Միկա Դանիելյանը՝ «Harmony» բրենդով: Խանութը հարթակ է հանդիսանում ևս 30 հայ դիզայներների համար, որոնք ներկայացնում են իրենց հավաքածուները: Աննա Հակոբյանը նշել է, որ այսուհետ  թե´ առօրյա հագուստը և թե´ պաշտոնական-արարողակարգային հագուստը գնելու է բացառապես հայ դիզայներների արտադրանքը ներկայացնող խանութներից:

Արամ Նիկոլյանի հետ զրույցում Աննա Հակոբյանն ասել է. «Ես չեմ պատրաստվում գնումներ կատարել այլ երկրներում, կամ Երևանում ներկայացված օտարերկրյա բրենդային խանութներից, ինչպես չեմ պատրաստվում կրել իտալական կամ ֆրանսիական կամ որևէ այլ երկրի արտադրության հագուստ: Առաջիկայում բոլոր միջոցառումների ժամանակ մարդիկ ինձ կտեսնեն այն հագուստով, որը ես կկարողանամ ձեռքբերել հայ դիզայներների աշխատանքները ներկայացնող խանութներում: Եվ որքան մեր դիզայներները կզարգացնեն ու կկատարելագործեն իրենց աշխատանքները, այնքան, հուսով եմ, ես ավելի լավ տեսք կունենամ»՝ խնդրելով Արամ Նիկոլյանին այս խոսքերը փոխանցել Հայաստանում աշխատող բոլոր հագուստ մոդելավորող դիզայներներին:

Արամ Նիկոլյանն էլ նշել է, որ նման քայլը մոտիվացնող է և պարտավորեցնող: Ապրիլի 27-ին Երեւանում կվերաբացվի 5concept խանութը: Խանութի հիմնադիրներն են NAGHASH, LOOM WEAVING, Նելլի Սերոբյան, Z.G.EST, Petoor բրենդները: Խանութում ներկայացված կլինեն մոտ 70 հայ դիզայներների ստեղծած հագուստները: Աննա Հակոբյանը գնումները կշարունակի այստեղ: