|
Հայաստանը չի կարողանա միաժամանակ լինել ԵԱՏՄ-ի և ԵՄ-ի անդամ, պետք է որոշի՝ որտեղ ավելի լավ կլինի։ Այս մասին ասել է ՌԴ ԱԳՆ ղեկավարի տեղակալ Միխայիլ Գալուզինը` մեկնաբանելով Հայաստանի խորհրդարանի կողմից Եվրոմիությանն անդամակցելու՝ երկրի մտադրության մասին օրինագծի ընդունումը։ |
«Մենք համոզված ենք, որ անհնար է միաժամանակ լինել երկու հակադիր ասոցիացիաներում»,- ասել է Գալուզինը՝ ՌԻԱ Նովոստիին տված հարցազրույցում։
Գալուզինը հիշեցրել է, որ ԵԱՏՄ-ն իրավահավասար պետությունների միություն է, մինչդեռ ԵՄ-ն կառույց է, որտեղ «իշխում է բրյուսելյան չինովնիկների՝ իրականությունից կտրված հակառուսական նարատիվներով թելադրված գավազանի կարգապահությունը»։
«Հույս ունենք, որ հայ հասարակությանը կբացատրվեն ԵԱՏՄ-ին անդամակցության բոլոր օգուտները և միությունից դուրս գալու հետևանքով կորուստների մասշտաբները»,- ասել է նա։
Գալուզինն ընդգծել է, որ Հայաստանն ինքնիշխան պետություն է, որն ինքնուրույն է ընտրում իր զարգացման վեկտորը, սակայն բնակչությունը պետք է օբյեկտիվորեն հասկանա այդ քայլերի հետևանքները։
Ավելի վաղ ՌԴ Անվտանգության խորհրդի քարտուղար Սերգեյ Շոյգուն, պատասխանելով եվրոինտեգրման ուղղությամբ Երևանի վերջին քայլերի մասին հարցին, պարզբանել էր, որ ԵՄ-ին հնարավոր անդամակցության դեպքում Հայաստանը ոչ միայն տնտեսական խնդիրների առաջ կկանգնի, այլև ստիպված կլինի միանալ հակառուսական պատժամիջոցներին։
0Comments