ԱՄՆ Դաշնային ավիացիոն վարչությունը (FAA) հայտարարել է Կատարում տեղակայված ամերիկյան «Ալ Ուդեյդ» ռազմաբազայի օդանավակայանի փակման մասին։ Տեղեկությունը զետեղված է գերատեսչության պաշտոնական կայքում։

Ծանուցման մեջ նշվում է. «Օդանավակայանները փակ են», առանց որոշման ժամկետների կամ պատճառների մասին լրացուցիչ մանրամասների։

Ավելի վաղ Fox News-ը, հղում անելով աղբյուրներին, հայտնել էր, որ Պենտագոնը Կատարում տեղակայված ռազմաբազայի վրա Իրանի հնարավոր հարվածը համարում է «անխուսափելի սպառնալիք»։

Այս ֆոնին, երկուշաբթի Կատարի իշխանությունները հայտարարեցին երկրի օդային տարածքի ժամանակավոր փակման մասին՝ այն անվանելով Կատարի քաղաքացիների և այցելուների անվտանգությունն ապահովելու կանխարգելիչ միջոցառում։