ԱՄՆ փոխնախագահ Ջեյ Դի Վենսը հայտարարել է, որ Սև ծովում հրադադարի մասին պայմանավորվածությունները գրեթե պատրաստ են:

«Մենք, իհարկե, ունենք հրադադարի մասին պայմանավորվածություն էներգետիկ ենթակառուցվածքների նկատմամբ։ Մենք ունենք հրադադար Սև ծովում առևտրային նավերի նկատմամբ, որը գրեթե պատրաստ է։ Եվ երբ մենք հասնենք այդ կետին, մենք կաշխատենք Ուկրաինայում հրադադարի հաջորդ փուլի վրա»,- հայտարարել է ամերիկացի պաշտոնյան:

ա ընդգծել է, որ Վաշինգտոնը լավատեսորեն է գնահատում ընդհանուր առմամբ Ուկրաինայում հակամարտության կարգավորման շուրջ բանակցությունների ընթացքը:

Վենսը, սակայն, չի մեկնաբանել, թե արդյոք Միացյալ Նահանգները համաձայնություն տվե՞լ է չեղարկել ռուսական բանկերի նկատմամբ պատժամիջոցները, ինչը պահանջվում է Սև ծովում հրադադարի համար:

Ամերիկացի միլիարդատեր, ԱՄՆ կառավարության արդյունավետության վարչության ղեկավար Իլոն Մասկը հայտարարել է, որ պաշտպանության նախարարության գնումների համակարգը (DoD procurement) իրեն ծանոթ է ավելի լավ, քան ԱՄՆ կառավարության ցանկացած այլ հատված։

Այս մասին Մասկը գրել է X սոցիալական ցանցում՝ անդրադառնալով ԱՄՆ պետական կառույցներում անհրաժեշտ բարեփոխումներին։

«Ես DoD գնումների համակարգը ավելի լավ եմ ճանաչում, քան կառավարության որևէ այլ հատված՝ մինչև ԱՄՆ կառավարության արդյունավետության վարչությունում լինելը։ Անհրաժեշտ են խոշոր բարեփոխումներ։ Եվ դրանք կիրականացվեն»,-գրել է Մասկը։

Մասկի այս հայտարարությունը հնչել է այն բանից հետո, երբ CBS News-ի լրագրող Քեթրին Հերիջը հայտնել էր, որ ԱՄՆ Կենտրոնական հետախուզության գործակալության տնօրեն Ջոն Ռեթքլիֆը հրավիրել է Իլոն Մասկին՝ երկուշաբթի հանդիպելու և քննարկելու կառավարության արդյունավետության հարցերը։

ԱՄՆ նախագահ Դոնալդ Թրամփը Ուկրաինայում հրադադարի ռեժիմի ընդլայնման դիմաց Ռուսաստանի դեմ որոշ պատժամիջոցների հնարավոր վերացման հարցում որոշում կկայացնի իր թիմի հետ խորհրդակցելուց հետո։

Ինչպես հաղորդում է  «ՌԻԱ Նովոստի»-ն, լրագրողների հետ զրույցում այս մասին հայտարարել է ԱՄՆ պետքարտուղար Մարկո Ռուբիոն։

«Դրանք բազմաթիվ պատժամիջոցներ են, այդ թվում՝ ոչ ամերիկյան։ Ռուսաստանի ներկայացուցիչները Էր-Ռիադում ԱՄՆ պատվիրակության հետ բանակցություններում քննարկել են որոշ պատժամիջոցներ, որոնք, ըստ իմ տվյալների, նույնիսկ ամերիկյան չեն։ Այսինքն՝ մենք չենք կարող դրանք վերացնել, եթե նույնիսկ ցանկանանք»,-նշել է Ռուբիոն։

ԱՄՆ պետքարտուղարի խոսքով՝ ամերիկյան կողմը ներկայում վերլուծում է բանակցությունների արդյունքները։ Նա նշել է, որ պատշաճ գնահատումից հետո մի քանի տարբերակներ կզեկուցվեն նախագահ Թրամփին՝ համապատասխան որոշում կայացնելու համար։

Ստամբուլի ձերբակալված քաղաքապետ Էքրեմ Իմամօղլուն կոչ է արել երկրի իշխանություններին իր դատավարությունն անցկացնել թուրքական պետական ​​TRT հեռուստաալիքի ուղիղ եթերում։ Այս մասին հայտարարել է Թուրքիայի գլխավոր ընդդիմադիր Ժողովրդահանրապետական ​​կուսակցության առաջնորդ Օզգյուր Օզելը Ստամբուլում ի պաշտպանություն Իմամօղլուի ցույցի ժամանակ, գրում է ՏԱՍՍ-ը։

«Ես Իմամօղլուից պատմական մարտահրավեր եմ փոխանցում Էրդողանին։ Քաղաքապետն ասում է, որ ինքը մեղավոր չէ։ «Եթե դու (Էրդողանը) վստահում ես ինքդ ձեզ, առաջարկում եմ դատավարությունն անցկացնել TRT հեռուստաալիքի ուղիղ եթերում», - ասել է Օզելը ՝ փոխանցելով ձերբակալված քաղաքապետի խոսքը։

Մարտի 23-ին դատարանը ձերբակալել է Ստամբուլի քաղաքապետ Էքրեմ Իմամօղլուին՝ կոռուպցիայի և Թուրքիայում ահաբեկչական համարվող Քրդստանի աշխատավորական կուսակցությանը օգնելու մեղադրանքով։ Իմամօղլուն Թուրքիայի ներկայիս ղեկավար Ռեջեփ Էրդողանի գլխավոր քաղաքական հակառակորդն է, և ընդդիմության կողմից համարվում է նախագահական ընտրությունների ապագա թեկնածու։

Նրա կալանավորումից հետո Ստամբուլում և Թուրքիայի այլ քաղաքներում բողոքի լայնածավալ ցույցեր են սկսվել։ Ոստիկանությունը ջրցան մեքենաներ և գազ է կիրառել ցուցարարների դեմ, իշխանությունները փակել են ճանապարհները: Առաջատար հեռուստաալիքները դադարեցրել են հանրահավաքների ուղիղ հեռարձակումը։ Երկրի ներքին գործերի նախարար Ալի Երլիկայան հայտնել է, որ մարտի 24-ին ձերբակալված ցուցարարների թիվը գերազանցել է 1,000-ը։

ԱՄՆ պետքարտուղար Մարկո Ռուբիոն մարտի 27-ին հայտնել է, որ Թուրքիայի արտգործնախարար Հաքան Ֆիդանի հետ Վաշինգտոնում հանդիպման ընթացքում անհանգստություն է հայտնել Թուրքիայում անցկացվող ցույցերի առնչությամբ, որոնք հաջորդել են Ստամբուլի քաղաքապետ Էքրեմ Իմամօղլուի ձերբակալությանը: Այս մասին հաղորդում է Reuters գործակալությունը։

«Մենք հետևում ենք, մենք մտահոգություն ենք հայտնել, մենք չենք ցանկանում տեսնել նման անկայունություն ցանկացած երկրի կառավարման գործընթացում, որը, հատկապես, այդքան մտերիմ դաշնակից է», – ասել է Ռուբիոն լրագրողներին ինքնաթիռում։

«Մենք դիտում ենք այն նույն ռեպորտաժները տեղի ունեցողի մասին, ինչպես և մյուսները: Անշուշտ, մենք անհանգստացած ենք այս բողոքի ակցիաների և մի քանի հաղորդումների առնչությամբ», – հավելել է նա:

Թուրքիայի գլխավոր ընդդիմադիր կուսակցությունը կոչ է արել, որ ցույցերը շարունակվեն։ Երկրի նախագահ Ռեջեփ Թայիփ Էրդողանը հայտարարել է, որ ցույցերը «շոու» են և իրավական հետևանքներ կունենան ցուցարարների համար։

Բողոքի ակցիաները՝ ի պաշտպանություն Ստամբուլի ձերբակալված քաղաքապետ, ամենամեծ ընդդիմադիր Հանրապետական-ժողովրդական ​​կուսակցության անդամ Էքրեմ Իմամօղլուի, անցյալ շաբաթվանից շարունակվում են Անկարայում, Ստամբուլում, Իզմիրում և մի շարք այլ քաղաքներում։ Մարտի 23-ին Թուրքիայի դատարանը որոշում է կայացրել կալանավորել կոռուպցիայի մեջ կասկածվող Իմամօղլուին, միևնույն ժամանակ կալանավորման միջնորդությունը ահաբեկչության մասին երկրորդ գործի շրջանակներում մերժվել է։ Իմամօղլուի հետ միասին ձերբակալվել են քաղաքապետարանի մի շարք բարձրաստիճան պաշտոնյաներ։ Ընդհանուր առմամբ, դատական ​​գործով անցնում է ավելի քան 90 մարդ։

Անկարայի գլխավոր դատախազության հետաքննության շրջանակում Ստամբուլում ձերբակալված Շվեդիայի քաղաքացի Կայ Յոակիմ Մեդինը ձերբակալվել է «նախագահին վիրավորելու» եւ «ահաբեկչական կազմակերպությանն անդամակցելու» մեղադրանքով այն բանից հետո, երբ մեկնել է Թուրքիա՝ մասնակցելու Ստամբուլի քաղաքապետ Էքրեմ Իմամօղլուի ձերբակալության դեմ բողոքի ցույցերին, գրել է Cumhuriyet-ը։

Թերթի, որտեղ աշխատում է Մեդինը, գլխավոր խմբագիր Անդրեաս Գուստավսոնն ասել է, որ երկու օր է, ինչ ոչ մի լուր չկա Յոակիմ Մեդինից:

Ըստ թուրքական լրատվամիջոցի տեղեկության՝ 2023թ. հունվարի 13-ին Անկարայի գլխավոր դատախազության ահաբեկչության հետաքննության բյուրոն հետաքննություն է սկսել այն բանից հետո, երբ պարզվել է, որ 2023թ. հունվարի 11-ին Ստոկհոլմում (Շվեդիա) Քրդստանի աշխատավորական կուսակցության անդամները Թուրքիայի նախագահ Ռեջեփ Թայիփ Էրդողանին պատկերող մակետը կախել են քաղաքապետարանի դիմաց։

Հետաքննության ընթացքում պարզվել են 15 կասկածյալներ, այդ թվում՝ Մեդինը, որոնք իրականացրել են ակցիան, կազմակերպել այն, դրա մասին հաղորդել են մամուլին կամ ենթադրվում է, որ կապված են դրա հետ:

Պարզելով, որ Մեդինը՝ կասկածյալներից մեկը, որի նկատմամբ ձերբակալության օրդեր է տրվել նախագահին վիրավորելու եւ «զինված ահաբեկչական կազմակերպությանն անդամակցելու» հիմքով սկսված հետաքննության շրջանակում, նախօրեին երկիր է մտել, ոստիկանությունը նրան բերման է ենթարկել Ստամբուլում։

Մեդինը տարվել է Անկարայի հաշտարար քրեական դատարան եւ ձերբակալվել «նախագահին վիրավորելու» եւ «զինված ահաբեկչական կազմակերպությանն անդամակցելու» մեղադրանքներով։

Ներկայացնում ենք տարադրամի փոխարժեքները՝ ըստ rate.am-ի:

ԱՄՆ դոլարի առքի առավելագույն արժեքն է 390 դրամ, վաճառքի նվազագույն արժեքը՝ 393.5 դրամ:

Եվրոյի առքի առավելագույն արժեքն է 421 դրամ, վաճառքի նվազագույն արժեքը՝ 425 դրամ:

Ռուսական ռուբլու առքի առավելագույն արժեքն է 4.60 դրամ, վաճառքի նվազագույն արժեքը՝ 4.7 դրամ:

Հարավկորեական LG և Samsung ընկերությունները հայտարարել են ռուսական շուկա հնարավոր վերադարձի մասին այն բանից հետո, երբ պատժամիջոցները չեղարկվեն Ռուսաստանի Դաշնության և ԱՄՆ-ի միջև բանակցությունների ֆոնին: Այս մասին հայտնում է The Korea Times թերթը։

LG Electronics-ի գործադիր տնօրեն Չո Ջու Վանն ասել է, որ ընկերությունը շարունակում է «զգույշ լինել, քանի որ պատերազմը դեռ չի ավարտվել», սակայն հավելել է. «Մենք ուշադիր հետևում ենք իրավիճակին, որպեսզի պատժամիջոցների վերացումից հետո կարողանանք վերսկսել աշխատանքը»:

Korea Times-ը նշում է, որ Samsung Electronics-ը նույնպես դիտարկում է Ռուսաստանում իր բիզնեսը վերսկսելու հնարավորությունը։

Պարբերականը պարզաբանում է, որ ռուսական էլեկտրոնիկայի շուկա վերադարձը հեշտ չի լինի, քանի որ թափուր տեղերը զբաղեցրել են Չինաստանից մրցակիցները։

«Շուկայի ուսումնասիրող StatCounter-ի տվյալներով՝ Xiaomi-ի մասնաբաժինը ռուսական շուկայում փետրվարի դրությամբ կազմել է 20,93%, երկրորդը Apple-ն է՝ 29,21%-ով, իսկ Samsung Electronics-ը մնացել է երրորդ տեղում՝ 17,31%-ով»,- նշվում է հոդվածում։

Մյանմարում տեղի ունեցած երկրաշարժի հետևանքով զոհերի թիվը հասել է 1,002-ի, ևս 2,376 մարդ տուժել է, շաբաթ օրը հաղորդել Է Չինաստանի կենտրոնական հեռուստատեսությունը ՝ հղում անելով Մյանմարի լրատվամիջոցներին, փոխանցում է ՌԻԱ Նովոստին։

Նշվում է, որ սպասվում է, որ զոհերի և վիրավորների թիվը դեռ կավելանա։ Փրկարարական աշխատանքները շարունակվել են ողջ գիշեր՝ չնայած բազմաթիվ հետցնցումներին:

Հիշեցնենք, որ երեկ հաղորդել էինք, որ Մյանմարում 7,7 և 6,4 մագնիտուդ ուժգնությամբ 2 երկրաշարժ էր գրանցվել։ Ցնցումները զգացվել են նաև Բանգլադեշում, Հնդկաստանում, Թաիլանդում, Լաոսում և Չինաստանում, հայտնել է ԱՄՆ երկրաբանական ծառայությունը։

Այսօր Հայաստանում «լռության օր» է. այս պահից մինչև մարտի 30-ին տեղական ժամանակով ժամը 20.00-ի Գյումրիի ավագանու ընտրությունների քվեարկության ավարտն արգելվում է ցանկացած քարոզչություն։

Գյումրիի ներկայացուցչական մարմինն ընտրվում է համամասնական ընտրակարգով, այսինքն՝ կուսակցական ցուցակներով։ Քաղաքական կուսակցությունների և դաշինքների համամասնական ցուցակները գլխավորող անձինք Գյումրիի քաղաքապետի թեկնածուներ են։

Եթե ​​որեւէ ուժ ստանա Գյումրիի ներկայացուցչական մարմնում մանդատների բացարձակ մեծամասնությունը, ապա նրա թեկնածուն օրենքի ուժով կդառնա Գյումրիի քաղաքապետ։ Հակառակ դեպքում կսկսվի կոալիցիաներ կազմելու գործընթացը։

Գյումրիի ավագանու մանդատների համար պայքարում է 9 քաղաքական ուժ՝ 6 կուսակցություն և 3 դաշինք:

«Քաղաքացիական պայմանագիր» կուսակցություն - ցուցակը գլխավորում է Սարիկ Մինասյանը։

«Հայաստանի կոմունիստական կուսակցություն» - ցուցակը գլխավորում է Գյումրիի նախկին քաղաքապետ Վարդան Ղուկասյանը։

«Ապրելու երկիր» կուսակցություն – ցուցակը գլխավորում է Կարեն Մալխասյանը:

«Մայր Հայաստան» դաշինք - ցուցակը գլխավորում է Կարեն Սիմոնյանը։

«Հայաստանի աշխատավորական սոցիալիստական կուսակցություն» - ցուցակը գլխավորում է Արտյոմ Թումանյանը:

«Եվրադաշինք» - ցուցակը գլխավորում է Լևոն Բարսեղյանը:

«Դեմոկրատական այլընտրանք» կուսակցություն - ցուցակը գլխավորում է Արտյոմ Ղարաղազարյանը:

«Մեր քաղաքը» դաշինք – ցուցակը գլխավորում է Մարտուն Գրիգորյանը:

«Իմ հզոր համայնք» կուսակցություն – ցուցակը գլխավորում է  պրոդյուսեր Ռուբեն Մխիթարյանը: