Անգլիայի Հերթֆորդշիրի շրջանի Բուշի քաղաքում խաչաղեղով հարձակման հետևանքով երեք կին է սպանվել։ Նրանք BBC-ի ռադիոհաղորդավար Ջոն Հանթի կինը և դուստրերն են։ Կասկածյալը փախուստի է դիմել։ Այս մասին հաղորդում են 168.am-ը և BBC-ն։

61-ամյա Քերոլ Հանթը և նրա 25-ամյա և 28-ամյա դուստրերը մահացել են դեպքի վայրում։ Ոստիկանության համաձայն՝ հարձակման ընթացքում օգտագործվել է խաչաղեղ և, հնարավոր է, այլ զենքեր։

Կասկածյալը 26-ամյա Քայլ Քլիֆորդն է՝ Լոնդոնի հյուսիսից։ Նրա որոնումները շարունակվում են։ Բուշիում և Լոնդոնի հյուսիսում ոստիկանության մեծաթիվ ուժեր են տեղակայվել։ Իրավապահները հանրությանը զգուշացրել են չմոտենալ կասկածյալին, որը դեռ կարող է զինված լինել խաչաղեղով։

Միջադեպը տեղի է ունեցել հուլիսի 9-ին, տեղական ժամանակով ժամը 19։00-ի մերձակայքում։ Ոստիկանությունը կարծում է, որ սա եղել է թիրախավորված հարձակում։

Արմեն Հովասափյանը ֆեյսբուքյան իր էջում գրում է. ««ԻնքնաԷդմոնանացումը» շարունակվում է… Մասնագիտության բերումով ստիպված եմ լինում լսել տարբեր քաղաքական դեմքերի (իհարկե դրանցից շատերին դժվար է քաղաքական համարել, իսկ մի մասին էլ՝ դեմք), ինչն իր հերթին ստիպում է անդրադառնալ ու քաղաքական գնահատականներ հնչեցնել նրանց կողմից տիրաժավորված թեզերին ու շատ հաճախ կիրառվող մանիպուլյացիաներին։

Վերջին շրջանում իր քաղաքական մենախոսություններով սկսել է ակտիվանալ Մարուքյան Էդմոնը։ Նա իր «ինքնազրույցներում» փորձում է գնահատականներ տալ ու տարբեր իրավիճակների հետ կապված մեկնաբանություններ անել։ Իհարկե, հանուն արդարության պետք է փաստենք, որ Էդմոնը, ով վաղուց հասկացել է, որ քաղաքականությունն իր համար այլևս մեռած թեմա է, ամեն կերպ փորձում է ինքնաարդարացման դրվագներով հանդես գալ՝ այդ կերպ իր վրայից մաքրելով տարիներ շարունակ կուտակված նիկոլականությունը։

«Կլասիկ» քաղաքական գործիչն իր վերջին մենախոսության մեջ խոսում էր 2020 թվականի սեպտեմբերի 27-ի՝ 44-օրյա պատերազմի մեկնարկի մասին և տարբեր դրվագների հետ կապված մի շարք պնդումներ անում։

Հավելեմ, որ Մարուքյանի նախորդ էպիզոդը վերաբրվում էր 2020-ի նոյեմբերի 9-ի գիշերը Երևանում տեղի ունեցած միջադեպերին։ Հենց սկզբից արձանագրեմ մի բան․ երկու թեմայի հետ կապված Էդմոնը տիրաժավորում էր բացառապես Նիկոլի օրակարգից բխող թեզեր, գեղեցիկ ու էդմոնական փաթեթավորումներով ու համապատասխան դոզայի սոուսով հանրությանը մատուցում էր նիկոլական ասելիքը։

Ըստ էության՝ Նիկոլի Էդմոնը փորձում է հանրության չկողմոնոշված հատվածին այլ պրիզմայով ներկայացնել Փաշինյան Նիկոլի կողմից տված հարմար ու անհրաժեշտ թեզերը։ Ճիշտ է, նա մի քանի դրվագում փորձում է քննադատել ու իր «անհամաձայնությունը» հայտնել իշխանությունների վարած քաղաքականության վերաբերյալ, բայց դե թեմային տեղյակ հատվածի համար ամեն ինչ լակմուսի նման պարզ է (գեղիցը մարդ կա)։ Սեփական թիմակիցներին կորցրած ու կուսակցությունում փաստացի մենակ մնացած Էդմոնն ամեն ինչ անում է հանրային ընկալումներում նոր դեմքով հանդես գալու համար, և մարդկանց համոզում, թե ստեղծված իրավիճակում՝ «ճիշտն ինքն է» (միանգամից աչքիս առաջ եկավ 2018-ի «երրորդ ճանապարհի» մասին հայտնի թեզը)։ Այլ կերպ ասած՝ նիկոլական թեզերը արտասանվում են էդմոնական բերանով։

Առանցքային շեշտը, որ Մարուքյանն անընդհատ ընդգծում է՝ նախկին իշխանությունների հասցեին հնչող քննադատությունն է։ Մասնավորապես, նա նշում է, թե «մինչև 2020 թվականը ոչ ոք չի իմացել, թե ինչ է բանակցում Սերժ Սարգսյանը, նա չի խոսել հանրության հետ»։ Եվ սա այն դեպքում, երբ տարբեր առիթներով հանգամանալից նշվել է այս մասին։

Այստեղ Էդմոնին ասում եմ՝ քուա՛նշ, քանի որ մինչև Նիկոլի կողմից իշխանության բռնազավթումը, հանրային տիրույթում հստակ տեղյակ են եղել բանակցվող փաթեթից։ Ավելին, ոչ միայն սեղանին հստակ բանակցված փաստաթուղթ է եղել դրված, այլ Փաշինյանն ինքն է անձամբ խոստովանել, որ իրեն առաջարկվել է այդ փաստաթղթի հիման վրա խնդիրը կարգավորել, իսկ ինքը դա մերժել է՝ նախընտրելով իրեն գիժ տեղ դնել:

Հիմա ավելի հանգամանալից․ Սերժ Սարգսյանը դեռևս Կիսիլոյվին տրված իր հայտնի հարցազրույցում ընդգծել է, որ բանակցային սեղանին կա «5+2» տարբերակը, նշել, որ պատրաստ է հանձնել այդ տարածքները Արցախի կարգավիճակի դիմաց։ Բոլորս ենք հիշում, որ մինև 2018 թվականը բոլորը, այդ թվում Էդմոնը, Սերժ Սարգսյանին քննադատում էին դրա համար։ Ե՛վ պատերզմից առաջ, և՛ հետո, միշտ էլ խոսվել է տարածքներ՝ կարգավիճակի դիմաց։ 2016 թվականին «Կազանյան փաստաթուղթը» կետ առ կետ հանրայնացվեց և լրատվականներով տարածվեց՝ դառնալով հանրային լայն քննարկման առարկա, ի դեպ դա արվեց անձամբ Լավրովի կողմից, որտեղ նա նաև նշել է, որ «Կազանյան փաստաթղթից» հրաժարվել է Ադրբեջանը, այլ ոչ թե Հայաստանը։ Այստեղ հստակ դարձավ, որ «Կազանյանում» սևով սպիտակի վրա գրված են «Արցախի միջանկյալ կարգավիճակի ու վերջնական կարգավիճակի» մասին հայտնի տարբերակը, ինչպես նաև հստակ ընդգծված, այդ գործընթացների իրականացման ճանապարհային քարտեզները՝ կետ առ կետ։ Ի դեպ՝ դա արվեց

ԵԱՀԿ-ի կողմից, այն ժամանակ, երբ պարզ դարձավ, որ բանակցություններն այլևս, որպես այդպիսին, գոյություն չունեն (2021 թվականի հունվարի 13-ին Պապովի կողմից)։

Մի բան էլ. նույն 2020-ի հոկտեմբերի 12-ին Նիկոլի հետ հանդիպման ժամանակ Էդուարդ Շարմազանովը մի քանի տասնյակ քաղաքական ուժերի ներկայությամբ վերջինիս ՀՀԿ-ի և Սերժ Սարգսյանի անունից ասել է, որ «գնա, խնդրի մեր ռազմավարական դաշնակցին, որ կանգնեցնի պատերազմը և ինչ առաջարկում է՝ համաձայնվի՛ր, քանի որ եթե չհամաձայնվեցիր, վաղն ավելի վատ պայմաններ են լինելու»։ Բացի էն, որ չի արվել, այլ նաև նույն անտարբերությունն է եղել նաև հոկտեմբերի 19-ին։

Այսինքն, էն որ Սերժ Սարգսյանին տասնյակ տարիներ սարքել էիք «բռնապետ» ու մարդկանց աչքին դեմոնիզացրել, հիմա ամեն օր ավելի ու ավելի պարզ է դառնում, թե ով էր ավելի ժողովրդավարն ու հասարակության հետ խոսացողը, հաշվետուն։

Էդմո՛ն, եթե Նիկոլն էդքան վատն էր, ու դու ի սկզբանե հասկացել էիր, որ պատերազմի կազմակերպման հետ կապված խնդիրներ կան, բա ինչո՞ւ գնացիր ու դարձար Նիկոլի հատուկ հանձնարարականներով դեսպանը։ Եթե հիշողությունս չի դավաճանում, իսկ ես բավական լավ հիշողություն ունեմ, Բերձորի ու Աղավնոյի հանձնելու ժամանակ, հենց դու էիր, որ հայտարարում էիր, թե «եթե Լաչինն ու Աղավնոն չտայինք, դրա այլընտրանքը լինելու էր միջանցքային տրամաբանությունը»։

Վերջում մի կարևոր դրվագ․ Էդմո՛ն, շեֆդ Սարգսյանից 42 հազարանոց հայրենիք էր ժառանգել, հիմա իր հաջորդին ի՞նչ ու ինչքա՞ն տարածք է ժառանգելու. մի հատ էլ քարտեզին ուշադիր նայի՛ր»։

Գյումրիում՝ Վարդանանց հրապարակում, այսօր՝ ժամը 15:10-ի սահմաններում, ձին կծել է 7-ամյա աղջկա թևը. երեխան տեղափոխվել է հիվանդանոց: Այս մասին հայտնում է shamshyan.com-ը:

Վարդանանց հրապարակում պարեկային ծառայության աշխատակիցները նկատել են լացող երեխային և պարզել, որ ձին կծել է աղջկա աջ թևը: Նրանք պարեկային ծառայության ավտոմեքենայով աղջկան տեղափոխել են Գյումրու Ավստրիական մանկական բժշկական կենտրոն:

Կայքի տեղեկություններով, երեխայի կյանքին վտանգ չի սպառնում:

Պարեկներն ու ոստիկանության ծառայողները պարզում են ձիերի սեփականատիրոջ ինքնությունը:

Ժողովրդավարության հարցին մոտենում եմ գլոբալ տեսանկյունից։

Այս մասին Երևանում տեղի ունեցած ասուլիսի ժամանակ հայտարարել է ԱՄՆ ՄԶԳ ղեկավար Սամանթա Փաուերը։

«Տեսնում ենք ամբողջ աշխարհում ժողովրդավարության զգալի հետընթաց, երբ կասկածի տակ են դրվում ընտրությունների արդյունքները, այդ թվում՝ իմ երկրում, երբ քաղաքացիական հանրությունը գնալով ավելի շատ է ճնշումների ենթարկվում, երբ քաղաքացիները չեն կարողանում քննադատել կառավարությանը՝ վախենալով բանտարկումից։

Ես չեմ եկել այստեղ՝ դրսից այցելուի հայացքով գնահատական տալու ժողովրդավարությանը, բայց կարող եմ նշել, որ վերջին 5 տարում այս երկրում եղել են ժողովրդավարական առումով գլոբալ զարգացումներ։

Մենք որևէ անձի կամ կառավարության չենք սատարում, այլ դիտարկում ենք այն, թե ինչ կարող է անել ԱՄՆ-ն՝ ուեղացնելու կառույցներն, ինստիտուտները»,- ասել է նա։

Վաստակավոր արտիստ Սոֆի Դևոյանը հուլիսի 8-ին նշում էր ծննդյան 75-ամյակը: Ծննդյան տոնին նվիրված համերգային երեկոյին Ժաննա Անդրեասյանը ՀՀ կրթության, գիտության, մշակույթի և սպորտի նախարարության ոսկե մեդալով է պարգևատրել Սոֆի Դևոյանին։ Համերգին ներկա եղել նաև վարչապետի կինը` Աննա Հակոբյանը։ Նա ողջագուրվել է Սոֆի Դևոյանի հետ, ինչը համացանցում որոշակի քննադատությունների տեղիք է տվել: «Հրապարակ»-ն այս առիթով մի քանի հարց է ուղղել պարուհուն:

- Համացանցում որոշակի քննադատություններ եղան, որ նախարար Անդրեասյանի ձեռքից մեդալ եք վերցրել, ողջագուրվել եք Աննա Հակոբյանի հետ և այլն:

- Ինչի՞ մասին է խոսքը, ես միայն լավ բաներ էի կարդում քիչ առաջ: Գիտեք ինչ, ինչո՞ւ են քննադատում, որ ի՞նչ, որ 75 տարեկան կին եմ և մեդա՞լ եմ ստացել, հա՞, դրա՞ համար են քննադատում: ․․․Մեկը լավը կասի, մյուսը` վատը, ոչինչ թող խոսեն, կյանքն այդպիսի բան է: Ամեն ինչին այս կյանքում պետք է շատ հանգիստ վերաբերվել ու ոչ մի պրոբլեմ չի լինի:

- Համակրո՞ւմ եք այս իշխանություններին: Նրանց շատ հայտնիներ մեղադրում են պատերազմում պարտվելու, երկիրը թշնամուն հանձնելու մեջ:

- Ինձ քաղաքական հարցեր մի տվեք, խնդրում եմ․․․

- Իսկ որպես կին համակրո՞ւմ եք Աննա Հակոբյանին:

- Չեմ պատասխանի այդ հարցին: Քաղաքականությունն ինձ համար չէ: Այն ինչ վերաբերում է քաղաքականությանը, ես չեմ պատասխանի: Ինչ վերաբերում է ղեկավարությանը, պետք է հարգել այն մարդուն, ով տվյալ պահին ղեկավարում է երկիրը: Ես մշտապես հարգել եմ այն ղեկավարներին, ովքեր երկրի ղեկին են եղել: Եղել եմ 14 տարեկան, հարգել եմ տվյալ պահի ղեկավարությանը, եղել եմ 19 տարեկան, հարգել եմ ու այդպես…. Ինչ-որ մեկին քննադատել չեմ պատրաստվում: Այսօր այս մարդն է մեր վարչապետը, ուրեմն պետք է հարգել նրան: Ես միշտ այդպես եմ մտածել: Այդքան մի բան:

Մանրամասները՝ սկզբանղբյուրում:

«Ապրելու երկիր» կուսակցության համահիմնադիր Մեսրոպ Առաքելյանի ֆեյսբուքյան գրառումը․ «Վլադիմիր Գասպարյանի և մյուսների վրա տարածվող համաներման մասին օրենքը նախաձեռնվել և ընդունվել է 2018թ-ին, Նիկոլ Փաշինյանի իշխանության օրոք»:

Աղբյուրը` Մեսրոպ Առաքելյան

Իրանի արտաքին գործերի նախկին փոխնախարար Աբաս Արաղչին մեծ հավանականությամբ կդառնա արտաքին գործերի նախարար, գրում է Tasnim գործակալությունը՝ հղում կատարելով նախագահի շրջապատի աղբյուրներին։

Ըստ աղբյուրների տեղեկությունների՝ Փեզեշքիանի քաղաքական խորհրդատուները կարծում են, որ Արաղչին առավել հարմար է այդ պաշտոնի համար, և եթե «որևէ առանձնահատուկ բան» տեղի չունենա, նրա թեկնածությունը կքննարկվի խորհրդարանում։

MediaHub-ը գրում է

Հայաստանում օտարերկրյա դիվանագիտական ներկայացուցչությունները վերջին շրջանում տարբեր մոտեցումներ են ցուցաբերում արցախցիներին մուտքի արտոնագիր տրամադրելու հարցում։ Մասնավորապես, եվրոպական երկրների դեսպանատները կամ հյուպատոսարանները մերժում են՝ կապույտ անձնագրում 070 ծածկագիր ունեցող քաղաքացիներին և վիզա չեն տրամադրում։

MediaHub-ը բազմաթիվ ահազանգեր է ստացել բռնի տեղահանված քաղաքացիներից, որ խոչընդոտվում է, ըստ էության, իրենց ազատ տեղաշարժը, նրանց թույլ չեն տալիս մեկնել երկրից՝ նախապայման դնելով փոխել ՀՀ քաղաքացու անձնագիրը: Կարճ ասած՝ ջնջել վերջին կապը թշնամու կողմից ապօրինի օկուպացված հայրենի Արցախի հետ:

Բողոքները մեկը չեն, երկուսը չեն, հատկապես ամռան այս ամիսներին խնդիրը էլ ավելի ցցուն ուրվագծվեց:

«070 կոդով անձնագրերի դեպքում չեն տրամադրում մուտքի արտոնագիր՝ պահանջելով փոխել այն և ստանալ ՀՀ քաղաքացիություն։ Սա դեսպանատան տեսակետը չէ, որ 070 անձնագիր ունեցող անձինք փախստականներ են, այլ դա Հայաստանի միգրացիոն իշխանությունների պաշտոնական ձևակերպումն է»,- այս մասին MediaHub-ին փոխանցեցին «ԲԻ ԷԼ ԷՍ ԻՆԹԵՐՆԵՇՆԼ» վիզաների կենտրոնից։ 

Սա ենթադրում է, որ Արցախի քաղաքացիներին արգելում են այցելել  դեպի շենգենյան գոտի։ Օրինակ, Բուլղարիայի դեսպանատնից փոխանցեցին, որ եթե քաղաքացու անձնագիրն ուժի մեջ է, ապա միայն ուսումնասիրելուց հետո կտրվի մուտքի արտոնագիր։ 

Իսկ Իսպանիայի դիվանագիտական ներկայացուցչությունից փոխանցեցին․ «Ցավոք, 070 կոդով անձնագրեր ունեցող քաղաքացիները մերժում կստանան, քանի որ Հայաստանի իշխանությունների կողմից հրապարակված տեղեկատվության հիման վրա դեսպանությունը ներկայումս ենթադրում է, որ 070 ծածկագրով անձնագիրը փաստացի չի համարվում Հայաստանի քաղաքացու անձնագիր։ Քանի դեռ անձնագրով հստակ ապացուցված չէ քաղաքացիությունը, հնարավոր չէ ընդունել կամ ընթացք տալ դիմումին»։ 

Արցախի Մարդու իրավունքների պաշտպան Գեղամ Ստեփանյանը, արձագանքելով MediaHub-ի հարցին, նշեց. «Մի շարք դեսպանատների կողմից արցախցիներին մուտքի արտոնագիր տրամադրելու դիմումի մերժումը խախտում է Փախստականների կարգավիճակի մասին կոնվենցիայի դրույթները»։

Ըստ այդ կոնվենցիայի՝ պայմանավորվող պետություններն իրենց տարածքում օրինական կարգով բնակվող փախստականներին տալիս են ճամփորդական փաստաթղթեր՝ իրենց տարածքից դուրս ճամփորդելու նպատակով։

«Սա այն դեպքում, եթե ազգային անվտանգությունից և հասարակական կարգի պաշտպանությունից բխող հիմնավոր պատճառներն այլ բան չեն պահանջում։ Բացի այդ, պայմանավորվող պետությունները կարող են նման ճամփորդական փաստաթուղթ տալ իրենց տարածքում գտնվող ցանկացած այլ փախստականի»,- հավելեց ՄԻ պաշտպանը։

Այսպիսով, Հայաստանում բնակություն հաստատած, ադրբեջանցիների վայրագություններից փրկված արցախցիները բառացի հայտնվել են մեկը մյուսին հաջորդող խնդիրների շրջափուլի մեջ, հետն էլ՝ սահմանափակ տեղաշարժի հնարավորությամբ: 

Հունան Թադևոսյան

 Իրանի ընտրված նախագահ Մասուդ Փեզեշքիանի երդմնակալության արարողությունը տեղի կունենա հուլիսի 30-ին Մեջլիսի (խորհրդարանի) շենքում։ «Արմենպրես»-ի փոխանցմամբ՝ այս մասին ISNA գործակալությանը հայտնել է Իրանի խորհրդարանի նախագահության անդամ Մոջթաբա Յուսեֆին։

«Ըստ ծրագրի՝ 14-րդ նախագահի պաշտոնի ստանձնման և երդմնակալության արարողությունը տեղի կունենա մորդադի 9-ին (խմբ․՝ Գրիգորյան տոմարով համապատասխանում է հուլիսի 30-ին)», - ասել է Յուսեֆին։

Նրա խոսքով՝ երդմնակալությունից առաջ պետք է տեղի ունենա Իրանի գերագույն առաջնորդ Ալի Խամենեիի կողմից ընտրված նախագահի հաստատման մասին հրամանագրի ստորագրման արարողություն։

Ինչպես նշել է Մեջլիսի նախագահության անդամը, ըստ օրենքի՝ երդմնակալության արարողությունը տեղի է ունենում Գերագույն դատարանի նախագահի, դատական ​​իշխանության ղեկավարի, Սահմանադրության պահապանների խորհրդի անդամների և այլ բարձրաստիճան պաշտոնյաների և զինծառայողների ներկայությամբ Իրանի խորհրդարանի շենքում, որի ընթացքում ընտրված նախագահը երդում է տալիս և երդվում արժանավայել կերպով կատարել իր պարտականությունները։

Հուլիսի 5-ին Իրանում տեղի ունեցավ արտահերթ նախագահական ընտրությունների երկրորդ փուլը, որը նշանակված էր ուղղաթիռի վթարի հետևանքով նախագահ Էբրահիմ Ռայիսիի զոհվելուց հետո։ Ընտրությունների արդյունքներով ձայների 53,6 %-ով հաղթանակ է տարել առողջապահության նախկին նախարար Մասուդ Փեզեշքիանը:

Հիմա էդ մարդիկ թալանչի՞ են, թե՞ բիզնեսմեն․ ՔՊ-ականը՝ նախկինների մասին.

Տեսանյութ