Ռուսաստանը «տեղեկատվական օպերացիա է սկսել՝ Հայաստանի և Ադրբեջանի հետ Ուկրաինայի հարաբերությունները վատացնելու համար». Հայաստանում «կեղծ լուր է տարածվում Ուկրաինայի՝ Երևանի և Բաքվի միջև հակամարտություն հրահրելու փորձերի մասին»: Նման հայտարարությամբ է հանդես եկել Ուկրաինայի ՊՆ գլխավոր հետախուզական վարչությունը:
Հայտարարության մեջ նշվում է, որ «հայկական տեղեկատվական դաշտում, մասնավորապես՝ թելեգրամյան ալիքներով կեղծ լուր է տարածվում այն մասին, թե Ուկրաինայի ՊՆ գլխավոր հետախուզական վարչությունը փորձում է Ադրբեջանի և Հայաստանի միջև զինված հակամարտություն հրահրել, որպեսզի Մոսկվայի դեմ պատերազմի 2-րդ ճակատ բացվի»։
«Որպես այս տեղեկատվական հարձակման հիմք՝ օգտագործվել է կեղծ զեկույց, իբր Ուկրաինայի պաշտպանության նախարարության գլխավոր հետախուզական վարչությունից՝ ուղղված Ուկրաինայի պաշտպանության փոխնախարար Իվան Գավրիլյուկին: Փաստաթուղթը պարունակում է բազմաթիվ կոպիտ սխալներ... Բացի այդ, փաստաթուղթը չի համապատասխանում Ուկրաինայում փաստաթղթերի պաշտոնական գրանցման պահանջներին: Այս տեղեկատվական օպերացիան արշավի մի մասն է, որի նպատակն է վարկաբեկել Ուկրաինան միջազգային ասպարեզում, ինչպես նաև վատթարացնել հարաբերությունները Ուկրաինայի, Հայաստանի և Ադրբեջանի միջև», - ասվում է հայտարարության մեջ։
Քրդստանի աշխատավորական կուսակցության ներկայացուցիչները հայտարարել են հրադադար հաստատելու և իրենց առաջնորդ Աբդուլլահ Օջալանի զինաթափման կոչը կատարելու մասին:
«Մենք համաձայն ենք Օջալանի կոչի բովանդակությանը և հայտարարում ենք, որ կկատարենք նրա պահանջները։ Հայտարարում ենք հրադադարի մասին՝ սկսած շաբաթ օրվանից։ Մեր ստորաբաժանումներից ոչ մեկը զինված գործողություններ չի կատարի, եթե նրանց վրա չհարձակվեն»,- թուրքական լրատվամիջոցների փոխանցմամբ՝ ասված է կուսակցության ղեկավար կոմիտեին հայտարարության մեջ։
ՔՊ Վարչության արտահերթ նիստում հաստատվեցին Գյումրիի և Փարաքարի նախընտրական ցուցակները:
Այդ մասին տեսանյութին կից ասված է Փաշինյանի Ֆեյսբուքի էջում:
2025 թվականի մարտի 30-ին կայանալիք Արմավիրի մարզի Փարաքար և Շիրակի մարզի Գյումրի համայնքների ավագանու արտահերթ ընտրություններին թեկնածուներին տեղեկանքներ տրամադրելու համար վաղը` մարտի 2-ին, ժամը 09.00-ից մինչև 15.00-ը, կաշխատեն ՆԳՆ Միգրացիայի և քաղաքացիության ծառայության Գյումրի 1, Գյումրի 2 և Վաղարշապատի բաժինները։
Այդ մասին հայտնում են ՆԳՆ-ից:
Մեծ Բրիտանիայի վարչապետ Քիր Սթարմերը Վաշինգտոնի ֆիասկոյից հետո Լոնդոն ժամանած Ուկրաինայի նախագահ Վլադիմիր Զելենսկիի հետ բանակցությունների ժամանակ նրան ասել է, որ «Դաունինգ սթրիթում ցնծացող ամբոխը ցույց տվեց, որ դուք լիակատար աջակցություն ունեք Միացյալ Թագավորությունում», գրում է The Guardian-ը։
«Թույլ տվեք միայն ասել, որ դուք շատ, շատ ողջունելի եք այստեղ՝ Դաունինգ սթրիթում։ Եվ ինչպես դուք լսեցիք փողոցում հնչած ուրախությունից, դուք լիակատար աջակցություն ունեք Միացյալ Թագավորության ողջ տարածքում, և մենք ձեզ հետ կլինենք Ուկրաինայի հետ այնքան ժամանակ, որքան դա կպահանջվի: Հուսով եմ, որ դուք լսել եք այս ողջույններից մի քանիսը փողոցում: Միացյալ Թագավորության ժողովուրդն է, որը դուրս է գալիս փողոց՝ ցույց տալու, թե որքանով է կանգնած ձեզ հետ, որքանով է կանգնած Ուկրաինայի կողքին, և ձեր կողքին կանգնելու մեր բացարձակ վճռականությունը՝ անսասան վճռականություն, և հասնելու նրան, ինչ մենք երկուսս էլ ցանկանում ենք հասնել, որը տևական խաղաղությունն է»,- ասել է Մեծ Բրիտանիայի վարչապետը։
Ըստ Սթարմերի, «Ուկրաինայի համար կայուն խաղաղությունը, որը հիմնված է Ուկրաինայի ինքնիշխանության և անվտանգության վրա, այնքան կարևոր է Ուկրաինայի համար, այնքան կարևոր Եվրոպայի համար և այնքան կարևոր է Միացյալ Թագավորության համար»: «Ուստի ես անհամբեր սպասում եմ մեր քննարկումներին այստեղ այսօր կեսօրին։ Շատ շնորհակալ եմ, որ ժամանակ եք տրամադրել», - ավելացրեց նա:
Իր հերթին, Ուկրաինայի նախագահը շնորհակալություն է հայտնել Մեծ Բրիտանիայի վարչապետին ընդունելության համար։
«Ես իսկապես շատ մարդկանց եմ տեսել և ուզում եմ շնորհակալություն հայտնել ձեզ՝ Միացյալ Թագավորության ժողովրդին, այս պատերազմի հենց սկզբից նման մեծ աջակցության համար, շնորհակալություն, ձեր թիմին: Եվ ես շատ ուրախ եմ, որ Նորին Մեծություն Թագավորը համաձայնել է հանդիպել ինձ վաղը, և ես շնորհակալ եմ, որ դուք վաղվա համար կազմակերպել եք այսպիսի հիանալի գագաթնաժողով։ Եվ մենք Ուկրաինայում շատ ուրախ ենք, որ ունենք նման ռազմավարական գործընկերներ, մենք ձեզ հետ պատմական փաստաթուղթ ենք ստորագրել»,- ասել է Զելենսկին։
Մեծ Բրիտանիայի վարչապետն ավելացրեց «100 տարվա համաձայնագիր» արտահայտությունը, մինչ Ուկրաինայի նախագահը շարունակեց. «Այո, մենք ունենք միայն նման փաստաթղթեր ձեզ հետ՝ Միացյալ Թագավորության հետ, այնպես որ մենք ուրախ ենք և ապավինում ենք ձեր աջակցությանը և շատ, շատ, շատ ուրախ ենք, որ ունենք այդպիսի գործընկերներ և նման ընկերներ»:
Սթարմերը ավելացրել է «հրաշալի է» և երկու երկրների ղեկավարները սեղմել են ձեռքերը։
Այսօր՝ մարտի 1-ին, ավտովթար է տեղի ունեցել Երևանում: Ինչպես հայտնում է Shamshyan.com-ը, ժամը 19:00-ի սահմաններում Երևանի բնակիչ 33-ամյա Քաջիկ Ս.-ն, իր վարած «BMW X5» մակնիշի ավտոմեքենայով, Իսակովի պողոտայից դեպի Ա. Բաբաջանյան փողոց ընթանալիս դեռևս անհայտ հանգամանքներում դուրս է եկել երթևեկելի գոտուց, բախվել ճանապարհային նշանին, կոտրել այն և գլխիվայր հայտնվել կանաչ գազոնում:
Վարորդը շտապօգնության բժիշկների կողմից տեղում բուժօգնություն է ստացել, սակայն հրաժարվել է հիվանդանոց մեկնելուց:
Վթարի փաստով ՊԾ Երևան քաղաքի գնդի 3-րդ գումարտակում փաստաթղթեր են ձևակերպվում:
Արմավիրի մարզի քրեական ոստիկանության աշխատակիցները հայտնաբերել են «Հրապարակ»-ի լրագրող Լիա Սարգսյանի տունը թալանած գողին։
«Գողությունը կատարելուց 50 օր անց Արմավիրի մարզի քրեական ոստիկանության աշխատակիցները մեկ այլ անձի տունը թալանելու կասկածանքով ձերբակալեցին տանս գողին։ Պարզվում է «հերոսը» նախկինում եւս 3 անձի տուն է մտել, գողացված իրերի մի մասը վաճառել է, մյուս մասն էլ դեն նետել։ Ոստիկաններն ու քննիչները այսօր ձերբակալված անձի հետ եկան մեր տուն՝ տեղաննության։
Պարզվեց՝ գողություն կատարելու կասկածանքով ձերբակալելված անձը Վաղարշապատի բնակիչ, 28-ամյա Ալբերտ Ադամյանն է, ով խոստովանել է իր կողմից կատարված արարքը։
Փաստի առթիվ նախաձեռնված քրեական վարույթի շրջանակներում Ադամյանը տվել է խոստովանական ցուցմունք, որից հետո իմ եւ մյուս տուժողների տներում կատարվել է տեղազննություն, Ադամյանը մատնացույց է արել, թե ինչպես է ներխուժել տուժողների տները, որտեղից ինչ է գողացել։
Հուսով եմ` գողոնն էլ կբերեք»,-ֆեյսբուքյան էջում գրել է լրագրողը։
ՆԱՏՕ-ի գլխավոր քարտուղար Մարկ Ռյուտեն Զելենսկուն կոչ է արել վերականգնել հարաբերություններն ԱՄՆ նախագահ Դոնալդ Թրամփի և նրա վարչակազմի հետ։
Այս մասին ՆԱՏՕ-ի գլխավոր քարտուղարը հայտարարել է BBC-ին տված հարցազրույցում։
Նա նաև «ափսոսանք» է հայտնել Թրամփի և Զելենսկու ընդհարման համար։
Լավրովը Ֆիդանին տեղեկացրել է ուկրաինական ուժերի կողմից «Թուրքական հոսք» գազատարի վրա hարձակման մասին
Ռուսաստանի արտգործնախարար Սերգեյ Լավրովն այսօր՝ մարտի 1-ին, հեռախոսազրույցի ընթացքում իր թուրք գործընկեր Հաքան Ֆիդանին տեղեկացրել է ուկրաինական ուժերի կողմից «Թուրքական հոսք» գազատարի վրա անօդաչու թռչող սարքի հարձակման մասին, հայտնում է ՌԴ ԱԳՆ մամուլի ծառայությունը։
«Նախարարը լրջորեն խնդրել է իր թուրք գործընկերոջն օգտագործել Անկարայի առկա հնարավորությունները Կիևի հետ աշխատելու համար՝ կանխելու Կիևի վարչակարգի՝ քաղաքացիական ենթակառուցվածքի օբյեկտների դեմ ահաբեկչական հարձակումներ իրականացնելու նմանատիպ փորձերը, որոնք առաջին անգամը չեն:
Ֆիդանը վստահեցրել է, որ անհրաժեշտ միջոցներ կձեռնարկվեն»,- ասված է հաղորդագրության մեջ:
Ինչպես նշում է ՌԴ ԱԳՆ-ն, փետրվարի 24-ին Անկարայում կայացած ռուս-թուրքական բանակցությունների զարգացման ընթացքում նախարարները հաստատել են Ռուսաստանի և Թուրքիայի միջև հետագա համակարգված աշխատանքի կարևորությունը՝ ի շահ տարածաշրջանում խաղաղության, կայունության և անվտանգության պահպանման՝ Ռուսաստանի և Թուրքիայի նախագահներ Վլադիմիր Պուտինի և Ռեջեփ Թայիփ Էրդողանի պայմանավորվածությունների հիման վրա։
Ուկրաինայի նախագահ Վոլոդիմիր Զելենսկին, ցավոք, հրաժարվում է ընդունել իր երկրում պատերազմի վերաբերյալ պրագմատիկ իրականությունը՝ հայտարարել է Սպիտակ տան մամուլի քարտուղար Քերոլայն Լևիթը Fox News-ի եթերում:
Նրա խոսքով՝ ԱՄՆ նախագահ Դոնալդ Թրամփն ուզում է, որ այդ պատերազմն ավարտվի, իսկ ամերիկացի ժողովուրդը հոգնել է պատերազմի համար հարյուր միլիարդավոր դոլարներ վճարելուց։ Լևիթը նշել է՝ նախագահ Զելենսկին բավարար չափով երախտապարտ չէ ԱՄՆ-ին:
Սպիտակ տան խոսնակը հայտարարել է, որ նախատեսվող համաձայնագիրը Ուկրաինայի ժողովրդի համար տնտեսական բարգավաճում էր ապահովելու և վերականգնելու էր ամերիկացի հարկատուների գումարները, սակայն գործարքը չկայացավ Զելենսկու «կոպիտ և թշնամական վարքի պատճառով»:
«Մենք այլևս չենք պատրաստվում դատարկ չեկեր գրել հեռավոր երկրում պատերազմի համար՝ առանց իրական, կայուն խաղաղության»,- նշել է Լևիթը։
Ֆոտո
